დაღესტნიდან თბილისში გამოქცეული გოგონას ამბავი: რატომ გადაწყვიტა ზაირამ უკან დაბრუნება - "გათხოვება არ მინდოდა... მშობლები დამპირდნენ, რომ არ გამათხოვებენ"

ტელეგრამარხი СK SOS, რომელიც ლგბტქ+ ადამიანებს, მათ ოჯახებსა და ჩრდილოეთ კავკასიაში მცხოვრებ იმ პირებს ეხმარება, ვისაც სასიკვდილო საფრთხე ემუქრება, დაღესტნიდან თბილისში გამოქცეული გოგონას - ზაირას ვიდეო მიმართვას ავრცელებს.

“ოჯახთან საუბრის შემდეგ ზაირამ გადაწყვიტა სახლში დაბრუნება. გოგონას თქმით, დაჰპირდნენ, რომ სახლში დაბრუნების შემთხვევაში, მისი ცხოვრება, გაქცევამდე არსებული ცხოვრებისგან განსხვავებული იქნება. ექნება მეტი თავისუფლება, თავად გადაწყვეტს რა ჩაიცვას და არ გაათხოვებენ.

ზაირამ იცის რისკები. ჩვენ მხარს ვუჭერთ მის ნებისმიერ გადაწყვეტილებას და მოხარული ვიქნებით თუ მისი ახლობლები შეასრულებენ დანაპირებს.

ზაირას აქვს შესაძლებლობა დაგვიკავშირდეს ნებისმიერი კრიზისის შემთხვევაში. ვიმედოვნებთ, რომ ეს არ იქნება საჭირო,“ - წერს ტელეგრამ არხი.

• მიმართვაში, ზაირა პიროვა აცხადებს, რომ ოჯახში მისი ნებით ბრუნდება.

“მოგესალმებით, მე ვარ ზაირა პიროვა. ახლა ვიმყოფები საქართველოში, კერძოდ თბილისში და მშვიდად ვსეირნობ ქუჩაში.

მინდა სიცხადე შევიტანო გარკვეულ დეტალებში - СK SOS-ს ჩემი ნებით მივმართე და ჩემივე ნებით გამოვიქეცი სახლიდან იმის გამო, რომ გათხოვება არ მინდოდა. იყო უსიამოვნო ხუმრობები გათხოვებაზე. ასევე არ მყოფნიდა ის თავისუფლება, რასაც ჩემი მშობლები მაძლევდნენ. ასევე, არ მინდოდა ჩემს მიმართ განხორციელებული ძალადობის ატანა.

ნათესავებს და მშობლებს არ დავკავშირებივარ ოთხი თვის განმავლობაში იმის გამო, რომ მეშინოდა. ვიცოდი, ისინი ემუქრებოდნენ ჩემს მეგობრებს, მაგრამ გუშინ დავურეკე და დიდხანს ვისაუბრეთ და მე ვფიქრობ შინ დაბრუნებაზე, ვინაიდან ჩემი მშობლები შემპირდნენ, რომ არ გამათხოვრებენ და მომცემენ თავისუფლებას, რომელიც მსურდა.

ვიცი რომ ბევრი გოგო კარგავს მას შინ დაბრუნების შემდეგ, მაგრამ მგონია, რომ ჩემი მშობლები და ნათესავები არ მავნებენ“, - ამბობს ის.

ზაირა ასევე ამბობს, რომ მის ადვოკატს დაუკავშირდა, რის შემდეგაც შეიტყო, რომ მშობლებმა მისი გატაცების გამო, ადვოკატის წინააღმდეგ პოლიციაში განცხადება შეიტანეს. გოგონას თქმით, ადვოკატმა არაფერი იცოდა.

“ეს არაა მართალი, ადვოკატმა არ იცის ჩემი ადგილსამყოფელი და ამასთან არავითარი შემხებლობა არ აქვს“, - დაამატა მან.

• უცხოელი აგენტების რეესტრში შეყვანილი რუსული სააგენტო kavkaz_uzel დამატებით დეტალებს წერს.

წყაროს ინფორმაციით, ზაირას მამა გოგონას სახლში ელოდება და პირობას დებს, რომ მას კარგად მოეპყრობიან.

ტელეგრამის არხზე "Crisis Group SK SOS"-ის პუბლიკაციების ქვეშ, მომხმარებელმა მეტსახელად N, რომელმაც თავი ზაირას უფროსი და უწოდა, დაწერა, რომ ოჯახში არასოდეს ეპყრობოდა მათ მკაცრად:

“სახლში ყველა ელოდება მას. არ დაიჯერებთ ის ელოდებიან - გამუდმებით ტირის ჩემი ოჯახი. გეფიცებით, არასოდეს ყოფილა აქ სიმკაცრე, მაგრამ ეს ხალხისთვის ამის "დამტკიცება შეუძლებელია", - წერს იგი.

დაღესტნიდან გაქცეული დების შესახებ ინფორმაცია 2022 წელს გავრცელდა.

როგორც მაშინ მედიაში გავრცელდა, დაღესტნელი დები რუსს მესაზღვრეებს ზემო ლარსის გამშვებ პუნქტზე ჰყავდათ დაკავებული.

მოგვიანებით ისინი საქართველოს ტერიტორიაზე შემოვიდნენ. გოგონები ამბობდნენ, რომ ისინი ოჯახში არსებულ ძალადობას გამოექცნენ და გათხოვებას აიძულებდნენ.