კონტროლის პალატის პარტიების ფინანსური მონიტორინგის სამსახურს ისეთი კითხვები არ დაუსვამს, რომელიც მის კომპეტენციაში არ შედის, - ამის შესახებ ჟურნალისტებს "ქართული ოცნების" წარმომადგენლმა არჩილ კბილაშვილმა კონტროლის პალატიდან გამოსვლის შემდეგ განუცხადა .
მისი განმარტებით, საკითხი ქირავნობის თემატიკას ეხებოდა. "ასეთი გადაცდენა არ შემინიშნავს", - აღნიშნა კბილაშვილმა, რომელიც გურამ ბერძენიშვილის ადვოკატი იყო. ბერძენიშვილმა "ქართულ ოცნებას" საკუთარი ფართი ოფისისთვის მიაქირავა, დღეს კი კონტროლის პალატაში გასაუბრებაზე დაიბარეს.
როგორც კბილაშვილი აცხადებს, კონტროლის პალატა აწარმოებს ოფისის გაქირავებასთან დაკავშირებით გამოკითხვას. მათ აინტერსებთ როდის, რა ვითარებაში მიიღო ოფისის გაქირავების გადაწყვეტილება გურამ ბერძენიშვილმა. ასევე, აინტერესებდათ, იცოდა თუ არა მან, რომ ოფისს პოლიტიკურ პარტიაზე აქირავებდა. გამოკითხვა 4 საათს გაგრძელდა.
"კონტროლის პალატაში ამბობენ, რომ იკვლევენ, არსებობს თუ არა დარღვევა პოლიტიკური სუბიექტის ანგარიშსწორებასთან დაკავშირებით", - განაცხადა კბილაშვილმა. მისივე თქმით, მას აქვს უფლება, გაეცნოს ყველა მასალას და ამიტომ ხვალ მიმართავს კონტროლის პალატას, რათა საშუალება მისცენ გაეცნოს ინფორმაციას, რა გახდა ადმინისტრაციული საქმის წარმოების დაწყების საფუძველი.