თურქულმა კომპანიამ იშხანის სარესტავრაციო პროექტი მოამზადა, ოშკზე კი აზომვითი სამუშაოები ჩაატარა

თურქულმა კომპანიამ "ანფორამ" იშხანის ტაძრის სარესტავრაციო პროექტი მოამზადა, ოშკზე კი, აზომვითი სამუშაოები ჩაატარა, - ამის შესახებ "ინტერპრესნიუსს" ჩუბინაშვილის სახელობის ეროვნული ცენტრის თანამშრომელმა, არქიტექტურის ისტორიკოსმა დავით ხოშტარიამ განუცხადა.

მისივე თქმით, თურქულმა სარესტავრაციო კომპანიამ იშხანის სარესტავრაციო პროექტი ბათუმის უნივერსიტეტში, 5-8 სექტემბერს გამართულ საერთაშორისო კონფერენციაზე წარდგენა, რომელიც ტაო-კლარჯეთს ეხებოდა. კონფერენციის ორგანიზატორი ხელნაწერთა ეროვნული ცენტრი იყო.

"თავად ფაქტი, რომ იშხანს მიხედავენ, ძალიან სასიხარულოა. სამუშაოს ნაწილიც კარგად არის ჩატარებული. ძალიან კარგად აზომეს. კარგად იყო გაკეთებული არქიტექტურული გრაფიკა. მაგრამ, არის საკითხები, რომელიც ქართველებს ცოტა გვაღელვებს და კითხვებს იწვევს. კერძოდ, არ არის ჩატარებული გეოლოგიური კვლევა, ფუნდამენტის კონსტრუქციული, არქეოლოგიური და სახელოვნებათმცოდნეო კვლევები. ღიად დარჩა მხატვრობის საკითხი. იშხანი მდიდარია მოხატულობით. ისინი აცხადებენ, რომ მხატვრობას არ შეეხებიან. რესტავრაციის დროს ამასაც სათანადო ყურადღება უნდა მიექცეს", - აღნიშნა დავით ხოშტარიამ.

მისივე თქმით, თურქული მხარის მიერ ასევე გამოცხადდა ტენდერი, რომელშიც გამარჯვებული კომპანია იშხანის რესტავრაციას დაიწყებს და იქ სამუშაოებს შეასრულებს. "აცხადებენ, რომ თურქული კანონმდებლობით შესაძლებელია, ზემოთ აღმნიშნული კვლევები ტენდერში გამარჯვებული კომპანიის ხარჯზე შემდეგ ჩატარდეს", - დასძინა არქიტექტურის ისტორიკოსმა.

დავით ხოშტარიამ აღნიშნა, რომ თურქული სარესტავრაციო კომპანიის წარმომადგენლები ძალიან დიდი ინტერესით ისმენენ ქართული მხარის შენიშვნებს და ჩვენთან თანამშრომლობა სურთ. იშხანის რესტავრაციისთვის თანხას მთლიანად თურქული მხარე გამოყოფს. ამ ეტაპზე პროექტის მოცულობა უცნობია. დავით ხოშტარია მიიჩნევს, რომ რესტავრაციაში ქართველი ექსპერტების არაოფიციალური მონაწილეობა ამ პროექტს ძალიან წაადგება.

მისივე თქმით, კომპანია "ანფორა" ასევე ოშკის სარესტავრაციო პროექტსაც აკეთებს. ამ მიზნით თურქი სპეციალისტები მთელი ზაფხულის განმავლობაში ოშკის აზომვით სამუშაოებს აწარმოებდნენ.

ამასთან, ხოშტარიამ დასძინა, რომ წელს ოშკი მსოფლიო ძეგლთა ფონდის ნომინაციაში დასახელდა, რაც ტაძრის მიმართ დიდ საერთაშორისო ყურადღებას ნისნავს და იქ საერთაშორისო ექსპერტები ჩავლენ. იშხანი ამ სიაში არ შედის.

გარდა ამისა, ხოშტარიას ცნობით, ქართველი სპეციალისტები თურქული მხარის მიწვევით ტაო-კლარჯეთში იმყოფებიან, რათა იქ არებული ქართული ტაძრები დაათვალიერონ.

ამასთან, საქართველოს საგარეო საქმეთა მინისტრის მოადგილის, ნინო კლანადაძის გუშინდელი განცხადებით, საქართველოსა და თურქეთს შორის ჯერ არ არის გაფორმებული ხელშეკრულება, რომელიც ორი ქვეყნის ტერიტორიაზე კულტურული ძეგლების აღდგენას ითვალისწინებს.

მისივე თქმით, არის საკითხები, რომელზეც მხარეები ვერ თანხმდებიან. კალანდაძის განცხადებით, მოლაპარაკებების კონკრეტული ჯერ უცნობია და დოკუმენტის შესახებ მას შემდეგ გახდება უცნობილი, რაც შეთანხმებას ხელის მოეწერება.

კითხვაზე, - მოხდა თუ არა რაბათის ციხის აღდგენა ამ შეთანხმების ფარგლებში, - კალანდაძემ აღნიშნა, რომ ამ ხელშეკრულების ფარგლებში რაბათის ციხის აღდგენა არ მომხდარა.

"ინტერპრესნიუსი"