2
ივნისიდღის ზოგადი ასტროლოგიური პროგნოზი
რუსეთის სურვილია, რომ არჩევნების შემდეგ ქვეყანაში იყოს არეულობა, თუმცა, ამაზე ქართულმა საზოგადოებამ სამი დღის წინ გასცა პასუხი , - ამის შესახებ საქართველოს პრეზიდენტმა მიხეილ სააკაშვილმა ხარაგაულში, მოსახლეობასთან სიტყვით გამოსვლისას განაცხადა.
"დღეს კიდევ ერთხელ განაცხადა საქართველოს ოკუპანტმა, თუ რა სურს: რუსეთის საგარეო საქმეთა სამინისტრომ გააკეთა განცხადება, რომ მათ სურთ, არჩევნების შემდეგ საქართველოში არეულობა. იმ განცხადების საპასუხოდ, როცა ევროპელებმა თქვეს, რომ ჩვენ გვინდა, საქართველოში ჩატარდეს კარგი არჩევნები, მათ განაცხადეს: არჩევნები არ იქნება კარგი, მაგრამ მერე იქნება კარგი არეულობა. ნურას უკაცრავად, ჩვენმა ხალხმა ამას 3 დღის წინ გასცა პასუხი. ჩვენ გვექნება კარგი არჩევნები და შემდგომი აღმშენებლობა, იმიტომ, რომ ბევრია საქართველოში კიდევ ასაშენებელი. არიან ადამიანები, რომლებსაც გრძელი სია აქვს დასანგრევი ობიექტების, მაგრამ ჩვენ ხომ ვიცით, რამდენი ათწლეული ინგრეოდა ჩვენი ქვეყანა და რამდენი რაიონია, სადაც ჯერ კიდევ პროგრესი არ შესულა ოჯახებში", - აღნიშნა მიხეილ სააკაშვილმა.
მისივე თქმით, ხარაგაულში სტუმრობისას მას დოქი აჩუქეს, რომლითაც 1-ელ ოქტომბერს გამარჯვების სადღეგრძელოს შესვამს. "მე მომცეს თქვენი განთქმული კერამიკული ნაწარმი, დოქი და 1-ელ ოქტომბერს ჩვენი გამარჯვების სადღეგრძელოს ამ დოქით შევსვამ", - მიმართა პრეზიდენტმა ხარაგაულელებს.
რუსეთის საგარეო საქმეთა სამინისტრო კარლ ბილდტის მოწოდებას ქართული ოპოზიციისადმი "უცნაურად" მიიჩნევს, - რუსული მედიის ცნობით, ამის შესახებ სამინისტროს ოფიციალურმა წარმომადგენელმა ალექსანდრე ლუკაშევიჩმა განაცხადა. როგორც ლუკაშევიჩი აცხადებს, ქართული ოპოზიცია, არჩევნების შედეგებთან დაკავშირებით, ქუჩის დემონსტრაციების უშედეგობაზე კარლ ბილდტმა საქართველოში ვიზიტისას გააფრთხილა.
მისივე თქმით, კარლ ბილდტის განცხადება 1-ლი ოქტომბრის საპარლამენტო არჩევნებთან დაკავშირებით, დემოკრატიის ნორმების შესაძლო დარღვევაზე მოქალაქეების რეაქციის შეზღუდვას წარმოადგენს.
"რუსთავი 2"-ის ინფორმაციით, შვედეთის საგარეო საქმეთა მინისტრმა კარლ ბილდტმა აღნიშნული განცხადება თბილისში 5 სექტემბერს გამართულ ამბასადორიალზე გააკეთა. ტელეკომპანიის ცნობით, ბილდტმა უცნაური უწოდა საქართველოში ოპოზიციის ერთი ნაწილის განწყობას, თითქოს არჩევნების შედეგები არა საარჩევნო ყუთებთან, არამედ, არჩევნების შემდეგ ქუჩაში უნდა გადაწყდეს. "რუსთავი 2"-ის ინფორმაციით, ბილდტმა ყველა პოლიტიკურ პარტიას მოუწოდა, აღიაროს არჩევნების შედეგები.
