ნინო წილოსანის კრიტიკას ნათია ბუკია პასუხობს: "რუსეთში გამდიდრებული ოლიგარქები და იქ მოვაჭრე ბიზნესმენები თქვენკენ მოიკითხეთ"
"დასრულდა ამორალურ ხალხთან კოჰაბიტაცია“, - წერს, პარლამენტის თავმჯდომარე ნინო წილოსანი სოციალურ ქსელში და ბიზნესმენ გოდერძი ბუკიას ოჯახს აკრიტიკებს. წილოსანის მიაჩნია, რომ ადამიანები, რომლებიც საქართველოში ევროპულ კამპანიას უდგანან სათავეში, ამავე დროს კი პროდუქციას რუსეთში ყიდიან, სხვებს არ უნდა ამუნათებდნენ.
დეპუტატის გაღიზიანებას წინ ერთი ისტორია უძღოდა. ორი დღის წინ, ნინო წილოსანმა სოციალურ ქსელში ბაკურიანიდან ვიდეო გამოაქვეყნა, რომელშიც ამბობს:
"ბაკურიანში არის ფანტასტიკური თოვლი, არის ძალიან მაგარი სრიალი, არ დაუჯეროთ არცერთ მატყუარა ტელევიზიას, ჩამოდით, იხალისეთ, ისიამოვნეთ..."
დეპუტატის ვიდეო, სოციალურ ქსელში ბევრმა გააკრიტიკა, ადამიანების ნაწილმა დეპუტატს სამთო კურორტებზე ბოლო თვეებში გაზრდილ ფასებზე მიანიშნა.
გოდერძი ბუკიას ქალიშვილი სასტიპენდიო ფონდისა და Project ArtBeat-ის თანადამფუძნებელი ნათია ბუკია კი წერდა:
"ვკითხოთ ნინოს, კურორტებზე რომ გვეპატიჟება, ის თუ იცის, მესტიაში ტურისტი რომ მოკლეს და ცოლი გააუპატიურეს და რას ფიქრობს?"
როგორც ჩანს, სწორედ ამ სტატუსმა გააღიზიანა პოლიტიკოსი წილოსანი, რომელმაც სოციალურ ქსელში დაწერა:
"ბუკიების რუსეთში ნაშოვნ ფულზე არაფერი მაქვს საწინააღმდეგო.. არც იმას მივაქცევდი ყურადღებას, ახლაც რომ რუსეთში იყიდება მათი პროდუქცია, აქ რომ დიდად ევროპულ კამპანიას არ ედგნენ სათავეში და სხვებს არ ამუნათებდნენ - რუსები ხართო, კეთილსინდისიერი კომპანიების წინააღმდეგ ბოიკოტის ტალღას რომ არ აგორებდნენ, თანაც მხოლოდ იმის გამო, რომ ეს კომპანიები მათნაირი ამორალურები არ არიან ამ ყველაფერზე რომ არ ვსაუბრობთ, სწორედ ამიტომ გადაწყვიტეს თავხედურად აქეთ მოგვდგნენ.
დასრულდა ამორალურ ხალხთან კოჰაბიტაცია
პ.ს. ზუსტად ამ ტალახში გასვრილი ხალხი მომდგება მერე, ბაკურიანს რატომ აქებ და ტურისტებს რატომ ეპატიჟებიო. რუსეთებში ივაჭრეთ თქვენ და მე ჩვენს ეროვნულს დავიცავთ".
როგორც აღმოჩნდა ლაპარაკია სამკაულების ბრენდზე NATIA X LAKO, რომელიც, როგორც ქართულ, ისე რუსულ ბაზარზე ოპერირებს. ვცადეთ, დავკავშირებოდით აღნიშნული ბრენდის წარმომადგენელს, თუმცა ნომერზე, რომელიც ოფიციალურ გვერდზე აქვთ მითითებული გვიპასუხეს, რომ შეცდომაა და ნომერი ამ კომპანიას არ ეკუთვნის. ინფორმაცია ბუკიების ამ ბრენდთან კავშირის შესახებ, ტელეკომპანია "იმედმა" გაავრცელა.
ნათია ბუკია ამბობს, რომ ნინო წილოსანის მიერ გავრცელებული ინფორმაცია სიცრუეა. მან ამ თემაზე ვრცელი სტატუსი სოციალურ ქსელში გამოაქვეყნა, რომელშიც წერს, რომ აღნიშნულ ბრენდთან არაფერი აკავშირებს. ჩვენთან საუბარში კი დაამატა, რომ NATIA X LAKO, მისი ბრენდი არ არის და არც არასოდეს ყოფილა.
"TV Imedi რა დონის დეზინფორმატორია კი ვიცით ყველამ მაგრამ ყველაფრის დაიგნორება არ ღირს ალბათ. ჯერ ჩემს დაზე დაწერეს და ჩემი ფოტო დაურთეს. მერე მიხვდნენ შეცდომას და მეც გამრიეს საქმეში.
უმარტივესი გადასამოწმებელია, რომ ამ ბრენდთან არანაირი საერთო არ მაქვს. უბრალოდ, სახელს ვიზიარებ ადამიანთან, რომლის დიზაინითაც ეს საყურე კეთდება. ბევრს ჰქვია ნათია დღეს საქართველოში, ჰოდა, ასეთი არაპროფესიონალები რომ ხართ, თქვენს თავებს ეცით პატივი, მარტივია ამ ყველაფრის გადამოწმება.
გალერეა მაქვს თანამედროვე ხელოვნების, ყველამ კარგად იცის და რამდენი ქართველი თანამედროვე ხელოვანი გვაქვს ევროპაში და ამერიკაში გამოფენილი და გაყიდული, ეგეც მარტივი სანახავია. რუსეთში გამდიდრებული ოლიგარქები და რუსეთში მოვაჭრე ბიზნესმენები თქვენკენ მოიკითხეთ, მრავლად გყავთ. ნინო წილოსანი, შენც აქვე მოგმართავ, არ მგონია მცდარი ინფორმაციის გავრცელება შეეფერებოდეს თავის აღქმაში პარლამენტის წევრს".
ნათია ბუკია რუსთაველზე მიმდინარე აქციების აქტიური მხარდამჭერია და ხშირად ესწრება შეკრებებს. საკუთარ პოზიციას ასევე სოციალური ქსელის საშუალებით გამოხატავს. ერთ-ერთ ბოლო სტატუსში წერს:
"ყოველ დღე რუსთაველზე დგომა და ფოტოს ან ლაივის დადება იმის მტკიცებაა, რომ რაც არ უნდა მოხდეს, როგორც არ უნდა დაგემუქრონ, რაც არ უნდა საფრთხე შეექმნას შენს ჯანმრთელობას, შენ მაინც გამოხვალ, ასე არ არის? სინამდვილეში ხომ ამაზე პასუხისმგებლობის აღებაა ასეთი ქმედება? მეგობარმა მომწერა ცოტა ხნის წინ, კი, თავიდან საშინელება იყო რუსთაველზე დგომა, საშიში იყო და ტერორში იყავით, მაგრამ ახლა ხომ მოგწონთ და სიამოვნებით დადიხართო. საშინლად მეწყინა მისი ასე დანახული ჩემი უკიდურესი პროტესტის ფორმა.
74-ე დღეა ბევრი რამ, რისი კეთებაც მიყვარს დავიწყებული მაქვს, მათ შორის ჩემი საქმე, მათ შორის ჩემს შვილებთან უფრო ხანგრძლივი და მათზე კონცენტრირებული ურთიერთობა, მეტს აღარ დავაკონკრეტებ. 10 დღეა ყოველ ღამე ბეჭების საშინელი ტკივილი მაღვიძებს. კი, მიწევს ჩემს თავს "ვავნო", რადგან თავისუფლების დაკარგვას ვერ ავირჩევ, რადგან უსამართლობის გამეფებას ვერ ავირჩევ ამ ქვეყანაში, რადგან ტყვეების პატიმრობაში დარჩენას ვერ შევეგუები! ასეა ყველა!.."