3
მაისიდღის ზოგადი ასტროლოგიური პროგნოზი
უკვე წლებია, დედაქალაქში უძველესმა პარკმა გასართობი ცენტრის ფუნქცია დაკარგა და თბილისელები დასვენებას უფრო თანამედროვე პარკებსა თუ სკვერებში ამჯობინებდნენ. ორიოდე თვეში, განახლებული "მუშტაიდის პარკი" პირველ დამსვენებლებს მიიღებს - ახალი კარუსელებიც დაიდგმება, აღდგება კაფე-ბარები, საბავშვო მატარებელი და ისტორიული რესტორანი "მუშტაიდი".
პარკის გენერალური მენეჯერი ირაკლი ბითაძე "ვერსიასთან" საუბარში აცხადებს, რომ "პარკში ახალი კარუსელები უკვე დამონტაჟებულია, აღდგა 2 საბავშვო კაფე, ერთი იქნება საბავშვო სანაყინე, მეორე უფროსი ასაკის ადამიანებისთვისაცაა გათვალისწინებული. მუშტაიდის ბაღში სამი კაფე იყო, მესამე ცოტა მოგვიანებით გაიხსნება. მწვანე ხის შენობა, რომელშიც რესტორანი "მუშტაიდი" იყო, მართლაც, ისტორულია. სწორედ მის შიგნით მოწყობილ სცენაზე გამოდიოდა აქტრისა მარგარიტა და აქ მიართვა ფიროსმანმა მას ვარდები. საბედნიეროდ, ამ ძეგლის პროექტი გვაქვს, რომლის თანაავტორი მე ვარ, მოქანდაკე კი ირაკლი რევაზიშვილია. ეს შენობა, აბსოლუტურად რესტავრირებული იქნება. რაც მთვარია, ის ზუსტად იმ მასალით უნდა აღდგეს, რითაც, თავის დროზე, იყო გაკეთებული, მაგრამ ეს რეაბილიტაციის მეორე ეტაპზე განხორციელდება. მიუხედავად იმისა, რომ ადრე აქ რესტორანი იყო, რესტავრაციის შემდეგ, ბავშვთა ზამთრის გასართობი ცენტრის ფუნქციას შეიძენს".
რეაბილიტაციის პროექტის მეორე ეტაპზე, ასევე სარესტავრაციო სამუშაოები ჩაუტარდება "მუშტაიდის ბაღის" ადმინისტრაციულ შენობას. ბაღში, გარდა ფისოსმანის ძეგლისა, ფრანგი მფრინავის, ჟან-ბედეს ქანდაკებაც დაიდგმება. ჟან ბედე ის მფრინავია, რომელმაც 1882 წელს საჰაერო ბუშტით მუშტაიდიდან სამი გაფრენა განახორციელა, თუმცა საჰაერო ბუშტში არავინ ჩაუჯდა, ბოლოს მემაწვნისგან ვირი იქირავა, ჩაისვა და მეტეხის მხარეს გაფრინდა. ბაღის ერთ შადრევანს მეორეც დაემატება. რეკონსტრუქცია უტარდება ღია საკონცერტო სცენას, სადაც ყოველ შაბათ-კვირას კონცერტები გაიმართება. ირაკლი ბითაძის განმარტებით, "სრულიად განახლებულია ყველა კომუნიკაცია, შეიცვალა წყალმომარაგების, სარწყავი სისტემა, ახალი სანიაღვრეები, ელექტრომომარაგება, განათების სისტემა, პარკის დიდი ნაწილი მოქანდაკებული იქნება ბეჭდური ბეტონით, გზები კი მოპირკეთებული. განსაკუთრებით აღსანიშნავია მწვანე ზოლის განახლება. 1600-მდე ახალი ხე დაირგო. 7 ახალი დეკორატიული გაზონი მოწყობის სტადიაშია; გამოიცვალა ბალახის საფარი. პარკს 30%-იანი გამწვანების ზოლი მოემატა".
განახლებულ მუშტაიდის პარკში ახალი სკამები და ურნები დაიდგმება, რაც ყველაზე მთავარია, პარკის მთელ ტერიტორიაზე უფასო "ვაიფაი" იქნება, რაც დამსვენებლებს ინტერნეტთან წვდომის საშუალებას აძლევს. კარუსელების ნაწილი განახლდა, ნაწილი კი ახალი დაიდგა, მუშტაიდის ბაღში ისევ ივლის 7 წლის წინ გაჩერებული, ყველასათვის საყვარელი საბავშვო მატარებელი, რომელიც უკვე აღდგენილია, ამჟამად კი მხოლოდ მისი სავალი გზის აღდგენა მიმდინარეობს. რაც შეეხება კარუსელებს - 36 წერტილი იქნება, რომელიც ყველა ასაკის ადამიანისთვის 3 კატეგორიადაა დაყოფილი: საბავშვო, საოჯახო და ექსტრემალური. ბაღში დაიდგმება საქართველოში დამზადებული პირველი ქართული ატრაქციონი, 24-ადგილიანი ნავი "არგო", ამ ექსტრემალურ კარუსელზე ბავშვების დაჯდომა აკრძალული იქნება. "მუშტაიდში" გადმოიტანეს, 1905 წელს ფრანგების მიერ გაკეთებული ისტორიული კარუსელი, რომელსაც სერიოზული სარესტავრაციო სამუშაოები უტარდება და განახლებულ პარკში, როგორც სამუზეუმო ექსპონატი, ისე იქნება წარმოდგენილი. ფიგურული კარუსელით სარგებლობა პატარებს მხოლოდ განსაკუთრებულ დღეებში შეეძლებათ. ასევე კეთდება აუზი, რომელშიც ძრავიანი პატარა ნავებით ბავშვები გაერთობიან. მონტაჟდება დეკორატიული, მოცეკვავე შადრევანიც. პარკში შემოსვლა, საპირფარეშოთი და წყლით სარგებლობა უფასო იქნება, ხოლო თითოეული ატრაქციონი 1-2,5 ლარი ეღირება. ირაკლი ბითაძის განმარტებით: "განახლებულ "მუშტაიდის" პარკში მხატვრები უფასოდ შემოვლენ და თავიანთ საქმიანობას განაგრძობენ, თუმცა, შესაძლოა, მათ ისევე, როგორც ევროპაში, რაღაც თანხა ყოველთვიურად გადავახდევინოთ, თუმცა ეს ჯერ გადაწყვეტილი არ არის. პარკში აიკრძალება ქაოტური ვაჭრობა, ფერად ბურთებს, ბრჭყვიალა სათამაშოებს, ნაყინსა და სხვა მსგავს პროდუქციას, ჩვენვე გავყიდით". განახლებული "მუშტაიდის პარკი" საღამოს 10-11 საათამდე იმუშავებს. პარკს ეყოლება დაცვა და როგორც პარკში, ისე ატრაქციონებზე, ასევე ყველა ცენტრალურ ადგილზე დამონტაჟებული იქნება ვიდეოთვალი.
ნინო ხარშილაძე
გაზეთი "ვერსია"
