პირდაპირი არჩევნები რომ ტარდებოდეს, პრემიერ-მინისტრად გამოკითხულთა უმეტესობა კოალიცია "ქართული ოცნების" ლიდერს, ბიძინა ივანიშვილს აირჩევდა.
ასეთია კვლევითი ცენტრი forsa-ს მიერ ჩატარებული სოციოლოგიური გამოკითხვის შედეგი, რომლის პრეზენტაციაც დღეს, სასტუმრო "ქორთიარდ მარიოტში" გაიმართა.
შესაბამის შეკითხვაზე ბიძინა ივანიშვილს მხარი 43 პროცენტმა დაუჭირა, შემდეგ კი 33 პროცენტით მოდის ვანო მერაბიშვილი. დანარჩენი 24 პროცენტი კი აცხადებს, რომ ხმას პრემიერ-მინისტრობის ან არც ერთ კანდიდატს მისცემდა ან არა აქვს პასუხი.
გარდა ამისა, გამოკითხვის ფარგლებში დასმული იყო შეკითხვა იმასთან დაკავშირებითაც, თუ როგორ შეხვდებოდნენ რესპონდენტები საპარლამენტო არჩევნებში "ქართული ოცნების" უმრავლესობით გამარჯვებას. შეკითხვაზე 52 პროცენტი ამბობს, რომ ის ამას პოზიტიურად შეხვდება, 20 პროცენტი არჩევნებში "ქართული ოცნების" გამარჯვებისადმი უარყოფითად არის განწყობილი, 28 პროცენტი კი შეკითხვაზე პასუხისგან თავს იკავებს.
"ქართულ ოცნებასთან" მიმართებაში სოციოლოგიური გამოკითხვის ფარგლებში შეკითხვა დაისვა იმასთან დაკავშირებითაც, თუ როგორ აფასებენ მოქალაქეები ზოგადად ამ კოალიციის ჩამოყალიბებას. რესპონდენტთა 18 პროცენტი ამბობს, რომ კოალიციის ჩამოყალიბებას უარყოფითად უყურებს, 14 პროცენტი პასუხისგან თავს იკავებს, 67 პროცენტი კი "ქართული ოცნების" ჩამოყალიბებისადმი პოზიტიურად არის განწყობილი.
კვლევითი ცენტრი forsa გერმანული კომპანიაა, რომელიც 1984 წელს დაარსდა. ცენტრი სოციოლოგიურ და პოლიტიკურ კვლევებს საერთაშორისო მასშტაბით ატარებს. საქართველოში საზოგადოებრივი გამოკითხვა 17 აგვისტოდან 30 აგვისტომდე პერიოდში ჩაატარა. მის ფარგლებში 2008 რესპონდენტი პირდაპირი ინტერვიუს გზით გამოიკითხა, რესპონდენტები კი შემთხვევითი შერჩევის გზით შეირჩნენ.
