6
ივნისიდღის ზოგადი ასტროლოგიური პროგნოზი
"ნაციონალურმა მოძრაობამ" საარჩევნო კანონმდებლობასთან მიმართებაში რამდენიმე წინადადება წარმოადგინა. წინადადებები დღევანდელ ბრიფინგზე გახდა ცნობილი.
როგორც პარლამენტის იურიდიული კომიტეტის თავმჯდომარემ, პავლე კუბალშვილმა ბრიფინგზე განაცხადა, მმართველი გუნდი მზად არის, საპილოტე პროგრამის სახით გააკეთოს თბილისში ბიომეტრული სიები, თუმცა იმ შემთხვევაში, თუ თანხას დონორები გამოყოფენ.
გარდა ამისა, კუბლაშვილის განცხადებით, მმართველი გუნდი მზად არის, საარჩევნო კანონმდებლობაში აღადგინოს ნორმა, რომლის მიხედვითაც, დამოუკიდებელ კანდიდატს, იმის მიუხედავად, აქვს თუ არა რომელიმე პარტიული კუთვნილება, შეეძლოს არჩევნებში მონაწილეობა.
კიდევ ერთი წინადადება, რასაც "ნაციონალური მოძრაობა" საარჩევნო გარემოს გაუმჯობესებაზე მომუშავე ჯგუფის წევრებს წარუდგენს, არის ის, რომ არაგანზრახ დანაშაულისთვის მსჯავრდებულ პირებს, რომლებსაც სამ წლამდე სასჯელი აქვთ მისჯილი, ხმის მიცემის უფლება მიენიჭოთ.
"ამომრჩეველთა სიები საერთაშორისო მისიების შეფასებით დახვეწილია და ხარვეზები თითქმის გამორიცხულია. თუმცა, ჩვენ მზად ვართ, საპილოტე პროგრამის სახით, თბილისის მასშტაბით, გავაკეთოთ ბიომეტრული სიები, თუ თანხას დონორები გამოყოფენ. ასევე, მზად ვართ, გავაგრძელოთ კონსულტაციები სხვა მნიშვნელოვან წინადადებებთან დაკავშირებითაც", - განაცხადა კუბლაშვილმა.
მისივე თქმით, ეს წინადადებები ხელს შეუწყობს საარჩევნო კანონმდებლობის დახვეწას.
"ნაციონალურ მოძრაობას" კიდევ აქვს სხვა წინადებები საარჩევნო გარემოს გაუმჯობესებაზე მომუშავე ჯგუფის წარმომადგენლებისათვის, თუმცა, როგორც კუბლაშვილმა განაცხადა, ეს წინადადებები უშუალოდ ჯგუფის შეხვედრაზე, ცენტრალურ საარჩევნო კომისიაში დღეს დასახელდება.
