ეფ-ეს-ბეს მტკიცებით, გენერალ კირილოვის მკვლელობაში ეჭვმიტანილი დააკავეს - რა დეტალები ხდება ცნობილი?
რუსეთის უშიშროების ფედერალურმა სამსახურმა დღეს, 18 დეკემბერს, გამოაცხადა, რომ დააკავეს შეიარაღებული ძალების რადიაციული, ქიმიური და ბიოლოგიური დაცვის ჯარების მეთაურის, გენერალ-ლეიტენანტ იგორ კირილოვის და მისი თანაშემწის წინააღმდეგ ტერაქტის მოწყობაში ეჭვმიტანილი.
მათი ცნობით, დაკავებულია უზბეკეთის მოქალაქე, 29 წლის მამაკაცი.
კირილოვი, 17 დეკემბერს, დილით, საცხოვრებელი სახლის გარეთ იმყოფებოდა, როცა ელექტრო სკუტერში დამალული ასაფეთქებელი მოწყობილობა დისტანციურად გააქტიურდა.
სახელმწიფო მედიის სააგენტოების ცნობით, რუსეთის უსაფრთხოების სამსახურმა განაცხადა, რომ ეჭვმიტანილი, რომლის სახელიც ჯერ არ გავრცელებულა, უკრაინული დაზვერვის მიერ იყო რეკრუტირებული.
წყაროს თქმით, რომელიც BBC-ს სამშაბათს ესაუბრა, უკრაინის უსაფრთხოების სამსახურმა უკვე განაცხადა, რომ სწორედ ისინი იდგნენ მკვლელობის უკან.
უკრაინული წყაროს განცხადებით, კირილოვი "ლეგიტიმური სამიზნე“ იყო და ის სამხედრო დამნაშავე იყო.
ორშაბათს, მკვლელობის წინა დღეს, უკრაინამ 54 წლის კირილოვს დაუსწრებლად გამოუტანა განაჩენი, ბრალდებით: "ის პასუხისმგებელია აკრძალული ქიმიური იარაღის მასობრივ გამოყენებაზე“. რუსეთი ამ ბრალდებას უარყოფს.
ФСБ-ს განცხადებით, ეჭვმიტანილს კირილოვის მკვლელობის სანაცვლოდ 100 000 დოლარის ოდენობის ჯილდოსა და ევროკავშირში გადაყვანას დაჰპირდნენ.
ФСБ-ს თქმით, უკრაინის მითითებებით, მან მოსკოვში ჩასვლა და ხელნაკეთი ასაფეთქებელი მოწყობილობის მიღება მოახერხა. შემდეგ ასაფეთქებელი მოწყობილობა ელექტრო სკუტერზე დაამონტაჟა, რომელიც კირილოვის საცხოვრებელი სახლის შესასვლელთან დააყენა.
შემდეგ მან ავტომობილი იქირავა, რათა კირილოვის სახლისთვის ეთვალთვალა, ასევე, დაამონტაჟა კამერა, რომელიც უკრაინულ ქალაქ დნიპროში, მისი კურატორებისთვის ვიდეოს პირდაპირ ეთერში გადასცემდა.
როგორც განცხადებაშია ნათქვამი, როცა მათ დაინახეს, რომ კირილოვი სახლიდან გამოვიდა, ეჭვმიტანილმა ბომბი აამოქმედა.
კირილოვი, სავარაუდოდ, ყველაზე მაღალი რანგის სამხედრო ფიგურაა, რომელიც რუსეთში ომის დაწყების შემდეგ მოკლეს.
უკრაინაში ქიმიური იარაღის გამოყენების გამო გენერალი ადრე გაერთიანებულმა სამეფომაც დაასანქცირა.
მოსკოვი ამ ბრალდებებს უარყოფს და აცხადებს, რომ 2017 წელს მათ ქიმიური იარაღის მარაგის უკანასკნელი ნარჩენები გაანადგურეს.
იხილეთ ასევე: