ქაიროში აშშ-ის საელჩოსთან შეტაკებები გრძელდება

ეგვიპტის დედაქალაქ ქაიროში, ამერიკის შეერთებული შტატების საელჩოს შენობასთან პოლიციასა და დემონსტრანტებს შორის შეტაკებები გრძელდება.

უცხოური მედიის ინფორმაციით, დიპლომატიური უწყების შენობასთან ასობით ადამიანი პლაკატებით მივიდა. ისინი ამერიკის შეერთებულ შტატებში გადაღებული ფილმის - "ისლამის უცოდველობა" შინაარსს აპროტესტებენ.

აქციის მონაწილე ახალგაზრდების რამდენიმე დაჯგუფება სამართალდამცავებს დაუპირისპირდა და მათ ქვები დაუშინა. საპასუხოდ პოლიციამ ცრემლსადენი გაზი გამოიყენა.

გავრცელებული ინფორმაციით, მასობრივი საპროტესტო აქციები ახლო აღმოსავლეთის და აფრიკის 10-მდე ქვეყანაში გაიმართა.

ყველაზე მასშტაბური არეულობები ეგვიპტესა და იემენში დაფიქსირდა. დედაქალაქებში, ქაიროში და სანაში შეტაკებებს 4 ადამიანი ემსხვერპლა, ხოლო ასობით დაშავდა.

თავდასხმების სერია აშშ-ის საელჩოებზე 11 სექტემბერს ლიბიიდან დაიწყო, რასაც ქალაქ ბენღაზიში აშშ-ის ელჩი კრისტოფერ სტივენსი და მასთან ერთად სამი დიპლომატი ემსხვერპლა. არსებული ინფორმაციით, თავდასხმის რამდენიმე ორგანიზატორი უკვე დაკავებულია.

ფილმი "ისლამის უცოდველობა", რომელიც ისლამურ ქვეყნებში მასობრივი არეულობის მიზეზი გახდა, მუჰამედ წინასწარმეტყველის შესახებ ალტერნატიულ ისტორიაზეა აგებული. მუსულმანური სამყაროს წარმომადგენლები ფილმს მუჰამედისთვის შერაცხმყოფელად მიიჩნევენ და თავდასხმები აშშ-ის საელჩოებზე ამის გამო ხორციელდება.

ჟურნალისტებმა ვერც ფილმის რეჟისორს მიაკვლიეს. პირის სახელი და გვარი, რომელმაც ფილმი გადაიღო, გამოგონილი აღმოჩნდა.

"ინტერპრესნიუსი"