21
ივნისიდღის ზოგადი ასტროლოგიური პროგნოზი
ჰოლივუდელი ვარსკვლავი, ამერიკელი მსახიობი რენე ზელვეგერი სიდნეის მოდის კვირეულს დაესწრო. რენეს მიღებული აქვს კინოაკადემიის ჯილდო "ოსკარი", სამი "ოქროს გლობუსი", კინომსახიობთა გილდიის სამი ჯილდო. მისი ვარსკვლავი ამშვენებს ჰოლივუდის დიდების ხეივანს. რენე ზელვეგერმა მაყურებელს თავი შეაყვარა ფილმებით: "ჯერი მაგუაერი", "ბრიჯით ჯონსის დღიური", "ცივი მთა", "ექთანი ბეტი" და სხვა. სიდნეის მოდის კვირეულზე ავსტრალიელ ტოპმოდელებთან ერთად მეც ვმონაწილეობდი. ჩვენების შემდეგ ჰოლივუდის ვარსკვლავმა შემაქო და მითხრა, პოდიუმზე თვალისმომჭრელი იყავიო. მეც ვისარგებლე რენე ზელვეგერის კეთილგანწყობით და გაზეთ "ყველა სიახლისთვის" ექსკლუზიური ინტერვიუ ჩავწერე:
- ავსტრალია ჩემი მეორე სამშობლოა. მართალია, ამერიკაში დავიბადე, მაგრამ პატარა ვიყავი, მშობლებმა ავსტრალიაში რომ ჩამომიყვანეს. აქ გავიზარდე. მე და ჩემმა ძმამ - დრიუმ სკოლა სიდნეიში დავამთავრეთ. ბავშვობიდან მიტაცებდა ცურვა და, თქვენ წარმოიდგინეთ, სიდნეიში მაშველადაც კი ვმუშაობდი. ქალაქგარეთ მაქვს დიდი სახლი, ლამაზი ბაღით. ახლა იქ ჩემი ნათესავები ცხოვრობენ და ყოველ წელს ჩამოვდივარ მათ მოსანახულებლად. ჩემს სახლთან ახლოს კარგი სათევზაო ადგილებია და დიდი სიამოვნებით ვთევზაობ ხოლმე. ვფიქრობ, ასაკში რომ შევალ, საცხოვრებლად სიდნეიში გადმოვალ და ჩემს ლამაზ სახლში მშვიდად ვიცხოვრებ, მოვუვლი ბაღს და გავაშენებ ფერმას.
- ჰოლივუდში როგორ მოხვდით?
- სკოლის დამთავრების შემდეგ ლოს-ანჯელესში გავემგზავრე და თეატრალურ კოლეჯში ჩავაბარე. თავის სარჩენად ერთ-ერთ რესტორანში მიმტანად ვმუშაობდი. მსახიობობა ჩემი ოცნება იყო. ხშირად ვმონაწილეობდი მსახიობთა შესარჩევ ტურებზე. მახსოვს, ფილმ "ჯერი მაგუაერისთვის" ასეთი ტურის შემდეგ შინ უკმაყოფილო დავბრუნდი. რეჟისორმა დასაიმედებელი ვერაფერი მითხრა და ვიფიქრე, დამიწუნეს-მეთქი. ერთ დღესაც რესტორანში კლიენტს ვემსახურებოდი - ბოკალში წითელ ღვინოს ვუსხამდი - კოლეგამ სამზარეულოდან რომ დამიყვირა, რენე, დაგირეკეს და თქვეს, ხვალ ტომ კრუზს უნდა შეხვდესო. შოკში ჩავვარდი, ბოთლი ხელიდან გამივარდა, ღვინო კლიენტს პიჯაკზე გადაესხა და რესტორნის მფლობელმა სამსახურიდან დამითხოვა. სამაგიეროდ, იმ დღეს ფილმის მთავარ როლზე დამამტკიცეს და პარტნიორობას ტომ კრუზი მიწევდა. სწორედ "ჯერი მაგუაერით" გავითქვი სახელი.
- თქვენ მიერ განსახიერებული გმირებიდან რომელიმეს ჰგავხართ?
- ბრიჯით ჯონსს (იცინის). ამ გმირთან ბევრი საერთო მაქვს: ძალიან სასაცილო ვარ, ხშირად ვხვდები კურიოზულ სიტუაციებში, ორივენი ოპტიმისტები ვართ, ფარ-ხმალს არასდროს ვყრით. ამ ფილმში პარტნიორობას მიწევდნენ უნიჭიერესი მსახიობები კოლინ ფერტი და ჰიუ გრანტი. მათთან მუშაობა ძალიან სასიამოვნო იყო.
- იქნებ თავს გადახდენილი რომელიმე სახალისო ამბავი გაიხსენოთ.
- ყველაზე სახალისო ამბავი უკავშირდება 2000 წლის "ოქროს გლობუსის" დაჯილდოების ცერემონიას. მახსოვს, მოულოდნელად საშინლად ამტკივდა მუცელი და საპირფარეშოში გავვარდი. ამასობაში გამოუცხადებიათ, რომ დავჯილდოვდი "ოქროს გლობუსით" ფილმისთვის "ექთანი ბეტი" და ვერსად მოიპოვეს, პრიზი რომ გადმოეცათ. ჩემი მეგობარი მიხვდა, სადაც ვიქნებოდი, საპირფარეშოში მომადგა, კარზე მიკაკუნებდა და ყვიროდა, - გილოცავ, "ოქროს გლობუსით" დაგაჯილდოესო. აი, ასე - პირველი მილოცვა საპირფარეშოში მივიღე (იცინის).
- ფორმის შესანარჩუნებლად დიეტას იცავთ ხოლმე?
- სიმართლე გითხრათ, ძალიან მიჭირს დიეტის დაცვა. მიყვარს ტკბილეული, უშოკოლადოდ დიდხანს ვერ ვძლებ. როცა რაიმე პრობლემის გამო ვღელავ, წონას ვიმატებ, რადგან ტკბილეულს ვეძალები.
საერთოდ კი, ვცურავ, დავრბივარ, ვთამაშობ ჩოგბურთს, ბავშვობაში ჩემი ძმის მეგობრებთან ერთად ფეხბურთსაც კი ვთამაშობდი და საკმაოდ კარგი თავდამსხმელიც ვიყავი. ბიჭებმა "ზელე" შემარქვეს და ეს მეტსახელი დღემდე შემომრჩა. თავისუფალ დროს მიყვარს გაზეთების კითხვა, დილაობით ფორთოხლის წვენს მივირთმევ და ახალ ამბებს ვეცნობი.
- რას ეტყვით ქართველ მკითხველს?
- საქართველოს შორიდან ვიცნობ. რამდენიმე წლის წინ ჩემი მეგობარი იყო სტუმრად ჩასული თქვენს სამშობლოში და აღაფრთოვანა ქართულმა სტუმართმოყვარეობამ. მითხრა, საქართველოში გულისხმიერი და კეთილი ხალხი ცხოვრობსო. ქართველ ხალხს ვუსურვებ, ყოველთვის მისაბაძნი ყოფილიყვნენ და უცხოელ სტუმრებსაც მუდამ მიუხაროდეთ საქართველოში!
სპეციალურად "ყველა სიახლისათვის" ავსტრალიიდან
თათული ბართაია
ყოველკვირეული გაზეთი "ყველა სიახლე"
(გამოდის ოთხშაბათობით)
