გუშინ, ცნობილი გახდა, რომ საქართველოს კულტურის სამინისტრომ მოულოდნელად გაათავისუფლა ვასო აბაშიძის სახელობის მუსიკისა და დრამის თეატრის სამხატვრო ხელმძღვანელი, დავით დოიაშვილი. სამინისტროს განცხადებით, აღნიშნული გადაწყვეტილება თეატრში შემოქმედებითი პროცესის ხანგრძლივი შეფერხებით არის განპირობებული, მიუხედავად სახელმწიფო ბიუჯეტიდან უწყვეტი დაფინანსებისა.
უწყება ხაზს უსვამს, რომ სახელმწიფო თეატრი ანგარიშვალდებულია და ვალდებულია შეასრულოს მისთვის დასახული მიზნები, რაც უწყვეტ შემოქმედებით საქმიანობას გულისხმობს. არაერთი გაფრთხილების მიუხედავად, თეატრის ხელმძღვანელობამ ეს ვალდებულება არ შეასრულა, რის გამოც სამინისტრომ მიიღო გადაწყვეტილება ხელმძღვანელის თანამდებობიდან გათავისუფლების შესახებ.
გადაწყვეტილების გახმაურების შემდეგ, ერთ საათში,თეატრის წინ, დავით დოიაშვილის მხარდამჭერები შეიკრიბნენ, მათ შორის იყვნენ მსახიობები და რეჟისორები სხვადასხვა თეატრებიდან. დავით დოიაშვილმა ახალი თეატრის წინ შეკრებილ მხარდამჭერებს მიმართა და განაცხადა, რომ მისი გათავისუფლება მოსალოდნელი იყო. მისი თქმით, თეატრი სცენაზე არ დაბრუნდებოდა, სანამ მსახიობი ანდრო ჭიჭინაძე არ გათავისუფლდებოდა, რამაც, სავარაუდოდ, მისი გათავისუფლება გამოიწვია. დოიაშვილმა პოლიტპატიმრების გათავისუფლების მოთხოვნით კიდევ ერთხელ მიმართა საზოგადოებას.
“მე წავალ თუ მოვალ, მთავარი არ არის, მთავარი არის, რომ რომ გამოუშვით პოლიტპატიმრები, გამოუშვით სასწრაფოდ!” - თქვა დავით დოიაშვილმა, როცა ახალ თეატრთან შეკრებილ მოქალაქეებს მიმართავდა. (წაიკითხეთ სრულად)
"არსებობს პოლიტიკა და არსებობს კიდევ ქართული თეატრის მომავალი. დავით დოიაშვილი იყო ის ადამიანი, ვისაც ქართული თეატრი წინ მიჰყავდა, საუკეთესო რეჟისორი იყო ქართველ რეჟისორებს შორის. მისი ასე გადაგდება იმიტომ, რომ ვინმეს რაღაცა არ მოსწონს, ეს არის დანაშაული ქართული კულტურის წინაშე. პოლიტიკა შეიცვლება, გაივლის ყველაფერი, მაგრამ კულტურის დაღუპვა და მკვლელობა არ შეიძლება“, - ეს განცხადება რეჟისორ ლევან წულაძეს ეკუთვნის, რომელიც გუშინ საღამოს აქციას ესწრებოდა.
"ეს არაა ერთი ადამიანის მოხსნა, ესაა თეატრის დახურვა. დოი არ დაიკარგება, ჩემი თეატრის კარიც ღიაა მისთვის და დარწმუნებული ვარ, ბევრი სხვა თეატრიც გაუღებს კარს. მაგრამ ერთ-ერთი საუკეთესო ქართული თეატრი რომ დაიხურა ეს ფაქტია", - წერს "თავისუფალი თეატრის" დირექტორი, რეჟისორი ავთო ვარსიმაშვილი.
"კარის მეზობელი და დიდი ხნის მეგობარი, შეუმდგარი ადამიანი უშვებს პროფესიონალ, გამბედავ, ახალგაზრდების მოყვარულსა და უნიჭიერეს ადამიანს თეატრიდან. ასეთია რეჟიმი. მაგიტომ მოგწონთ. მორჩა...“ - ეს განცხადება ცნობილ პიანისტ გიორგი გიგაშვილს ეკუთვნის და თავის სტატუსში კულტურის ამჟამინდელ მინისტრს თინათინ რუხაძეს მიმართავს.
"დათო დოიაშვილის განთავისუფლება არასწორია! არასწორი!“ - წერს რეჟისორი ქეთი დოლიძე, რომელიც დღემდე ამჟამინდელი ხელისუფლების მომხრედ მიიჩნევა.
დოიაშვილის გათავისუფლებას სხვადასხვა თეატრების მსახიობები ეხმაურებიან. მათ შორის არიან, თავისუფალი, მარჯანიშვილის და თუმანიშვილის თეატრების დასის წევრები.
"დოი ჩემი დიდი ხნის მეგობარია, ძალიან ახლო მეგობარი, ჩვენ ერთად ვსწავლობდით მიშა თუმანიშვილის ჯგუფში და საკმაოდ საინტერესო ცხოვრება გავიარეთ ბევრი ქარცეცხლითა და თავგადასავლებით. ჩემი პირველი, მეორე, მესამე და მეოთხე სპექტაკლები სწორედ მას უკავშირდება, მასთან ერთად მუშაობას და ფეხის ადგმას ჩემს პროფესიაში, ამიტომ - მე ძალიან კარგად ვიცი მისი სიყვარული თეატრისადმი, მისი სიყვარული და თავგანწირვა პროფესიისადმი, მისი უზომო შრომისმოყვარეობა და პროფესიონალიზმი, დაუღალავი და ოპტიმიზმით სავსე ადამიანი, რომელიც დღეს ამ უღირსების მიერ იქნა გათავისუფლებული თეატრიდან! ეს შურისძიებაა, მაგრამ ამით ვერავის ვერ შეაშინებთ, უბრალოდ გრცხვენოდეთ!!! არავინ გაბედოს აქ რაიმე ქოცთა- გამართლების არგუმენტებით შემოვარდნა!
გაუმარჯოს დოის, რომელიც კიდევ ბევრჯერ იტყვის თავის სიტყვას ხელოვნებაში, ეს ნაძირალები კი დარჩებიან, როგორც ღორები ტალახში!!!“ - ნანუკა ლითანიშვილი (თუმანიშვილის თეატრი).
"არადა,როგორ გამიხარდა "სეილემის პროცესის" რეპეტიციები რომ დაიწყო! ვუთხარი კიდეც, რა მაგარია, მუშაობა რომ დაიწყე... თან ასეთ მაგარ პიესაზე-მეთქი. და უცებ, ძალიან სევდიანმა, (თუმცა, ჩვეული იუმორით) მიპასუხა: ისეთი შეგრძნება მაქვს, რომ გემი იძირება და მე ამ გემზე მაინც "დაკვრას" განვაგრძობო. არადა, როგორ გამიხარდა... სადღაც.. მაინც... მეგონა...“ - ეკა ჩხეიძე (მარჯანიშვილის თეატრი).
"16 აპრილი ღალატის დღე! დღე ქრისტეს 30 ვერცხლად გაყიდვისა! ასე გაიყიდა ეს ქვეყანაც! ჯვარცმა ახლოვდება, რასაც გარდაუვალი აღდგომა მოსდევს თან, რაც მარადიულ სიცოცხლეს ნიშნავს“ - ნანა ბუთხუზი (ვასო აბაშიძის სახელობის მუსიკისა და დრამის თეატრი).
"ნამუსი რომ გეყოფა, გაბედავ და დოიზე იტყვი “თავის მოვალეობას ვერ ასრულებდაო!..“ - ანკა ვასაძე (მარჯანიშვილის თეატრი).
"აბა, როგორ ხართ ჯიგრებო?! დოიკოს, რომ გაიძახოდით და გეამაყებოდათ მასთან “ბლიჟნი” მეგობრობა. 12 წლიდან გიცნობ. ყოველთვის გამოირჩეოდი შენი ნიჭით, ერთგულებით და სამართლიანობით! კიდევ ბევრი ღირსება გაქვს და ეს იცის ყველამ ვისაც შენთან უმუშავია ან თუნდაც ერთხელ მაინც შეგხვედრია! ხო და შენ გაგიმარჯოს, ჩემო მეგობარო! მიყვარხართ დოიაშვილებო!“ - ეკა ნიჟარაძე (მარჯანიშვილის თეატრი).
"ხომ ბევრს გაგიხარდათ?! ჰოდა, დრონი მეფობენ…! თქვენც ფრთხილად იყავით! მაინც!“ - მაია დობორჯგინიძე (თავისუფალი თეატრი).
"რისი ეშინია რეჟიმს ყველაზე მეტად? თავისუფალი, ნიჭიერი, განათლებული, ერთგული, მებრძოლი და დაუმორჩილებელი ადამიანების! ასეთ ადამიანებს ებრძვიან, და სამაგალითოდ სჯიან, ამის მაგალითია რეჟიმის ტყვეები, უამრავი ადამიანი ვინც სამსახურებიდან გაათავისუფლეს, ასე მოექცნენ თემურ ჩხეიძის სახელოსნოს, დღეს დოის და ახალ თეატრს! ჩემი სოლიდარობა მათ!!! არ შევეგუებით“, - მაიკო გელოვანი (თუმანიშვილის თეატრი).
დასასრულ, მართალია, დავით დოიაშვილის მოულოდნელი გათავისუფლების მიზეზად სამინისტროს მხრიდან თეატრში შემოქმედებითი პროცესის შეფერხება დასახელდა, მაგრამ ამ გადაწყვეტილებას, თავად რეჟისორის და თეატრალური საზოგადოების დიდი ნაწილი პოლიტიკურ მოტივებს უკავშირებს. ვასო აბაშიძის სახელობის მუსიკისა და დრამის თეატრის მსახიობები ამბობენ, რომ დოიაშვილს არსად უშვებენ. როგორ განვითარდება პროცესები და ვინ დაიკავებს დოიაშვილის სავარძელს კანდიდატებზე ჯერ კულტურის სამინისტრო არ საუბრობს.
იხილეთ ასევე: