ბრაზილიამ აქტაუში ჩამოვარდნილი "აზერბაიჯანის ავიახაზების“ თვითმფრინავის შავი ყუთები უკვე გაშიფრა და მონაცემები ყაზახეთს გადასცა
- ფოტოზე: სასწრაფო დახმარების სპეციალისტები, რომლებიც მუშაობენ აზერბაიჯანის ავიახაზების სამგზავრო თვითმფრინავის ჩამოვარდნის ადგილზე, ყაზახეთის ქალაქ აქტაუს მახლობლად, 2024 წლის 25 დეკემბერს. REUTERS/Azamat Sarsenbaev
ბრაზილიის საჰაერო ძალების გამომძიებლებმა ყაზახეთში 25 დეკემბერს ჩამოვარდნილი "აზერბაიჯანის ავიახაზების“ თვითმფრინავის ორი შავი ყუთის მონაცემების ამოღება დაასრულეს და ყაზახეთის ხელისუფლებას გადასცეს, - ინფორმაციას "დოიჩე ველე“ ბრაზილიის საჰაერო ძალებზე დაყრდნობით ავრცელებს.
"ბრაზილიის საჰაერო ძალების ლაბორატორიაში დასრულდა ბრაზილიური წარმოების აზერბაიჯანის ავიახაზების თვითმფრინავის ყაზახეთში გასულ თვეში განხორციელებული ფრენის მონაცემების გაშიფვრა. საერთაშორისო პროტოკოლების შესაბამისად, Embraer-ის თვითმფრინავის მონაცემები გადაეგზავნა ყაზახეთის ხელისუფლებას, რომელიც იძიებს კატასტროფას“, - ნათქვამია ბრაზილიის საჰაერო ძალების განცხადებაში.
შეგახსენებთ, ყაზახეთმა ქალაქ აქტაუში ჩამოვარდნილი სამგზავრო თვითმფრინავის, Embraer 190-ის შავი ყუთები ბრაზილიაში გაგზავნა. შავი ყუთების გაშიფვრაში მონაწილეობის მისაღებად ბრაზილიაში ჩავიდნენ სპეციალისტები რუსეთიდან, ყაზახეთიდან და აზერბაიჯანიდან.
თვითმფრინავი 25 დეკემბერს ჩამოვარდა, ბორტზე მყოფი 67 ადამიანიდან 38 დაიღუპა. მედიასაშუალებები აზერბაიჯანულ წყაროებზე დაყრდნობით იუწყებიან, რომ თვითმფრინავი რუსეთის საჰაერო თავდაცვის სისტემამ ჩამოაგდო. მათივე ინფორმაციით, თვითმფრინავი რუსეთის არცერთ აეროპორტში არ დაუშვეს. მან კატასტროფა ქალაქ აქტაუში ავარიული დაშვებისას განიცადა.
იხილეთ ასევე: