ჯიმი კარტერის ცხოვრება მიწის თხილის ფერმერობიდან პრეზიდენტობასა და ნობელის პრემიის ლაურეატობამდე: აშშ-ის ყოფილი პრეზიდენტი, 100 წლის ასაკში გარდაიცვალა

აშშ-ის ყოფილი პრეზიდენტი, ჯიმი კარტერი ჯორჯიის შტატის ქალაქ პლეინსში, საკუთარ სახლში, 100 წლის ასაკში გარდაიცვალა.

კარტერს, ბოლო წლებში, ჯანმრთელობის რამდენიმე პრობლემა ჰქონდა, მათ შორის მელანომა.

• “დემოკრატიული პარტიის“ წევრი, ჯიმი კარტერი პრეზიდენტის პოსტს 1977 წლის იანვრიდან 1981 წლის იანვრამდე იკავებდა. მან თანამდებობა მას შემდეგ დატოვა, რაც არჩევნებში რესპუბლიკელ კონკურენტთან, რონალდ რეიგანთან დამარცხდა.

როდესაც 1953 წელს, კარტერის მამა სიმსივნის დიაგნოზის შედეგად გარდაიცვალა, მან ოჯახის უფროსობა ითავა. სათავეში ჩაუდგა მამის მიწის თხილის ფერმას, რომელიც რამდენიმე წლის განმავლობაში მიტოვებული იყო. მალე საქმე საკმაოდ მომგებიან, შემოსავლიან ბიზნესად აქცია.

ჯიმი კარტერის პრეზიდენტობის მნიშვნელოვანი მომენტი იყო ისრაელსა და ეგვიპტეს შორის 1978 წლის კემპ-დევიდის შეთანხმების გაფორმება, რამაც გარკვეული სტაბილურობა მოუტანა ახლო აღმოსავლეთს. მაგრამ მისი პრეზიდენტობის პერიოდი ასევე აღინიშნა რეცესიაში შესული ეკონომიკით, მუდმივი არაპოპულარობით და ირანის მძევლების კრიზისით.

კარტერი პრეზიდენტის პოსტის დატოვების შემდეგ ათწლეულების განმავლობაში მუშაობდა ჰუმანიტარულ საკითხებზე.

2002 წელს მიენიჭა “ნობელის პრემია“ მშვიდობის დარგში საერთაშორისო კონფლიქტებისთვის მშვიდობიანი გადაწყვეტილებების გამოსაძებნად, დემოკრატიისა და ადამიანის უფლებების გასაუმჯობესებლად და ეკონომიკური და სოციალური განვითარების ხელშეწყობისთვის გაწეული დაუღალავი ძალისხმევის გამო.

თეთრი სახლის დატოვების შემდეგ, კარტერმა ბევრი რამ გააკეთა საზოგადოებისთვის.

აშშ-ს ისტორიაში ყველაზე ხანდაზმულმა პრეზიდენტმა, 2024 წლის ოქტომბერში 100 წლის იუბილე აღნიშნა. უკანასკნელი 19 თვე მან ჰოსპისში გაატარა, სადაც კიბოს მკურნალობდა.