"თქვენ ხართ ის ადამიანები, ვინც ბავშვებს ახალ წელს ართმევთ" - ლაშა ტალახაძე "ტვ პირველის" ჟურნალისტს
თავისუფლების მოედანზე ცოტა ხნის წინ დეპუტატები ლაშა ტალახაძე და გენო პეტრიაშვილი გამოჩნდნენ. ისინი მოქალაქეთა იმ ნაწილთან ერთად იმყოფებოდნენ, რომლებიც დედაქალაქის მთავარ გამზირზე ნაძვის ხის ანთების ცერემონიას უნდა დასწრებოდნენ.
გენო პეტრიაშვილმა "ტვ პირველს" განუცხადა, რომ მათთან კომენტარს არ გააკეთებდა, "სანამ მათ ამომრჩევლებს პატივს არ სცემდნენ". ხოლო ლაშა ტალახაძემ აღნიშნა:
"თქვენ ხართ ის ადამიანები, ვინც ბავშვებს ახალ წელს ართმევთ, მაგრამ არ გამოგივათ".
ასევე ადგილზე იმყოფებოდა უმრავლესობის ლიდერი მამუკა მდინარაძე. მან ადგილზე შეკრებილ მოქალაქეებს, რომლებიც ღონისძიების გამო ჭიჭინაძის ქუჩაზე იმყოფებოდა, დაშლისკენ მოუწოდა.
დღეს, პარლამენტის წინ დაანონსებული ნაძვის ხის ანთების ცერემონია გაურკვეველი დროით გადაიდო. როგორც კახა კალაძემ აღნიშნა, ადგილზე უკვე ჰქონდა ადგილი პროვოკაციას, რის გამოც მოქალაქეების უსაფრთხოების მიზნით, აღნიშნული გადაწყვეტილება მიიღო.
წაიკითხეთ ასევე: