როგორ მოვუაროთ სახის კანს - ეს პროცედურები ყველა ქალმა უნდა იცოდეს

იმისთვის, რომ სახის კანი იდეალურ ფორმაში იყოს, დღის განმავლობაში ეტაპობრივ მოვლას საჭიროებს.

დილის პროცედურები

დილით სხეულთან ერთად სახის კანიც უნდა გამოფხიზლდეს. ამის საუკეთესო საშუალებაა ვარჯიში. დადექით სარკესთან და გააკეთეთ რამდენიმე მიმიკური ვარჯიში. კარგი იქნება ამის შემდეგ გრილ შხაპს თუ მიიღებთ.

შემდეგ ჯერი პირის დაბანაზე დგება. ყოველ დილით აუცილებელია პირის სწორად დაბანა, რადგან ღამით სახის კანი სუნთქავს და ცხიმს გამოყოფს. კარგია თუ დილით სახეს მინერალური წყლით დაიბანთ. თუ ამის საშუალება არ გაქვთ, მაშინ დამდგარი ონკანის წყალი გამოიყენეთ.

სახის კანის სხვადასხვა ტიპს სხვადასხვაგვარად დაბანა სჭირდება. თუ თქვენ ცხიმიანი კანი გაქვთ, მაშინ წყალში ლიმონის ან ვაშლის წვენი დაამატეთ. ისინი შავი წერტილების ამოყვანაში დაგეხმარებათ. ცხიმიანი კანისთვის რეკომენდირებულია გვირილის ნაყენის გამოყენებაც.

თუ ჩვეულებრივი ან მშრალი კანი გაქვთ, მაშინ საპონი დაივიწყეთ! ასეთ კანს უბრალოდ შესაბამისი ლოსიონით დამუშავება უხდება. კარგი იქნება, თუ პირს ოთახის ტემპერატურაზე ოდნავ გრილი წყლით დაიბანთ.

შემდეგი ნაბიჯი სახის კანის ტონიზირებაა. ამისთვის გამოიყენეთ საშუალება, რომელიც დაბანის შემდეგ კანის ზედაპირზე არსებულ ნარჩენებს მოგაშორებთ და ამასთან, შეკრავს ფორებს.

გარდა ამისა, მატონიზირებელი საშუალებები კანს ამსუბუქებს. ტონიკის ნაცვლად შესაძლოა ბალახეულის, მაგალითად ჭინჭრისა და არყის ნაყენი გამოიყენოთ.

ამ ყველაფრის შემდეგ სახის დატენიანებისა და დაცვის დრო დგება. დასატენიანებელი საშუალებები სახის მოვლაში განსაკუთრებულ როლს ასრულებს. კრემი სახის კანის ფარის როლს ასრულებს და ცხიმის გამოყოფას უშლის ხელს. ერთდროულად ისინი კანს იცავენ ბაქტერიებისგან, ულტრაიისფერი სხივებისა და გარემოს მავნე ზემოქმედებისგან.

კრემის წასმა აუცილებელია მაკიაჟის გაკეთებამდე. გარდა ამისა, აუცილებელია ყოველ სეზონზე შესაბამისი პერიოდისთვის განკუთვნილი კოსმეტიკური საშუალებები გამოიყენოთ.

საღამოს მაკიაჟი

სპეციალური გამწმენდი საშუალებით უნდა მოიშოროთ, გამწმენდი საშუალება შეარჩიეთ თქვენი კანის ტიპის მიხედვით.

ღამის პროცედურები

საღამოს სახე წყლით ჩამოიბანეთ და წაისვით ღამის კრემი. ღამის კრემი სახის კანს მთელი ღამის განმავლობაში მოდუნებასა და გამოკვებაში ეხმარება. მკვებავის წასმა რეკომენდირებულია 25 წელს გადაცილებული ქალბატონებისთვის, რადგან სახის კანი სწორედ ამ ასაკიდან საჭიროებს განსაკუთრებულ მოვლას.

დღისა და ღამის კრემები ერთი და იგივე ფირმის უნდა იყოს. კრემები ცვალეთ 2-3 თვეში ერთხელ. რაც შეეხება ნიღბებს, ისინი სახის კანის ტიპის მიხედვით, კვირაში ერთხელ ან ორჯერ უნდა გამოიყენოთ.

ეს პროცედურები აუცილებელია ყოველ დღე გაიმეოროთ, რათა თქვენი სახის კანი იდეალურ ფორმაში იყოს. ისინი მხოლოდ 5-10 წუთს წაგართმევთ.

სახის კანზე ძალიან დიდ გავლენას ახდენს კვების რაციონიც. ვინაიდან ზაფხული მოდის, მოერიდეთ მაღალკალორიულ საკვებს. მიირთვით ბევრი ხილი და ბოსტნეული. ხორცი ჩაანაცვლეთ თევზით. შაქარი კი თაფლით.