24
ივნისიდღის ზოგადი ასტროლოგიური პროგნოზი
"ახალი მემარჯვენეები" მზად არიან, პარლამენტში მხარი დაუჭირონ ისევ 150 დეპუტატის დატოვებას, მხოლოდ იმ პირობით, რომ ეს არ მოხდება პროპორციულის შემცირებისა და მაჟორიტარულის გაზრდის ხარჯზე.
ამის შესახებ "ინტერპრესნიუსს" პარტიის ერთ-ერთმა ლიდერმა ფიქრია ჩიხრაძემ განუცხადა. მისი თქმით, მიუხედავად იმისა, რომ ყველას ხელს აძლევს პარლამენტში მაჟორიტარი არ აღემატებოდეს პროპორციულს, ბევრმა ოპოზიციურმა პარტიამ ამ თემაზე სერიოზული სპეკულირება გადაწყვიტა და მედიასივრცე პოპულისტური გამოსვლებით "აიკლო".
"სამწუხაროდ, 150-ის ფარგლებში ხელისუფლება არ თმობდა მაჟორიტარების რაოდენობას, მათ პირიქით, 75-დან 83-მდე გაზარდეს ეს რაოდენობა და დღეს, როდესაც ასეთი პოპულისტური გნიასი ატყდა რიგი ოპოზიციური ძალების მხრიდან, რომლებმაც გულში ძალიან კარგად იციან, რამდენად საჭირო იყო ეს ოპოზიციისთვის, ხელისუფლებამ ისარგებლა ამ შემთხვევით და მათ რაოდენობის გადასინჯვაზე დაიწყო საუბარი", - აღნიშნა ჩიხრაძემ.
მისი მტკიცებით, სწორედ ასეთი ტიპის ცვლილებისას შეიძლებოდა შექმნილიყო საფუძველი მრავალპარტიული ბალანსისთვის. "ახალი მემარჯვენეები" მზად ვართ, მხარი დავუჭიროთ ისევ 150 დეპუტატის დატოვებას, ოღონდ კატეგორიულად დავაყენებთ პირობას, რომ ეს არ მოხდება პროპორციულის შემცირებისა და მაჟორიტარულის გაზრდის ხარჯზე", - განაცხადა ფიქრია ჩიხრაძემ.
