აქცია, მობილიზებული საპოლიციო ძალები, წყლის ჭავლის მანქანა - რა ხდება რუსთაველზე, სადაც ნაძვის ხის ანთება იგეგმება? (ფოტოები)

პარლამენტის შენობის წინა ფასადი საახალწლო ილუმინაციებით განათდა.

პარალელურად, ნაძვის ხესთან მოეწყო ეკრანები წარწერით "თბილისის მერია გილოცავთ ახალ წელს“, "გამარჯვებებით სავსე ქალაქი“.

ნაძვის ხესთან მოწყობილია სცენა, სადაც ხმის აპარატურა მიიტანეს.

როგორც ცნობილია, 19:00 საათზე, ნაძვის ხის ანთება იგეგმება. ადგილზე მიმდინარეობს საპროტესტო აქცია.

• ადგილზე, სადაც აქცია მიმდინარეობს, საპოლიციო ძალები განლაგდნენ. კერძოდ, პოლიციის დანაყოფები განლაგებულები არიან უშუალოდ მოსწავლე-ახალგაზრდობის სასახლის წინ და მის მოპირდაპირედ, რუსთაველის გამზირზე.

ამასთან, საპატრულოსა და კრიმინალური პოლიციის წარმომადგენლები იმყოფებიან, როგორც 9 აპრილის, ისე, ჩიტაძის ქუჩებზე.

გარდა ამისა, თავისუფლების მოედნის მიმდებარე ტერიტორიაზე დგას წყლის ჭავლის მანქანებიც.