1
აპრილიდღის ზოგადი ასტროლოგიური პროგნოზი
ილონ მასკმა დონალდ ტრამპის საპრეზიდენტო ინაუგურაციაზე ყურადღება ფაშისტური სტილის ჟესტით მიიქცია, თან ეს ზედიზედ ორჯერ გაიმეორა.
"მინდა, უბრალოდ მადლობა გადაგიხადოთ, რომ ეს მოახდინეთ", - უთხრა SpaceX-ის, X-ისა და Tesla-ს მფლობელმა, დედამიწის უმდიდრესმა ადამიანმა და ტრამპის მნიშვნელოვანმა დონორმა პრეზიდენტის მხარდამჭერებს ვაშინგტონის Capital One Arena-ზე.
შემდეგ, მასკმა გაშლილი თითებით, მარჯვენა ხელი მკერდზე დაირტყა, მერე კი დიაგონალურად, ზევით გაიშვირა, თითები ერთად შეკრა და ხელისგული ქვევით მიმართა.
“ცილისწამების საწინააღმდეგო ლიგა” (ADL), რომელიც ანტისემიტიზმის წინააღმდეგ იბრძვის, ნაცისტურ ჟესტს განმარტავს, როგორც "გაშლილი მარჯვენა ხელის აწევას, ხელისგულით ქვევით".
შემდეგ მასკი მობრუნდა და კვლავ ანალოგიური მოიქცა, ამჯერად მისი ხელი და მკლავი ოდნავ დაბლა იყო.
"ჩემი გული თქვენთანაა," - თქვა მან და ხელი კვლავ გულმკერდზე დაირტყა, - "თქვენი წყალობით ცივილიზაციის მომავალი უზრუნველყოფილია. თქვენი წყალობით! როგორც იქნა, ჩვენ გვექნება უსაფრთხო ქალაქები და დაცული საზღვრები, გონივრული ხარჯვა. მარტივი რამეები... და ჩვენ Doge-ს მარსზე წავიყვანთ".
ეს იყო მინიშნება ფედერალური ხარჯების შემცირების ძალისხმევასა და ე.წ. "მთავრობის ეფექტიანობის დეპარტამენტზე", რა თანამდებობაზეც ტრამპმა მასკი დანიშნა, და ასევე საინაუგურაციო მიმართვაში ნათქვამზე, რომ აშშ მარსზე ასტრონავტებს გაგზავნის.
მასკმა აუდიტორიას სთხოვა, წარმოედგინათ ამერიკელი ასტრონავტები, რომლებიც დროშას სხვა პლანეტაზე აღმართავენ, თანაც, ამ მოქმედების იმიტაცია გააკეთა და დაიყვირა: "ბამ! ბამ!"
სოციალური მედიის მომხმარებლების დიდი ნაწილი მასკის ჟესტის გამო შოკშია. ნიუ-იორკის უნივერსიტეტის ისტორიის პროფესორმა რუთ ბენ-გიატმა თქვა: "ფაშიზმის ისტორიკოსი ვარ. ეს იყო ნაცისტური ჟესტი და თან ძალიან აგრესიულიც კი".
მასკს დაუყოვნებლივ არ გაუკეთებია კომენტარი, თუმცა თავისი გამოსვლის ის კადრები გააზიარა, რომელიც ჟესტს ასახავდა. მან ასევე რეაქცია გამოხატა მიმებზე, რომლებითაც ცდილობდნენ, მისი კადრები ხუმრობებად გადაექციათ.
X-ის ერთმა მომხმარებელმა დაწერა: "შეიძლება, ხალხის ნაცისტად მოხსენიება შეწყვიტოთ?"
მასკმა უპასუხა: "დიახ, ზუსტად" და "მთქნარების" ემოჯი მიამატა.
მიუხედავად ამისა, Haaretz-მა, ისრაელის გაზეთმა, მასკის ჟესტი აღწერა, როგორც "ჟესტი, რომელიც ყველაზე ხშირად ნაცისტურ გერმანიასთან ასოცირდება".
ADL-ი კი ამბობს, რომ გერმანიაში 1933-დან 1945 წლამდე, ნაცისტურ მისალმებას "ხშირად თან ახლდა შეძახილი ან ყვირილი: “Heil Hitler” ან “Sieg Heil”. მეორე მსოფლიო ომის შემდეგ, ნეონაცისტები და სხვა ჯგუფები, რომელთაც თეთრკანიანთა უზენაესობის სწამთ, ამ ჟესტის გამოყენებას განაგრძობენ, რაც მას ამ თემატიკასთან დაკავშირებით მსოფლიოში ყველაზე გავრცელებულ ხელის ჟესტად აქცევს.
სოციალურ მედიაში გამოქვეყნებულ განცხადებაში ADL-მა დაწერა:
"ეს დელიკატური მომენტია. ბევრი დაძაბულია. ჩვენი პოლიტიკა გახურებულია და სოციალური მედია შფოთვას მხოლოდ ზრდის. როგორც ჩანს, ილონ მასკმა უხერხული ჟესტი ემოციურ მომენტში გააკეთა და ეს ნაცისტური მისალმება არ ყოფილა. ამ მომენტში ყველა მხარემ უნდა მისცეს ერთმანეთს გარკვეული შეღავათი, ყველაზე უარესის მაგივრად უკეთესი იფიქროს და ღრმად ჩაისუნთქოს".
ალექსანდრია ოკასიო-კორტესმა, ნიუ-იორკის დემოკრატმა კონგრესმენმა, ADL გააკრიტიკა:
"უბრალოდ, სიცხადისთვის რომ ითქვას, თქვენ იცავთ Heil Hitler ჟესტს, რომელიც შესრულდა და მერე ხაზგასმისა და სიცხადისთვის განმეორდა კიდეც. ხალხს ოფიციალურად შეუძლია, თქვენი, როგორც რაიმე სახის სანდო ინფორმაციის წყაროს მოსმენა შეწყვიტოს. თქვენ მათთვის მუშაობთ. მადლობა, რომ ეს ყველასთვის ნათელი გახადეთ".
მასკმა ამ შეტყობინებას უპასუხა და თქვა, რომ ოკასიო-კორტესმა "ტრამპის გადახრის სინდრომის" (ტერმინი, რომელიც გულისხმობს, რომ ადამიანი ტრამპს ირაციონალურად, უმიზეზოდ და უსამართლოდ აკრიტიკებს) მე-5 სტადიას მიაღწია და სრულიად გაგიჟდა".
ტრამპს ხშირად ადანაშაულებენ იმაში, რომ თეთრკანიანთა აღმატებულობის მომხრეა და ადარებენ ჰიტლერს - ამას ჯეი დი ვენსი, ახლა უკვე ტრამპის ვიცე-პრეზიდენტიც აცხადებდა, ვიდრე რესპუბლიკურ პარტიაში გადაინაცვლებდა და აზრს შეიცვლიდა.
ზოგიერთი გამოჩენილი უკიდურესი მემარჯვენე სოციალური მედიის მომხმარებელი მასკის ჟესტმა აღაფრთოვანა და გაახარა.
კრისტოფერ პოლჰაუსმა, ნეო-ნაცისტური ჯგუფი Blood Tribe-ის ლიდერმა, Telegram-ზე დაწერა:
"არ მაინტერესებს, ეს შეცდომა იყო თუ არა. მაგრად ვისიამოვნებ ხალხის ცრემლებით”, ენდრიუ ტორბამ, უკიდურესი მემარჯვენე სოციალური მედიის პლატფორმის, Gab-ის დამფუძნებელმა, ასევე აღნიშნა: "უკვე საოცარი რამეები ხდება"...
