ბოლო დროს აბორტების რაოდენობა 14-15 წლის გოგონებში გახშირდა. ამის მიზეზად სექსუალური აღზრდის არარსებობას ასახელებენ. მედიკოსების აზრით, სკოლებში სექსუალური განათლების კურსის შემოღება აუცილებელია, ეს მოზარდს სამომავლო რისკებს თავიდან ააცილებს. რა დადებითი ან უარყოფითი მხარეები აქვს სექსუალურ აღზრდას, კითხვებზე პასუხს ი. ჟორდანიას სახ. ადამიანის რეპროდუქციის სამეცნიერო კვლევითი ინსტიტუტის დირექტორი, პროფესორი არჩილ ხომასურიძე პასუხობს.
გამოგზავნილი შეკითხვები:
მკითხველი თათა: საქართველოში გეგულებათ თუ არა სპეციალისტები, რომლებიც სათანადოდ ადაპტირებულ სახელმძღვანელოს შექმნიან?
ცოტაა, მაგრამ ნამდვილად არიან სპეციალისტები, რომლებსაც შეუძლიათ არა მარტო ადაპტირებული, არამედ დამოუკიდებელი სახელმძღვანელოს შექმნა.
მკითხველი თეონა: რამდენად გამოგვადგება საზღვარგარეთის გამოცდილება სახელმძღვანელოებთან და პედაგოგებთან დაკავშირებით?
სქესობრივი აღზრდის სისტემის ჩამოყალიბების პროცესში დასავლეთის გამოცდილების გამოყენება აბსოლუტურად აუცილებელია. ასევე აუცილებელია ამ გამოცდილების ადაპტირება მოხდეს ჩვენი ქვეყნის რელიგიურ, ეთიკურ პრინციპებთან და ტრადიციებთან.
მკითხველი ალიკა: თქვენი აზრით, რა ასაკიდან უნდა მიიღოს ბავშვმა სექსუალური განათლება?
ევროპის განვითარებულ ქვეყნებში სქესობრივი განათლება 9-10 წლის ასაკიდან იწყება. ჩვენთან სქესობრივი აღზრდის დანერგვა უნდა დაიწყოს მე 5-6 კურსის მედიკოს სტუდენტებში და უნდა განხორციელდეს ეტაპობრივ, ასაკობრივად ზემოდან ქვემოთ, პედაგოგებისა და მედიკოსების მიერ.
მითხველი სოფო: საზღვარგარეთის ქვეყნებში თუ არსებობს პრეცედენტი, რომ სკოლაში სექსუალურ განათლებას ნეგატიური შედეგი მოეტანოს?
მე არ გამიგია
მკითხველი დოდო:
როგორ ფიქრობთ, გაკვეთილებმა ერთგვარი უხერხულობა რომ არ გამოიწვიოს მსგავი გაკვეთილები გოგოებისთვის ცალკე და ვაჟებისთვის ცალკე ხომ არ უნდა ტარდებოდეს?ჩემის აზრით, სქესობრივი აღზრდის სისტემის დანერგვისას, ერთი ეტაპი უნდა დაეთმოს გოგონებსა და ბიჭებს ცალ-ცალკე, ხოლო შემდგომი უნდა დაეთმოს ერთად ჩატარებას.
მკითხველი ლაშა: მოზარდებში გახშირებული აბორტები მხოლოდ სექსუალური გაუნათლებლობის ბრალია?
არა მარტო მაგის. ძირითადი მიზეზი მსოფლიოში სქესობრივი მომწიფების აქსელერაციაა (აჩქარება).
მკითხველი ლიკა: როგორია საზღვარგარეთის პრაქტიკა ამ საკითხში? იქ რა ასაკიდან იღებენ მოზარდები სექსუალურ განათლებას?
ევროპის განვითარებულ ქვეყნებს (დანია, ჰოლანდია, ბელგია, საფრანგეთი, გერმანია და სხვა ) მრავალწლიანი გამოცდილება აქვთ. იქ სქესობრივ აღზრდას 9-10 წლის ასაკიდან იწყებენ.
მკითხველი მაია: რომელ ქვეყნებში იღებენ მოსწავლეები სექსუალურ განათლებას?
ძირითადად, ეს არის ევროპისა და ჩრდილოეთ ამერიკის განვითარებული ქვეყნები.
მკითხველი ირმა: ბევრი, სკოლებში სექსუალური განათლების დანერგვას, მორალური თუ რელიგიური მიზეზით ეწინააღმდეგება. როგორ ფიქრობთ, შესაძლებელია ამგვარ პროცესში ეკლესიის წარმომადგენლების რაიმე ფორმით ჩართვა? ან უნდა ჩართონ თუ არა ისინი ამ საკითხის გადაწყვეტაში?
უნდა ჩაერთონ და კარგი იქნება, თუ დათანხმდებიან მონაწილეობაზე. ეკლესია ხომ ჩვენი სულიერი აღზრდის მთავარი ბერკეტია.
მკითხველი ანა: რა რისკები შეიძლება ჰქონდეს სექსუალურ გაუნათლებლობას?
ძირითადად ახასიათებს სქესობრივი მოშლილობანი (იმპოტენცია, ჰიპოპოტენცია, ანორგაზმია, ლიბიდოს უქონლობა და სხვა), რასაც ხშირად თან ახლავს რეპროდუქციული დარღვევები.