საქართველოს ხელისუფლებას მოვუწოდებთ, დაასრულოს ძალადობა - რა წერია Amnesty International-ის ანგარიშში

საქართველოში პოლიციის მიერ გამოყენებული უკანონო ძალის, წამებისა და სხვა არასათანადო მოპყრობის მასშტაბები მიუთითებს იმაზე, რომ ისინი მოქმედებენ მთავრობის ნებადართული დირექტივებით და გათამამებულები არიან დაუსჯელობით, - ამის შესახებ Amnesty International-ის ანგარიშშია აღნიშნული.

• საქართველოს დედაქალაქ თბილისში 29 ნოემბრიდან მასობრივი აქციები დაიწყო, რამდენიმე ათასი ადამიანი პარლამენტის წინ და რამდენიმე ცენტრალურ ქუჩაზე აპროტესტებდა, აქციები დაიწყო ქვეყნის მასშტაბითაც. პოლიციამ საპასუხოდ წლის ჭავლი, ცრემლსადენი გაზი და რეზინის ტყვიები გამოიყენა, რასაც ესკალაცია მოჰყვა. წარმოქმნილი ძალადობისა და დაპირისპირებების შედეგად მრავალი ადამიანი დაშავდა, ვიდეომასალაში კი მშვიდობიანი მომიტინგეებისა და ჟურნალისტების სასტიკი ცემა არის აღბეჭდილი. პოლიცია აქციის მონაწილეებს აქციების ტერიტორიის გარეთაც დევნიდა, მათ სახლებსა და ოფისებში ჩხრეკას და დაკავებებს ახორციელებდა. ამ დროისთვის, 460-ზე მეტი ადამიანი არის დაკავებული, მათ შორის, 430-ის წინააღმდეგ ადმინისტრაციული საქმე, 30-ის წინააღმდეგ კი სისხლის სამართლის საქმეა აღძრული", - წერია ანგარიშში.

Amnesty International-ი წერს, რომ გავრცელებული ინფორმაციით, 300-ზე მეტი მომიტინგე, ანუ დაკავებულთა უმრავლესობას ექვემდებარება წამებას და სხვა არასათანადო მოპყრობას პოლიციის სპეცრაზმის მიერ - ბევრი შემთხვევა წამებას უტოლდება. 80-ზე მეტი ადამიანი საავადმყოფოში გადაიყვანეს მძიმე დაზიანებებით, მათ შორის სახის და სხვა ძვლების მოტეხილობით და თავის დაზიანებებით.

"პოლიციის მიერ გამოყენებული უკანონო ძალის, წამებისა და სხვა არასათანადო მოპყრობის მასშტაბები მიუთითებს იმაზე, რომ ისინი მოქმედებენ მთავრობის ნებადართული დირექტივებით და გათამამებულნი არიან დაუსჯელობით. სასამართლოები ძირითადად უგულებელყოფენ წამებისა და სამართლიანი სასამართლოს უფლებების დარღვევის მზარდ მტკიცებულებებს. ჯარიმა დაეკისრა და ადმინისტრაციული წესით პატიმრობა მიესაჯა 160-ზე მეტ ადამიანს. პოლიცია და მთელი სისხლის სამართლის სისტემა, როგორც ჩანს, დემონსტრანტების დასაშინებლად, შევიწროებისა და დარბევისთვის და მშვიდობიანი განსხვავებული აზრის ჩასახშობად გამოიყენება, რაც ასახავს ინსტიტუციონალიზებულ რეპრესიებს“, - აღნიშნულია ანგარიშში.

• Amnesty International-ი საქართველოს მთავრობას მოუწოდებს, დაიცვას და უზრუნველყოს ყველა ადამიანის უფლებები ქვეყანაში.

"Amnesty International ღრმად შეშფოთებულია საქართველოში პროტესტის ესკალაციის გამო და მოუწოდებს საქართველოს მთავრობას დაიცვას და უზრუნველყოს ყველა ადამიანის უფლებები ქვეყანაში, გამოხატვის თავისუფლებისა და მშვიდობიანი შეკრების უფლებების ჩათვლით. ჩვენ ასევე, მოვუწოდებთ საერთაშორისო საზოგადოებას, გამოიჩინოს სოლიდარობა იმ ადამიანების მიმართ, რომლებიც მშვიდობიანად ახორციელებენ თავიანთ უფლებებს საქართველოში“, - აღნიშნულია დოკუმენტში.

Amnesty International-ი საქართველოს ხელისუფლებას ძალადობის დასრულებისკენ მოუწოდებს.

"დაასრულოს ძალადობა: დაუყოვნებლივ შეაჩეროს ძალადობა პოლიციისა და უცნობი ჯგუფების მხრიდან, რომლებიც მოქმედებენ პოლიციის თანამონაწილეობით. დაიცვას და უზრუნველყოს ადამიანის უფლებების პატივისცემა: მხარი დაუჭიროს და უზრუნველყოს ქვეყანაში ყველა ადამიანის უფლებების პატივისცემა, მათ შორის გამოხატვის თავისუფლების, მშვიდობიანი შეკრებისა და გაერთიანების უფლებას. გამოიძიოს ძალის უკანონო გამოყენების ფაქტები: ჩაატაროს სწრაფი, საფუძვლიანი, დამოუკიდებელი, მიუკერძოებელი, გამჭვირვალე და ეფექტური გამოძიება უკანონო ძალის გამოყენებასთან დაკავშირებულ ბრალდებებზე, მათ შორის ცრემლსადენი გაზის, წყლის ჭავლისა და ხელკეტების ბოროტად გამოყენებაზე, გამოიძიოს წამების და სხვა არასათანადო მოპყრობის ფაქტები: ჩაატაროს სწრაფი, საფუძვლიანი, დამოუკიდებელი, მიუკერძოებელი, გამჭვირვალე და ეფექტური გამოძიება წამებისა და სხვა არასათანადო მოპყრობის ბრალდებებთან დაკავშირებით, უზრუნველყოს ანგარიშვალდებულება: ისინი, ვის პასუხისმგებლობაზეც ეჭვი არსებობს სამართლიან სასამართლოზე პასუხისგებაში უნდა მიეცნენ, დაასრულოს დაუსჯელობა, უზრუნველყოს შესაბამისობა: უზრუნველყოს, რომ პოლიცია შეასრულოს ძალის გამოყენების საერთაშორისო სტანდარტები და საფუძვლიანად, დამოუკიდებლად, მიუკერძოებლად, გამჭვირვალედ და ეფექტურად გამოიძიოს ძალადობის ფაქტები და ეჭვმიტანილები მართლმსაჯულების წინაშე წარდგნენ, გაათავისუფლოს მშვიდობიანი მომიტინგეები, სამართლიანი სასამართლო პროცესი: უზრუნველყოს, რომ მათ, ისინი, ვინც ბრალდებული არიან საერთაშორისოდ აღიარებულ დანაშაულებში, მიიღებენ სამართლიან სასამართლო პროცესს და სათანადო პროცედურების დაცვას, გამჭვირვალობა: უზრუნველყოს საჩივრების საჯარო განხილვა, რომლებიც დაკავშირებულია საპროტესტო აქციების დროს არასაჭირო და გადაჭარბებული ძალის გამოყენებასთან, რათა უზრუნველყოს ანგარიშვალდებულება და ეფექტური საშუალებები მსხვერპლთათვის, დაიცვას და შეასრულოს საქართველოს მიერ ნაკისრი ადამიანის უფლებათა დაცვის საერთაშორისო ვალდებულებები: როგორიცაა ადამიანის უფლებათა ევროპული კონვენციის მე-10 და მე-11 მუხლის დებულებები, რომლებითაც გარანტირებულია გამოხატვის თავისუფლების, მშვიდობიანი შეკრებისა და გაერთიანების უფლება და სამოქალაქო და პოლიტიკური უფლებების საერთაშორისო პაქტის მე-19 და 21-ე მუხლები, რომლებიც იცავს გამოხატვის თავისუფლებისა (მათ შორის ჟურნალისტების უფლებას, გააშუქონ საპროტესტო აქციები) და მშვიდობიანი შეკრების უფლებას. საქართველო არის ადამიანის უფლებათა ორივე ხელშეკრულების მონაწილე სახელმწიფო“, - აღნიშნულია დოკუმენტში.

Amnesty International-ი განმარტავს, რომ ანგარიშში დოკუმენტირებულია ადამიანის უფლებათა დარღვევის შემთხვევების შესწავლა და ანალიზი, დაშავებული მომიტინგეების და ჟურნალისტების ჩვენებებზე, ცნობების ანალიზსა და ქართველი უფლებადამცველების ინტერვიუების, საპროტესტო აქციების ვიდეო და ფოტო მასალის საფუძველზე.

"ანალიზი მიუთითებს ადამიანის უფლებათა სისტემურ, სახელმწიფოს მიერ ნებადართულ დარღვევებზე, რომლებიც მიზნად ისახავს პროტესტის ჩახშობას და ყოველ ეტაპზე თან ახლავს უსამართლობის ციკლი“, - აღნიშნულია ანგარიშში.