საფრანგეთში უმძიმესი დანაშაულის სასამართლო განხილვა დასრულდა - კაცს, რომელიც ცოლს წლების განმავლობაში პრეპარატებით აძინებდა და უცნობ პირებს მის გაუპატიურებას სთავაზობდა, 20-წლიანი პატიმრობა მიესაჯა

საფრანგეთის სასამართლომ 20-წლიანი პატიმრობა მიუსაჯა 72 წლის დომინიკ პელიკოტს - მამაკაცი წლების განმავალობაში დამამშვიდებელი პრეპარატებით აძინებდა საკუთარ ცოლს და უცნობ პირებს ინტერნეტით სთავაზობდა მის გაუპატიურებას, რასაც კამერით იღებდა. მან დანაშაული აღიარა, თუმცა როგორც მისი ადვოკატი ამბობს, შეიძლება განაჩენი გაასაჩივროს.

• დომინიკ პელიკოტი ასევე დამნაშავედ ცნეს ქალიშვილისა და რძლებისთვის უხამსი სურათების გადაღებაში.

სასამართლომ პელიკოტი ყველა პუნქტში დამნაშავედ ცნო. მასთან ერთად დამნაშავედ ცნეს 51 სხვა პირი. სასამართლო პროცესზე მყოფი მამაკაცების უმეტესობამ უარყო, რომ ის, რაც მათ გააკეთეს, გაუპატიურება იყო. მათი თქმით, არ იცოდნენ, რომ ჟიზელ პელიკოტი უგონო მდგომარეობაში იყო და, შესაბამისად, თავს სექსუალურ მოძალადეებად არ მიიჩნევდნენ.

განაჩენის შემდეგ 72 წლის ჟიზელ პელიკოტმა ჟურნალისტებს განუცხადა, რომ სასამართლო პროცესი მისთვის "ძალიან რთულად გადასატანი" იყო. მან ასევე "უღრმესი" მადლობა გადაუხადა თავის მხარდამჭერებს და ისეთ ქვეყანაში ყოფნის სურვილი გამთქვა, სადაც კაცები და ქალები ურთიერთპატივისცემით იცხოვრებენ.

დომინიკ პელიკოტი 50 წელიწადის განმავლობაში იყო დაქორწინებული ჟიზელზე. პოლიციამ ქალის გაუპატიურების სცენების ამსახველი ვიდეოები შემთხვევით აღმოაჩინა მას მერე, რაც დომინიკ პელიკოტი სუპერმარკეტში ქალებისთვის ფოტოების მალულად გადაღების გამო დააკავეს. გამოძიებამ მას ჩამოართვა მობილური ტელეფონი და კომპიუტერი, რომელშიც ჟიზელის გაუპატიურების ამსახველი ათასობით ვიდეო ნახეს.