მსახიობი ნინო გაჩეჩილაძე, რომელიც თბილისის საქალაქო სასამართლოში ადმინისტრაციულ პასუხისგებაში მიცემული მსახიობის, ანა ტყებუჩავას პროცესს ესწრებოდა, ამბობს, რომ სიტუაცია რაც ახლა ხდება კომიკურია.
მსახიობის თქმით, ანა ტყებუჩავას წინააღმდეგ არანაირი მტკიცებულება არ არსებობს და პროცესს შეგნებულად აჭიანურებენ.
"ვერ წარმოვიდგენდი, რომ ის სცენარი, რაც შარშან ჩცდ-ში გათამაშდა, რეალობაში განმეორდებოდა. ძალიან კომიკური სიტუაციაა. ადამიანი ყველაფერზე თავჩახრილი პასუხობს და მაინც გადადეს პროცესი და რატომ? რატომ აწვალებ ადამიანს? უდანაშაულოა და გაუშვი რა. რაში სდებენ ბრალს ამ ადამიანს ვერ ვხვდები. მარტო იმიტომ, რომ თითი დაუქნიონ და შეაშინონ? მათი არავის ეშინია, ჩვენ ერთმანეთის გვერდით ვართ" - ამბობს გაჩეჩილაძე.
პროცესზე იმყოფებოდა ასევე მსახიობი ნინო კასრაძეც, რომელმაც აღნიშნა:
"ანა ტყებუჩავას ბრალი რაც წაუყენეს, ამ ბრალის დადასტურება არ მოხდა. ძალიან უმწეოდა გამოიყურებოდა ბრალდება. ეს ჩანს" - თქვა ნინო კასრაძემ.
როგორც ანა ტყებუჩავამ სხდომაზე ისაუბრა, მას რუსთაველის გამზირზე გზა არ გადაუკეტავს, შესაბამისად, არანაირი სამართალდარღვევა არ ჩაუდენია. შსს-ს წარმომადგენლის თქმით კი, არსებობს შესაბამისი მტკიცებულებები, როგორც ვიდეო ისე წერილობითი მტკიცებულებების სახით, რითაც დგინდება, რომ მსახიობმა ადმინისტრაციული სამართალდარღვევა ჩაიდინა. მისი თქმით, ანა ტყებუჩავამ პარლამენტთან მიმდინარე აქციის დროს, რუსთაველის გამზირზე ხელოვნურად გადაკეტა გზა, რისი აუცილებლობაც არ იდგა, რადგან მონაწილეთა რაოდენობა არ იყო იმდენი, რომ გზის გადაკეტვა ყოფილიყო საჭირო.