28
ივნისიდღის ზოგადი ასტროლოგიური პროგნოზი
მსოფლიოში ერთ-ერთი უმსხვილესი გადამზიდავი საერთაშორისო კომპანია Maersk-ი საქართველოში არაერთ კომპანიას უწევს სატრანსპორტო მომსახურებას.
ბოლო დროს გავრცელებული ინფორმაციით, შექმნილი შიდა დაძაბულობის გამო, ეგვიპტეში შეფერხდა საპორტო ტერმინალის მუშაობა და ამიტომ ტვირთები გვიან ჩამოდის. თუმცა კომპანიის მენეჯერი საქართველოში ნიკოლოზ გოგოლი კატეგორიულად აცხადებს, რომ Maersk-ს ამ დროისთვის შეფერხება აღარ აქვს და სრული დატვირთვით მუშაობს.
ლევან ფანჯიკიძე (ერთ-ერთი იმპორტიორი კომპანიის ლოჯისტიკის მენეჯერი): - კომპანია Maersk-ის ხელმძღვანელობას მოსალოდნელი დაგვიანების შესახებ პარტნიორი კომპანიები არც კი გაუფრთხილებია. ჩვენ უნდა გვცოდნოდა, რომ ტვირთს ფოთის პორტში აგვიანდებოდა და თადარიგს დავიჭერდით, ალტერნატიულ კომპანიას ვიპოვიდით და საქონელს თუნდაც სახმელეთო გზით შემოვიტანდით... ერთ თვეზე მეტია ამ ტვირთს ველოდებით, არადა, როგორც კი ეგვიპტეში რევოლუცია დაიწყო, მივხვდით, რომ პრობლემა შეგვექმნებოდა. თუმცა ვფიქრობდით, რომ საერთაშორისო კომპანია შეფერხებას არ შეგვიქმნიდა და გემებს სხვა პორტში შეიყვანდა.
ამ დროს კი ეგვიპტის პორტი დაიკეტა, უფრო სწორად, Maersk-ის გემების ნაწილი საიდის პორტში შემოვიდა, დანარჩენი კი მიმდებარე ტერიტორიაზე გაჩერდნენ. ახლა გვეუბნებიან, რომ საერთაშორისო კომპანიამ გემები ესპანეთში გადაგზავნა, საიდანაც ისინი ევროპაში უნდა შემოსულიყვნენ, თუმცა ზუსტ ინფორმაციას ვერ გვაწვდიან, როდის შემოვა ჩვენი ტრაილერი ფოთის პორტში... გასაგებია, რომ Maersk-ი ფორსმაჟორულ სიტუაციაში აღმოჩნდა, მაგრამ ჩვენც გამოუვალი ვითარება გვაქვს. უკმაყოფილობას გამოთქვამენ ის საწარმოები, ვისთვისაც ნედლეული უნდა მიგვეწოდებინა და სავსებით სამართლიანადაც. საქმეს ართულებს ისიც, რომ მარაგიც ცოტა გვაქვს.
- შეფერხებები ადრეც ყოფილა?
- ეს კომპანია ადრე ხარისხიან სერვისთან ასოცირდებოდა, მაგრამ ბოლო დროს მათი დამოკიდებულება შეიცვალა, - პასუხისმგებლობას გაურბიან და თავს იმართლებენ, ფორსმაჟორი შეგვექმნაო, კლიენტების ზარალზე კი არ ფიქრობენ... შარშან ზაფხულში ერთ-ერთ გემზე, სადაც ჩვენი საქონელი იყო, ხანძარი გაჩნდა. მართალია, ტვირთი დაზიანებას გადაურჩა, მაგრამ გემი ინდოეთის ოკეანიდან მალაიზიის პორტში მიაბრუნეს, სადაც საქონელი სხვა გემზე გადატვირთეს. საბოლოოდ, ტვირთი საქართველოში ერთი თვის დაგვიანებით შემოვიდა. თან ეს ყველაფერი ჩვენს გაუფრთხილებლად გაკეთდა... კომპენსაციის ან ბოდიშის ნაცვლად კომპანიამ ე.წ. "ევერიჯ ბონდი"- გადასახადი ტვირთვის გადარჩენისთვის - გამოგვიწერა და ტვირთის მთლიანი ღირებულების 10%-ის გადახდა დაგვაკისრა, რაც მთლიანობაში 10 ათას დოლარს შეადგენდა.
თინა ადამია (კომპანია "კავკასტრანსექპრესის"მენეჯერი): "Maersk-ი ერთადერთი კომპანია არ არის, რომელიც ტვირთების შემოტანას აგვიანებს. ყველა საზღვაო კომპანია ასე იქცევა და მათ ხელშეკრულების პირობებშიც უწერიათ, რომ ტვირთი შესაძლოა დანიშნულ ადგილას ზუსტად განსაზღვრულ ვადებში ვერ ჩამოიტანონ. ანუ არც ერთი მათგანი არ იძლევა გარანტიას... საბედნიეროდ, ეს სისტემატური არ არის, მაგრამ ზოგჯერ ასეც ხდება. ჩვენ არა მხოლოდ ერთ, არამედ ყველა საზღვაო კომპანიასთან გვექმნება პრობლემები. უბრალოდ ახლა გაგვიმართლა და ამ საერთაშორისო კომპანიისთვის მცირე ტვირთი გვქონდა შეკვეთილი...
ყველაფრის მიუხედავად, კლიენტებთან პრობლემები გვექმნება. გვირეკავენ და გვეჩხუბებიან, რომ საქმეს ვუფუჭებთ. ვცდილობთ ახსნას, მაგრამ კლიენტს მიზეზი არასოდეს აინტერესებს. თანხას იმიტომ იხდის, რომ ტვირთი შეუფერხებელად მიეწოდოს... როცა კომპანიის ხელმძღვანელობას ვუკავშირდებით, გვეუბნებიან, რომ საიტზე მითითებული ინფორმაციის გარდა, არაფერი იციან. ბოლო ინფორმაციით გვაცნობეს, რომ ამ კომპანიის გემები ფოთში 14 და 18 მარტს შემოვა. რაც შეეხება, ზარალის კომპენსაციას, ეს მხოლოდ მაშინ ხდება, როცა ტერმინალიდან ტვირთი დაზიანებული ჩამოდის~.
როცა საქართველოში ტვირთების დაგვიანებასთან დაკავშირებით კომპანია Maersk-ის ფოთის სააგენტოს მენეჯერ ნიკოლოზ გოგოლს დავუკავშირდით, მან გაოცება გამოთქვა.
ნიკოლოზ გოგოლი: - ეგვიპტეში მომხდარი რევოლუციის გამო კომპანიას მართლაც შეექმნა პრობლემები, მაგრამ მაშინვე გამოსწორდა და ბოლო ტვირთი ფოთში 6 მარტს შემოვიდა.
- როგორც ჩვენთვის ცნობილია, ეგვიპტეში შექმნილი პრობლემების გამო რამდენიმე გემი ესპანეთში შევიდა.
- ეგვიპტეში შექმნილი პოლიტიკური პრობლემების გამო შეფერხებები გვქონდა, ტერმინალები არ მუშაობდნენ, მაგრამ ამით ჩვენი პარტნიორი კომპანიები არ დაზარალებულან, ვინაიდან მაშინვე გამოსწორდა და ამ ეტაპზე არანაირი შეფერხება არ გვაქვს... ნამდვილად არ ვიცი, კონკრეტულად რომელ კომპანიებს შეექმნათ პრობლემები ტვირთის დაგვიანების გამო. ამისთვის საჭიროა, ზუსტად ვიცოდე მათი კონტეინერის ნომერი და მიზეზსაც გავარკვევთ.
ლალი პაპასკირი
"ეკოპალიტრა"
