29
ივნისიდღის ზოგადი ასტროლოგიური პროგნოზი
მსოფლიოს ნომერ პირველ ტორორისტად აღიარებული ოსამა ბინ ლადენი ლიკვიდირებულია.
დღეს ცნობილი გახდა, რომ ამერიკელმა სამხედროებმა მისი განადგურების სპეცოპერაცია ისლამაბადის მახლობლად დაახლოებით ერთი კვირის წინ განახორციელეს.
ბინ ლადენის ლიკვიდაციის შესახებ სპეციალური განცხადება თავად აშშ-ის პრეზიდენტმა, ბარაქ ობამამ გააკეთა.
"ამერიკის შეერთებულმა შტატებმა განახორციელა ოპერაცია, განადგურებულია ოსამა ბინ ლადენი, რომელსაც ეკისრებოდა პასუხისმგებლობა ათასობით უდანაშაულო ადამიანის, მათ შორი ბავშვების დაღუპვაზე. დაახლოებით ერთი კვირის წინ მე გადავწყვიტე, რომ საკმარისი სადაზვერვო მონაცემები გვქონდა, რის შემდეგაც მივეცი თანხმობა ოპერაციის ჩატარებაზე. ჩემი ხელმძღვანელობით პაკისტანის ქალაქ ისლამაბადთან ჩატარდა ოპერაცია, რომლის დროსაც ამერიკელმა სამხედროებმა გაუგონარი მამაცობა გამოავლინეს, ლიკვიდირებულია ოსამა ბინ ლადენი, მოპოვებულია ცხედარიც", - განაცხადა ობამამ.
ოსამა ბინ ლადენთან ერთად, მისი ერთ-ერთი ვაჟიც დაიღუპა. ამის შესახებ ინფორმაციას სააგენტო "ფრანს-პრესი" აშშ-ს ადმინისტრაციაზე დაყრდნობით ავრცელებს.
დაღუპული შვილის სახელი არ სახელდება. სააგენტო წერს, რომ ბინ ლადენს 19 შვილი ჰყავდა. სააგენტოს წყაროს ინფორმაციით, მამა-შვილთან ერთად, ორი კურიერი და ერთი ქალბატონიც დაიღუპა.
"ლენტა.რუ" წერს, რომ ბინ ლადენის სალიკვიდაციო სპეცოპერაცია პაკისტანის ქალაქ აბოტაბადში ჩატარდა. "ასოშეიტედ პრესი" იუწყება, რომ შენობა, სადაც ბინ ლადენი იმალებოდა, ოთხმეტრიანი ბარიერით იყო შემოღობილი.
"იტარ-ტასის" ინფორმაციით, ოპერაციის დაწყებამდე პაკისტანის ხელისუფლებამ ამერიკელ სამხედროებს ქვეყნის საჰაერო სივრცის გამოყენების ნებართვა მისცა.
ოსამა ბინ ლადენი ტერორისტული დაჯგუფება "ალ ქაიდას" მეთაური იყო. მის სახელს უკავშირდება ამერიკის ისტორიაში ყველაზე საშინელი ფაქტი - 2001 წლის 11 სექტემბრის ტერაქტი.
ამერიკის შეერთებული შტატების პრეზიდენტმა მიმართა ამ ტერაქტის დროს დაღუპულთა ოჯახებსაც. "ჩვენ ყოველთვის გვახსოვდა, რა მოხდა 11 სექტემბერს",- აღნიშნა ბარაქ ობამამ.
იხილეთ ვიდეო
