“საქართველო კრიტიკულ გზაგასაყარზეა...“ - თბილისში ვიზიტად მყოფი 7 ევროპარლამენტარი ევროკავშირის უმაღლეს წარმომადგენელს კაია კალასსა და ევროკომისარს მიმართავს

“ქართულმა ოცნებამ” ევროატლანტიკური ინტეგრაციის შესახებ კონსტიტუციური ვალდებულება გათელა და ევროპულ მისწრაფებებს უღალატა“ - ამის შესახებ ერთობლივ წერილს შვიდი ევროპარლამენტარი აქვეყნებს, რომლებიც 12 დეკემბერს ვიზიტით თბილისში იმყოფებოდნენ.

• ევროპარლამენტარები ერთობლივი წერილით ევროკავშირის უმაღლეს წარმომადგენელს, კაია კალასსა და გაფართოების საკითხებში ევროკომისარს, მარტა კოსს მიმართავენ.

“ჩვენ, ევროპარლამენტის წევრების მრავალპარტიული დელეგაცია, ვეწვიეთ თბილისს 2024 წლის 12 დეკემბერს, რათა მხარდაჭერა გამოგვეხატა ქართველი ხალხისადმი, რომელიც ახლა საკუთარი ქვეყნის ევროპული მომავლისთვის იბრძვის. შევხვდით პრეზიდენტ ზურაბიშვილს, ოპოზიციურ პარტიებს, სახალხო დამცველს, სამოქალაქო საზოგადოებას და დამოუკიდებელ მედიას, რომელთაგან ყველამ ნათელი მოჰფინა ქვეყანაში შექმნილ ვითარებას, რომელიც გაყალბებულ საპარლამენტო არჩევნებსა და საზოგადოების, ოპოზიციისა და დამოუკიდებელი მედიის წინააღმდეგ სასტიკ რეპრესიებს მოყვა.

საქართველო კრიტიკულ გზაგასაყარზეა. მისი დემოკრატიული მომავალი სასწორზეა. ევრო-ატლანტიკური ინტეგრაციისადმი სწრაფვის შესახებ კონსტიტუციური ვალდებულება გათელილ იქნა მმართველი “ქართული ოცნების” მიერ. ევროპულ მისწრაფებებს, რომლებსაც ქართველების უდიდესი უმრავლესობა უჭერს მხარს, უღალატეს.

საქართველოში ჩავედით, რათა გვეჩვენებინა მორალური და პოლიტიკური მხარდაჭერა პრეზიდენტ ზურაბიშვილისადმი, დემოკრატიული ოპოზიციისადმი და, უფრო ფართოდ, სამოქალაქო საზოგადოებისადმი. მათი ბრძოლა გულწრფელია. მათ გვერდში ვუდგავართ“, - ნათქვამია წერილში.

• წერილში ევროპარლამენტარები აღნიშნავენ, რომ ბოლო საპარლამენტო არჩევნების აღიარება არ შეიძლება, ახალი პარლამენტი არსებული ქართული წესებისა და პროცედურების დარღვევით შეიკრიბა.

“მხარს ვუჭერთ საჯარო მოხელეთა დიდ და მზარდ რაოდენობას, რომლებმაც ხელი მოაწერეს განცხადებებს, თანამდებობები დატოვეს და პროტესტებს შეუერთდნენ დემოკრატიისთვის საბრძოლველად, საკუთარი კარიერებისა და საარსებო წყაროების რისკის ფასად; ისევე როგორც კანონის უზენაესობის დარჩენილ დამოუკიდებელ ინსტიტუტებს, როგორიცაა სახალხო დამცველი - რომლებიც აგრძელებენ სამართლის ძიებას სახელმწიფოს მხრიდან მნიშვნელოვანი ზეწოლის ფონზე. პროტესტები საქართველოს მოსახლეობის დიდ წილს მოიცავს, რომლებიც ქვეყნის მასშტაბით დიდი და პატარა ქალაქების, სოფლების ქუჩებში გამოვიდნენ, რითაც აჩვენებენ, რომ არალეგიტიმური მმართველი პარტიის გადაწყვეტილების უარყოფა ფართოდ გავრცელებულია საზოგადოებაში.

ევროპარლამენტსა და წევრ ქვეყნებში ჩავიტანთ დრამატულ მესიჯს, რომელიც დაუყოვნებლივ ქმედებას მოითხოვს. ჩვენი მყარი რწმენაა, რომ ბოლო საპარლამენტო არჩევნების აღიარება არ შეიძლება; ახალი პარლამენტი არსებული ქართული წესებისა და პროცედურების დარღვევით შეიკრიბა. ასეთ კონტექსტში, ახალი პრეზიდენტის არჩევას ლეგიტიმაცია დააკლდება. მეტიც, მოქალაქეებისა და დამოუკიდებელი ჟურნალისტების წინააღმდეგ რეპრესიების დონე უპრეცედენტო და მიუღებელია”, - ნათქვამი წერილში.

წერილში არის მოწოდება, “ცალმხრივი ინდივიდუალური სანქციები დაწესებაზე, რაიმე დაყოვნების გარეშე“, ამასთან, ევროპამ აშშ-ის ადმინისტრაციასთან თანამშრომლობით უნდა განიხილოს შემდგომი ეკონომიკური სანქციები.

“ევროკავშირმა დაუყოვნებლივ უნდა შემოიღოს სანქციები ყველა ლიდერი პოლიტიკური ფიგურის წინააღმდეგ, ვინც როლი ითამაშა დემოკრატიული უკუსვლის ორკესტრირებაში, მძიმე საარჩევნო დარღვევებში და ასობით მშვიდობიანი დემონსტრანტის წინააღმდეგ სასტიკ ძალადობაში. მოვუწოდებთ [ევროკავშირის] საბჭოს, ევროკომისიასა და ევროკავშირის საგარეო ქმედებათა სამსახურს, რომ ამ მხრივ დაუყოვნებლივ იმოქმედონ. ინდივიდუალურ წევრ ქვეყნებს მოვუწოდებთ, ცალმხრივი ინდივიდუალური სანქციები დააწესონ რაიმე დაყოვნების გარეშე. ევროკავშირის ლიდერები საქართველოში უნდა ჩავიდნენ, რათა აჩვენონ სოლიდარობა და თავი უნდა შეიკავონ მმართველი “ქართული ოცნების” პარტიის ლიდერებთან და წარმომადგენლებთან შეხვედრისგან, ხოლო ევროკომისიამ და წევრმა სახელმწიფოებმა დამოუკიდებელი ქართული მედიისთვის დაუყოვნებლივი სასწრაფო დაფინანსება უნდა გამოყონ და საქართველოს ევროპული მომავლისთვის ევროკავშირის სპეციალური წარმომადგენლის დანიშვნა უნდა განიხილონ. აშშ-ის ადმინისტრაციასთან თანამშრომლობაში უნდა განიხილოს შემდგომი ეკონომიკური სანქციები. როგორც ამას ჩვენი ბოლო რეზოლუციები აჩვენებს, ევროპარლამენტი მყარად დგას ქართველ ხალხთან და მათ ევრო-ატლანტიკურ მისწრაფებებთან. ველით, რომ ყველა სხვა ევროკავშირის ინსტიტუტი და წევრი სახელმწიფო მოგვბაძავს. ახლანდელი პოლიტიკური კრიზისის განმუხტვა ახალი არჩევნებითაა შესაძლებელი, რომელიც ერთი წლის ფარგლებში გაუმჯობესებულ საარჩევნო გარემოში დამოუკიდებელი და უპარტიო საარჩევნო ადმინისტრაციის მიერ ჩატარდება, საერთაშორისო მეთვალყურეობის ქვეშ. მოვითხოვთ ყველა პოლიტიკური პატიმრის დაუყოვნებლივ და უპირობო გათავისუფლებას, მათ შორის ყველა დაკავებული დემონსტრანტის გათავისუფლებას, წამების შეწყვეტას და დამოუკიდებელი მედიის, დემოკრატიული პოლიტიკური პარტიებისა და მათი ლიდერების შევიწროების დასრულებას. ევროპარლამენტი ქართველ ხალხთან და მათ ევრო-ატლანტიკურ მისწრაფებებთან დგას,” - ნათქვამია განცხადებაში.

ხელმომწერები არიან: სერგეი ლაგოდინსკი, რასა იუკნევიჩიენე, ნატალი ლუაზო, მიჰგავს შჩერბა, ტობიას კრემერი, რენიე ვან ლანშოტი და ბერნარდ გუეტა.