6 წიგნი, რომელიც 2025 წელს აუცილებლად უნდა წაიკითხოთ
ახალი წელი ახალი შესაძლებლობების და ახალი გამოწვევების დასახვის პერიოდია. წიგნები კი ყოველთვის საუკეთესო გზაა სამყაროს ახლებურად აღმოსაჩენად, ცოდნის გასაფართოებლად და ფანტაზიის გასაღვივებლად. 2025 წელი წიგნის მოყვარულებს ბევრ საინტერესო სიახლესაც სთავაზობს. წარმოგიდგენთ რამდენიმე გამოცემას, რომელთა კითხვითაც უნდა დაიწყოთ 2025 წელი. ჩვენ მიერ შერჩეული წიგნები სხვადასხვა ასაკობრივ კატეგორიაზე გათვლილი და მათი ჩუქებით ოჯახის წევრებისა და მეგობრების გახარებასაც შეძლებთ.
“ჭიამაიას სისხლი”, იუნონა გურული
„ჭიამაიას სისხლი“ მოთხრობების კრებულია. თითქმის ყველა მოთხრობაში სიუჟეტი დანაშაულის ირგვლივ ტრიალებს, თუმცა მუდამ იცვლება რაკურსი: ავტორი ცდილობს ხან დამნაშავის თვალით დაგვანახოს ამბავი, ხან მსხვერპლის, ხან მათი დედების, ხან მსხვერპლის შვილის და ხანაც სულაც ციხის თარჯიმნის. ხშირად კი თხრობა პოლიფონიურია და პერსონაჟთა ის გალერეა. რომელიც ჩვენ წინაშე იხატება, საზოგადოების ფენების განსხვავებულ დამოკიდებულებათა დიაპაზონს შლის. რაც მთავარია, ეს მოთხრობები ეხება თანამედროვეობის უმტკივნეულეს საკითხებს: დევნილობის თემით დაწყებული, სუიციდის და ფემიციდის პრობლემებით დასრულებული. მაგრამ მწერალი მხოლოდ ამ სივრცეში არ იკეტება. მას განწყობის და ხელწერის შეცვლაც შეუძლია. ამის ნიმუშია არაჩვეულებრივი მოთხრობა „ქვა, ფურცელი, მაკრატელი", სადაც გაცოცხლებული საკანცელარიო ნივთები თავიანთი დიალოგებით კომიკურ გარემოს ქმნიან.
„ლეთარგია“, ნინო ორტიგა ჭინჭარაული
რომანში აწმყო და წარსული მჭიდროდაა ერთმანეთს გადაჯაჭვული, ხოლო პერსონაჟები დროდადრო გამოიხმობენ ბავშვობის მოგონებებს, როგორც აწმყოში გზის გამკვალავსა და ერთგვარ ღუზას, რომელსაც შეიძლება მოეჭიდონ მაშინ, როცა ძალიან უჭირთ. „ლეთარგია” მილენიალებს ეძღვნება, ახალგაზრდებს, რომელთაც საქართველოსთვის ძნელ და ბნელ დროს გაიარეს ბავშვობა. რომანი გვიყვება სასტიკ და ცოტა დაუჯერებელ ამბავს, რომელიც ერთ სამეგობროს გადახდა თავს. მისტიკური ნაკადი წიგნს კიდევ უფრო საინტერესოსა და მიმზიდველს ხდის. ავტორი წამოჭრის ფაქიზ პრობლემებს, რომლებიც, სამწუხაროდ, ჩვენი საზოგადოებისთვის დღესაც ისევე მწვავე და მტკივნეულია, როგორც უახლოეს წარსულში.
„დაუფარავი ღიმილი“, ფრანსუაზ საგანი
დომინიკი სტუდენტია. მოხდენილი, გონებაგახსნილი, ფიქრიანი და მეოცნებე გოგონა უნივერსიტეტში სამართალმცოდნეობას სწავლობს და ბედნიერია ბერტრანთან, თავის შეყვარებულთან, რომელთანაც იდეალური ურთიერთობა აქვს. მაგრამ ამ ერთი შეხედვით იდეალურ ურთიერთობაში დომინიკი ხანდახან უკიდეგანოდ მოწყენილია, ხანდახან კი „ბედნიერების საშინელი განცდა" ეუფლება. ერთ დღესაც ამ ნაზ და სენტიმენტალურ ყოველდღიურობაში შემოდის ლუკი, ნაცრისფერთვალებიანი სიმპათიური მამაკაცი დაღლილი გამომეტყველებით, ბერტრანის ბიძა. და ყველაფერი იცვლება – იწყება თავბრუდამხვევი, კაშკაშა მზითა და სუფთა ჰაერით სავსე სიყვარულის ამბავი, რომელსაც ფრანსუაზ საგანი ისე ხედავს და გვიყვება, როგორც მხოლოდ მას შეუძლია – თვალისთვის უხილავი დეტალების შემჩნევით და უფაქიზესი სიმახვილით.
„ხვალ და ხვალ და ხვალ“, გაბრიელ ზევინი
ზამთრის ერთ სუსხიან დღეს ბავშვობის მეგობრები ვიდეოთამაშის შექმნას გადაწყვეტენ. ასე იწყება მათი თანამშრომლობა ვიდეოთამაშების დიზაინის რთულ და მშვენიერ სამყაროში, რომელიც ბარიერებითაა აღსავსე. სირთულეებითაა დატვირთული როგორც თავად ვიდეოთამაშის შექმნის პროცესი, ისე ორ ამბიციურ ხელოვანს შორის ურთიერთობა, რომელიც ხანდახან ტოქსიკურობის ზღვარს სცდება. ეს არის ამბავი ერთდროულად ვიდეოთამაშებსა და შექსპირზე, ტრაგედიებსა და „ილიადაზე“, პიროვნულ მეგობრობასა და საქმიან დაპირისპირებაზე.
წიგნი დააინტერესებს ყველას, იმის მიუხედავად, ხშირად თამაშობენ ვიდეოთამაშებს თუ ცხოვრებაში ერთხელაც არ უცდიათ.
„სამყაროს მაშველები“, გვანცა ასათიანი
პატარა კატო დიდი ცნობისმოყვარე და ფანტაზიორი გოგონაა, უყვარს მეგობრები და ცხოველები. მისი თანაკლასელებიც ძალიან საინტერესო ბავშვები არიან. წაიკითხე ეს მშვენიერი წიგნი, გაიცანი კატოსა და მისი მეგობრების - სამყაროს მაშველების მისტიკური ამბები და მიხვდები, რა ძალა აქვს მეგობრობისა და ურთიერთსიყვარულს.
„ფილმებზე უკეთესი“, ლინ პაინტერი
რომანტიკული კომედიური ფილმების მოყვარულ, თავადაც გამოუსწორებელ რომანტიკოსსა და მეოცნებე ლიზს ბავშვობის მეგობარი უყვარს... ასე ჰგონია... და როცა ის კვლავ დაბრუნდა მშობლიურ ქალაქში, გადაწყვეტს, როგორმე თავი მოაწონოს, მისი გული მოინადიროს კიდევ ერთი, მაგრამ აუტანელი ბავშვობის მეგობრისა და მეზობლის დახმარებით.
ეს წიგნი რომანტიკული კომედიაა რომანტიკულ კომედიებზე!
დაიწყეთ 2025 წელი ახალ წიგნებთან ერთად!
R