20
ივნისიდღის ზოგადი ასტროლოგიური პროგნოზი
რუსი პოეტი და მწერალი ალექსანდრე პუშკინი მსოფლიო ლიტერატურის კლასიკოსად არის აღიარებული და ახალი რუსული ლიტერატურის ფუძემდებლად მიიჩნევა. მიუხედავად იმისა, რომ მას დიდ რუს პოეტს უწოდებენ, არანაკლებ პოპულარული და ფასეულია მისი პროზაული ნაწარმოებები და მისი მოთხრობები, რომლებზეც თაობები გაიზარდნენ.
ალექსანდრე პუშკინი 1799 წლის 6 ივნისს დაიბადა მოსკოვში. მამამისი, გაღარიბებული აზნაური სერგეი პუშკინი ძველი წარჩინებული საგვარეულოს წარმომადგენელი იყო; დედა - პეტრე I აღზრდილის, აბრამ ჰანიბალის შვილიშვილი.
პუშკინი ბავშვობიდან ლიტერატურულ გარემოში იზრდებოდა. მამამისი ლიტერატურის დამფასებელი იყო, დიდი ბიბლიოთეკა ჰქონდა. ბიძა კი პოეტი იყო. პუშკინის ოჯახში იმ დროის მაღალი საზოგადოება დადიოდა.
1811 წლიდან ცარსკოე სელოს ლიცეუმში დაიწყო სწავლა, რამაც დიდი როლი შეასრულა პუშკინის პიროვნებად ჩამოყალიბებაში. ლიცეუმის მეგობრები სამუდამოდ მის ერთგულ მეგობრებად დარჩნენ. ლიცეუმშივე დაიწყო ლექსების წერა, პირველი ლექსი 1814 წელს გამოაქვეყნა.
1817 წელს პეტერბურგში გადავიდა და საგარეო საქმეთა კოლეგიაში დაიწყო მსახური. ელიტურ საზოგადეობაში ტრიალებდა, ლიტერატურულ გარემოში, მეჯლისებს, თეატრებს სტუმრობდა. 1820 წელს დაასრულა პოემა "რუსლან და ლუდმილა" - პირველი დიდი ნაწარმოები.
მეტისმეტად თავისუფალი ეპიგრამებისთვის, რომლებიც ხელნაწერებად ვრცელდებოდა, 1820 წელს სამხრეთში გადაასახლეს. ცხოვრობდა ეკატერინოსლავში, კიშინიოვში, ოდესაში. ამ მოგზაურობების დროს ეწვია საქართველოსაც, რომელმაც მასზე დიდი შთაბეჭდილება მოახდინა. იმ პერიოდში დაწერა რომანტიკული სამხრეთული პოემები "კავკასიელი ტყვე", "ძმები ყაჩაღები" და სხვები. მართალია, კრიტიკამ მისი სტილი "მდაბიურად" მიიჩნია, მკითხველი აღტაცებით შეხვდა და მოგვიანებით იგი ახალი რუსული ენის ფუძემდებლადაც მიიჩნიეს.
1823 წელს დაიწყო მუშაობა რომან-პოემაზე "ევგენი ონეგინი". 1824 წელს ჩრდილოეთში გადაასახლეს, მშობლების მამულში - მიხაილოვსკოეში. იქვე შეიტყო დეკაბრისტების აჯანყების შესახებ, რომელშიც პოეტის ბევრი მეგობარი მონაწილეობდა და მოგვიანებით ისინი სიკვდილით დასაჯეს. ამ ფაქტმა მასზე დიდი გავლენა მოახდინა. ორ წელიწადში ნიკოლოზ I გამოიძახა მოსკოვში და მფარველობა აღუთქვა. თუმცა მეფის მიერ მინიჭებული თავისუფლება მცირეხნიანი აღმოჩნდა - 1828 წლიდან მას მუდმივი მეთვალყურეობა მიუჩინეს, როგორც დეკაბრისტების მეგობარს.
1830 წელს ნატალია გონჩაროვაზე დაინიშნა, რომელზეც ერთ წელიწადში იქორწინა. 1837 წლის 8 თებერვალს თავისი ცოლის თაყვანისმცემელ ოფიცერ დანტესთან დუელში სასიკვდილოდ დაიჭრა და ორ დღეში გარდაიცვალა.
მიუხედავად არც ისე ხანგრძლივი ცხოვრებისა, პუშკინმა მდიდარი ლიტერატურული მემკვიდრეობა დატოვა. მისი პოემები, ლექსები, მოთხრობები თუ ზღაპრები მთელ მსოფლიოშია ცნობილი.
ჟურნალი "რეიტინგი"
(გამოდის ორშაბათობით)
_2019-10-07_pcZAK5dDPSlBIBs.jpg)
