19
ივნისიდღის ზოგადი ასტროლოგიური პროგნოზი
ქუთაისის საერთაშორისო აეროპორტის ასაფრენი ბილიკი პრეზიდენტმა მიხეილ სააკაშვილმა პილოტის რანგში გამოსცადა.
დავით აღმაშენებლის სახელობის აეროპორტის ასაფრენ ბილიკზე, რომლის პრეზენტაციაც დღეს გაიმართა, სატვირთო "ბოინგ 747"-ის შემდეგ პრეზიდენტის კუთვნილი "ცესნას" ტიპის თვითმფრინავი დაეშვა, რომელსაც თავად მიხეილ სააკაშვილი მართავდა.
პრეზიდენტმა თბილისიდან ქუთაისამდე ბათუმის გავლით იფრინა, რომლის დროსაც ქუთაისის აეროპორტის პრიორიტეტებზეც ისაუბრა.
როგორც მიხეილ სააკაშვილმა აღნიშნა, ახალი აეროპორტის უპირატესობა იმაში მდგომარეობს, რომ იქ დაჯდომა და აფრენა ორი მხრიდან არის შესაძლებელი. გარდა ამისა, კლიმატური პირობების გათვალისწინებით თითქმის არც ერთ სეზონზე ქუთაისში არ იცის ნისლი, რაც მნიშვნელოვანი გარემოებაა და იმ შემთხვევაში, თუ უამინდობის გამო თბილისისა და ბათუმის აეროპორტები დაიბლოკება, ქუთაისი რეისებს დაუბრკოლებლად მიიღებს.
ამასთან, პრეზიდენტის განცხადებით, ქუთაისის შემდეგ აეროპორტები საქართველოს კიდევ რამდენიმე ქალაქში აშენდება, რაც საბოლოო ჯამში საქართველოს ეკონომიკურ გეოგრაფიას მნიშვნელოვნად წაადგება.
