სერბეთის დედაქალაქ ბელგრადში მთავრობის წინააღმდეგ მასშტაბური საპროტესტო აქცია გაიმართა. BBС-ის ინფორმაციით, ბელგრადში ქვეყნის სხვადასხვა ქალაქებიდან ათასობით მომიტინგე ჩავიდა.
ქვეყნის შინაგან საქმეთა სამინისტროს შეფასებით, საპროტესტო აქციაში 107 000 ადამიანი მონაწილეობდა, დამოუკიდებელი მონიტორინგის ჯგუფის შეფასებით კი, სულ მცირე, 325 000 ადამიანი შეიკრიბა და ეს იყო ყველაზე მასშტაბური საპროტესტო აქცია სერბეთის ისტორიაში.
ადგილობრივი მედიის ინფორმაციით, საპროტესტო აქციის დროს 22 ადამიანი დააკავეს და 56 დაშავდა.
ამასთან, სერბეთის პრეზიდენტის მტკიცებით, მან მომიტინგეების გზავნილი გაიგო.
"მთავრობაში ყველამ უნდა გაიგოს გზავნილი, როდესაც ამდენი ხალხი იკრიბება. მოგვიწევს საკუთარი თავის შეცვლა“, - აღნიშნა ვუჩიჩმა.
მედიის ინფორმაციით, პოლიციამ ბელგრადში საპროტესტო აქციის დროს დემონსტრანტების წინააღმდეგ შორი მანძილის აკუსტიკური მოწყობილობა (LRAD - Long Range Acoustic Device) გამოიყენა. ის ასხივებს „ხმის სხივს“ 160 დბ-მდე, რის შედეგადაც ადამიანი განიცდის ძლიერ ყურის ტკივილს, დეზორიენტაციას და პანიკას.
კადრებში ჩანს აქციის მონაწილეები, რომლებიც პანიკურად იფანტებიან და ვერ ხვდებიან რა ხდება მათ თავს. ბევრმა იგრძნო “ერთგვარი თავში დარტყმა“ და გაუსაძლისი ტკივილი.
ხმის ინტენსივობა დამოკიდებულია მანძილზე: რაც უფრო ახლოსაა, მით უფრო მტკივნეულია აღქმა.
Serbian security forces illegally used military-grade sonic weapons against protesters in Belgrade
— NEXTA (@nexta_tv) March 16, 2025
Police deployed the LRAD cannon — an acoustic weapon that emits a targeted “beam” of sound at volumes up to 160 dB.
Victims experience sharp ear pain, disorientation, and panic.… pic.twitter.com/gW8yNS4JSt
შეგახსენებთ, სერბეთში სამთავრობო კორუფციის წინააღმდეგ საპროტესტო აქციების ტალღა, რომელსაც სტუდენტები ხელმძღვანელობენ, მას შემდეგ დაიწყო, რაც გასული წლის ნოემბერში ქალაქ ნოვი სადში რკინიგზის სადგურის სახურავი ჩამოინგრა, რასაც 15 ადამიანი ემსხვერპლა. მომხდარის გამო ბრალი 13 ადამიანს წაუყენეს, მათ შორის სერბეთის ტრანსპორტის ყოფილ მინისტრს გორან ვესიჩს, რომელიც რკინიგზის სადგურის სახურავის ჩამონგრევიდან რამდენიმე დღეში გადადგა. საპროტესტო აქციების ფონზე იანვარში თანამდებობა სერბეთის პრემიერ-მინისტრმა, მილოშ ვუჩევიჩმაც დატოვა.
იხილეთ ასევე: