"სამი კვირაა ექიმები დიდი დატვირთვით ვმუშაობთ... მხოლოდ დაავადების მკურნალობა კი არ მიწევს, არამედ შოკირებული ავადმყოფების დამშვიდებაც" - ანზორ მელია
ამ დღეებში მედიკოსები, განსაკუთრებით კარდიოლოგები, პაციენტების მატებას უჩივიან, რადგან მძიმე, დაძაბული და სტრესული ფონი ადამიანებს ჯანმრთელობას პრობლემებს უქმნის... ცოტა ხნის წინ კარდიოლოგმა ანზორ მელიამ თავის "ფეისბუქპოსტით" მოსახლეობას მიმართა და დაგმო ძალადობა, ის, რაც ბოლო სამი კვირაა, ჩვენს დედაქალაქში გრძელდება.
- ცნობილი ექიმი, რომელიც წელებია, ადამიანების ფსიქიკურ და ფიზიკურ ჯანმრთელობაზე ზრუნავს, ქვეყანაში შექმნილი მდგომარეობით შეწუხებულია. ანზორ მელიასთან საუბარშიც ირკვევა, რომ ამ დღეებში მას ბევრმა ადამიანმა მიაკითხა.
- მე ვარ პრაქტიკოსი ექიმი. ახლა მხოლოდ დაავადების მკურნალობა კი არ მიწევს, არამედ შოკირებული ავადმყოფების დამშვიდებაც. მიწევს მათი ფსიქოლოგიურად გამაგრება და დარწმუნება, რომ ყველაფერი კარგად იქნება. განსაკუთრებით ბოლო სამი კვირაა, ძალიან დიდი დატვირთვით ვმუშაობთ. მოდიან ახალი პაციენტებიც და ძველებიც, რომლებსაც გადატანილი აქვთ ინფარქტი, აქვთ მოციმციმე არითმია, გულის უკმარისობა და ამ სტრესის ფონზე გარკვეული ჩივილები ემატებათ.
მოდიან ახალგაზრდებიც ძალიან დატვირთულები, განერვიულებულები და ისეთი, რომ თვალებში სხივი არ აქვთ - სასწაულია, ასეთი ჯერ არ მინახავს. მათ მდგომარეობას ძალიან განვიცდი, ვკვდები, რადგან ძნელია ამის ყურება. არიან განერვიულებული და შეშინებული მოხუცებიც... ამ ნერვიულობის ნიადაგზე ადამიანები ინფარქტებითაც შემოვიდნენ. ასე უკონტროლოდ გაზის გაშვება, წყლის ჭავლში რაღაც გაუგებარი ნივთიერების შერევა და ამის დამიზნება საკუთარი მოსახლეობისთვის დღეს და ხვალ არა, მაგრამ რამდენიმე წელში ცუდ შედეგს მოგვიტანს. ადამიანების უმრავლესობა ამბობს, რომ თუ ასე გაგრძელდა მდგომარეობა, ქვეყნიდან უნდა წავიდეს. ვაწყნარებ, ვამშვიდებ და ვეუბნები, ვის უტოვებენ საქართველოს-მეთქი?!.
- რა დაამშვიდებს სიტუაციას?
- ახლანდელი მთავრობა არასერიოზულად უყურებს ხალხს, რომელიც რუსთაველის გამზირზე ათენებს. არადა, მათი დაწყნარება მხოლოდ ახლი არჩევნებით შეიძლება, სხვანაირად არ დამშვიდდება ქვეყანა. შეუძლებელია, რომ ჩვენ რუსეთს დავუბრუნდეთ. რა კანონებსაც იღებენ, ხომ შეიძლება ნორმალური კაცი ამისგან გაგიჟეს. ქართული ენის ცოდნა არ არის აუცილებელი, ისე მიიღებენ თანამდებობაზე. ეს ნორმალურია?! ადამიანი არ არის, რომ თქვას, მოდი, დავნიშნოთ ახალი არჩევნები. ანდა, როგორ შეიძლება ქვეყნის პრეზიდენტს სალომე ზურაბიშვილს ასეთი სიტყვებით რომ მოიხსენიებენ, ქალს, რომელიც დიდი ავტორიტეტია ევროპელ ლიდერებთან. ეს გაუნათლებელი ფეხბურთელი პრეზიდენტად რომ დანიშნეს, - რატომ?! ბავშვებს რა უნდა ვუთხრათ - როგორ აღარ ისწავლოთო? ესენი რასაც ახლა აკეთებენ, თუ ეს ყველაფერი შესრულდა, მომავალი ჯოჯოხეთად იქცევა. ამიტომ მხოლოდ ევროპა და მხოლოდ ეგ არის გამოსავალი. ევროპა მინდა, მეტი არაფერი!