“შარლ მიშელი 2“ არ იქნება...“ - როგორ აფასებენ ოპოზიციონერი პოლიტიკოსები ალენ ბერსეს განცხადებას

“მთავრობამ გასცა დაპირება, რომ შეცვლიდა “უცხოური გავლენის გამჭვირვალობის შესახებ“ კანონის შინაარსს“, - ამის შესახებ ევროსაბჭოს გენერალურმა მდივანმა, ალენ ბერსემ დღეს გამართულ პრესკონფერენციაზე განაცხადა.

მისივე თქმით, კანონის ცვლილებისთვის სამუშაო ჯგუფი შეიქმნება: "შეიქმნება სამუშაო ჯგუფი საქართველოსა და ევროპის საბჭოს წარმომადგენლების მხრიდან, მათ შორის ვენეციის კომისია იქნება ჩართული და მოხდება იდენტიფიცირება იმ ცვლილებების, რომელიც უნდა განხორციელდეს კანონმდებლობაში", - განაცხადა ალენ ბერსემ და აღნიშნა ისიც, რომ მისი ვიზიტის ერთ-ერთი მთავარი პირობა იყო, შეხვედროდა ყველას. ხოლო “საქართველოში არჩევნების ლეგიტიმაციისთვის“ ჩამოვიდა.

“გამომდინარე იქიდან, რაც საქართველოში ხდება, ჩემი მხრიდან უპასუხისმგებლობა იქნებოდა, აქ რომ არ ვიყო და ხალხის გვერდით რომ არ დავდგე. ჩემი ვიზიტის მთავარი ამოცანა არის ის, რომ მიმდინარე პოლიტიკური კრიზისი შეიძლება იყოს გადაჭრილი თუ დავიცავთ ფუნდამენტურ პრინციპებს დემოკრატიის, ადამიანის უფლებების და კანონის უზენაესობის,“ - განაცხადა ევროსაბჭოს გენერალურმა მდივანმა მედიასთან.

აღნიშნულ განცხადებებს უკვე მოჰყვა შეფასებები ოპოზიციურ სპექტრში. ვნახოთ როგორია გამოხმაურებები:

• “კოალიცია ცვლილებისთვის“ ერთ-ერთი ლიდერი, ნიკა მელია:

“გუშინ ჩვენი კოალიცია არ შეხვდა ალენ ბერსეს, რასაც ჰქონდა კონკრეტული მიზეზი: ვერ მოვისმინეთ კონკრეტიკა, თუ რა მიზანს ემსახურებოდა ვიზიტი.

დღეს, მის ბრიფინგზე ვისმენთ რეალობას მოწყვეტილ, ბიძინასთვის საოცნებო მოლაპარაკებების საკითხებს. (“რუსული კანონის“ შელამაზება და ა.შ).

პროტესტს აქვს მკაფიო მოთხოვნა: ახალი არჩევნები“.

• “პარტია “გახარია საქართველოსთვის“ თავმჯდომარის მოადგილე, ნათია მეზვრიშვილი:

“გონგო ორგანიზაციებს და სატელიტ ოპოზიციას ალენ ბერსეც შეუერთდა.

როგორც ჩანს, ივანიშვილის დაპირებული ჯილდოებით თვალებგაბრწყინებულ ბატონ ბერსეს არ აუხსნეს, რომ ახლა სხვა დროა, პროცესი ქუჩაში მიდის და ხალხის ლეგიტიმაციის გარეშე ვერსად დაჯდება, მითუმეტეს, ვერ შეალამაზებს რუსულ კანონს. არა უშავს, ხალხი აუხსნის.

ხომ ძალიან უნდოდა “ოცნებას“ ენახა. ხოდა, ახლა ნახავს “ოცნებაც“ და ბატონი ბერსეც როგორ იმუშავებს ხალხის საზიანოდ შიდა საქმეებში ჩარევა და არალეგიტიმურებთან ხალხის ნებართვის გარეშე დალაგების მცდელობა.

ასეთ ტიპებთან კეკლუცი არ გამოვა. ვინც პროტესტის გაფუჭებას შეეცდება, ყველას უნდა მივუჩინოთ თავისი ადგილი“.

• “ლელოს“ ერთ-ერთი ლიდერი, ანა ნაცვლიშვილი:

“მოთხოვნები უცვლელია: უპირობო თავისუფლება პოლიტიკურ პატიმრებს და ახალი, სამართლიანი არჩევნები. რუსული კანონის მიღება, რომელიც უდიდესი ბოროტება და სივერაგეა, ამ ქვეყანაში შესაძლებელი იმიტომ გახდა, რომ ჩვენ სახელმწიფო მოგვტაცეს: ეს ნაბიჯ-ნაბიჯ აკეთა რუსმა ოლიგარქმა, წლების განმავლობაში.

პარლამენტი მიტაცებულია, საერთო სასამართლო მიტაცებულია, საკონსტიტუციო სასამართლო მიტაცებულია, საგამოძიებო უწყებები მიტაცებულია, უსაფრთხოების სამსახურები მიტაცებულია, საარჩევნო ადმინისტრაცია მიტაცებულია, მედიის მნიშვნელოვანი წილი მიტაცებულია!

რუსული კანონის შემდეგ კიდევ იმდენი წითელი ხაზი გადაიკვეთა - 26 ოქტომბერს, შემდეგ 28 ნოემბერს, შემდეგ ყოველ დღე და ღამე 28 ნოემბრის მერე, ერთი რუსული კანონის შეცვლა, თუნდაც უკან წაღება, ამას ვეღარ შეცვლის. თორემ არ იქნება ერთი რუსული კანონი, იქნება მეორე - ოფშორების, საჯარო მოხელეების რეპრესიის და ა.შ. და ა.შ.

ივანიშვილმა საქართველოს კონსტიტუციის მოქმედება გააჩერა, რახანია. ჩვენ ის უნდა აღვადგინოთ, ქართული კონსტიტუციის მოქმედების პირობებში კი ვეღარანაირი რუსული კანონი ვეღარ იარსებებს და ავტომატურად გაქრება.

არ ვაპირებ თანამოქალაქეების დალეწილ ძვლებზე და გადამწვარ ნერვებზე გადავიარო. არა რუსულ ხელისუფლებას!“

• “კოალიცია ცვლილებისთვის“ ერთ-ერთი ლიდერი, ნიკა გვარამია:

“შარლ მიშელი 2“ არ იქნება, ტერორისტებთან მოლაპარაკება არ შეიძლება, არც მოსალაპარაკებელია რამე: მხოლოდ ახალი არჩევნები - ნათქვამია და აღარ უნდა გადაიხედოს

ტყვეებით ვაჭრობა და რაღაც რეფორმებზე ლაპარაკი არალეგიტიმურ და ხალხის წამებაში მხილებულ კონსტიტუციური გადატრიალების მომწყობ ბანდასთან არ შეიძლება.-მთავარი ამოცანა ვიზიტის არის მიმდინარე პოლიტიკური კრიზის გადაჭრაა და ეს მოხდება თუ დავიცავთ ადამიანის ფუნდამენტურ უფლებებს და კანონის უზენაესობას“.

• “გახარია საქართველოსთვის“ ლიდერი, გიორგი გახარია:

“მე მგონი, ამასაც ვიცე-პრემიერობას შეჰპირდა ივანიშვილი.“

• “ერთიანობა-ნაციონალური მოძრაობის“ ლიდერი, თინა ბოკუჩავა:

“დაჯექი, ორიანი...“ - მოკლე და კონკრეტული განცხადებით ეხმაურება ალენ ბერსეს თინა ბოკუჩავა.