29
ივნისიდღის ზოგადი ასტროლოგიური პროგნოზი
ვარჯიში და სხეულის გაკაჟება ყველა ასაკში მნიშვნელოვანია. მაგრამ მშობლები სპორტის სახეობებში ბავშვების ჩართვას ხშირად ჩქარობენ. რომელი ასაკიდან ჯობს ვარჯიშის დაწყება და რა სარგებლობა მოაქვს ბავშვის ორგანიზმისთვის სპორტის ამა თუ იმ სახეობას? თქვენს კითხვებს სპორტული მედიცინის ასოციაციის ვიცე-პრეზიდენტი, ვალერი ახალკაცი პასუხობს.
გამოგზავნილი შეკითხვები:
მკითხველი თამუნა: ბავშვი 5 წლიდან დამყავს სპორტულ ტანვარჯიშზე. თითქმის ყოველ დღე ვარჯიშობს 2-3 საათის განმავლობაში, ზოგჯერ მეტი ხნითაც. მეჩვენება, რომ უკვე ძალიან გადაიღალა. ეს მხოლოდ დისკომფორტია თუ შეიძლება რამე პრობლემებთან იყოს დაკავშირებული. რას მივაქციო ყურადღება, რომ ჯანმრთელობის მხრივ რაიმე პრობლემა არ გამომეპაროს.
აუცილებლად გააკონტროლეთ ბავშვის მიერ გახარჯული დღიური კალორაჟი და მიაქციეთ ყურადღება კვების რაციონს. აუცილებლად მიმაჩნია კარდიოგრამის გადაღება, როგორც მოსვენებულ ისე დატვირთვის ფონზე, ეს შემდგომშიც გამოგადგებათ შედარებისთვის. გაიარეთ სპორტული ექიმის კონსულტაცია.
მკითხველი ხათუნა: მართალია თუ არა, რომ კარატეში ვარჯიში ბავშვის სიმაღლეში ზრდას უშლის ხელს?
არ შეესაბამება სიმართლეს.
მკითხველი მაიკო: რა ასაკიდან არის მიზანშეწონილი ბავშვის ფეხბურთზე შეყვანა?
თუ ბავშვს აქვს აზროვნება, მოედნის ხედვა, გარკვეული მონაცემები და შეუძლია შეასრულოს მწვრთნელის მიერ მიცემული დავალებები, მაშინ თქვენ შეგიძლიათ მიიყვანოთ ბავშვი 6-8 წლის ასაკში.
მკითხველი ლელა: მყავს 5 წლის ბიჭი. მინდა ცურვაზე შევიყვანო, მაგრამ ერთ-ერთი აუზის თანამშრომელმა მითხრა, რომ ამ ასაკში ნაადრევია. არადა, ლამის ჩვილობიდან ბავშვებს ცურვას აჩვევენ. თქვენ რას მირჩევთ?
გირჩევთ, უკვე შეიყვანოთ ბავშვი ცურვაზე. რა თქმა უნდა, ასაკობრივი დატვირთვის ფონზე.
მკითხველი ზურა: სპორტის რომელი სახეობას გვირჩევთ გამხდარი და სუსტი აღნაგობის ბიჭისთვის. არის 6 წლის და საკმაოდ გაუბედავია. ჭიდაობა თუ იქნება მიზანშეწონილი და რომელი ასაკიდან?
ჭიდაობაზე სიარული მიზანშეწონილია 7-9 წლის ასაკში. თქვენს შემთხვევაში გირჩევთ 1 წლის განმავლობაში ბავშვი ავარჯიშოთ აზიდვებზე, მუცლის პრესის ვარჯიშებზე და სხვა მცირე ზომის ფიზიკურ დატვირთვებზე, რათა ის ფიზიკურად მომზადებული მივიდეს ჭიდაობის სექციაში.
მკითხველი ნინო: თუ ბავშვს სპორტზე ვატარებ და ინტენსიურად ივარჯიშებს, დაზღვეული ვიქნები ხერხემლის გამრუდების პრობლემებისგან? ეს დაავადება სასკოლო ასაკის ბავშვებში ძალიან გავრცელებულია. უფრო რომელ სახეობებს მირჩევთ. გოგონა არის 8 წლის.
8 წლის გოგონასათვის გირჩევთ ცურვის ან ტანვარჯიშის სექციას. ხოლო თუ უკვე აქვს დაწყებული ხერხემლის გამრუდება, მაშინ მიაკითხეთ სპორტულ რეაბილიტოლოგს.
მკითხველი ლენა: მე-4 კლასელი ბავშვი მყავს, რომელიც ზედმეტად პუტკუნაა. ვარჯიში და სირბილი ძალიან ეზარება. იმედი მაქვს, სპორტი წონის დაკლებაშიც დაეხმარება და მეტად აქტიურსაც გახდის, თუმცა თავიდანვე დიდი დატვირთვის შემთხვევაში, შეიძლება, საერთოდ უარი თქვას სიარულზე. რომელი სექცია იქნება მისთვის უფრო შესაფერისი?
გაუკონტროლეთ თქვენს შვილს ცომეულისა და გაზიანი სასმელების დღიური ნორმა. აუცილებლად ანახეთ ბავშვი ენდოკრინოლოგს, თუ ეზარება ვარჯიში, ამ შემთხევაში გირჩევთ, უბრალოდ ისეირნოს 30-40 წუთი სტადიონზე ან პარკში.
