საპატრიარქოს საზოგადოებასთან ურთიერთობის სამსახურის ხელმძღვანელი დეკანოზი ანდრია ჯაღმაიძე დღეს, აქციის მონაწილეებსა და მამა შალვა კეკელიას შორის მომხდარ სიტყვიერ დაპირისპირებას სოციალურ ქსელში ეხმაურება:
“რამდენადაც სწორად არ უნდა ეჩვენებოდეს ვინმეს საკუთარი პოზიცია, ეთიკისაგან სრულიად დაცლილი მეთოდით მოქმედება, სიკეთეს ვერ მოუტანს ქვეყანას.
ის რაც დღეს ვაკის მაცხოვრის ფერიცვალების ტაძარში მოხდა, თავისი სიმძიმით უტოლდება ეკლესიების დარბევისა და ქრისტიანთა დევნის ისტორიულ მოვლენებს. დღეს ისმის კატეგორიული მოთხოვნა მოყვასისადმი - ჩემს შეხედულებას თუ არ იზიარებ, ქვეყნის მტერი ხარ, ესეც ძალიან ჰგავს, "ხალხის მტრებად" გამოცხადების კამპანიას უახლეს წარსულში.
დღეს გავრცელდა საქართველოს კათოლიკოს პატრიარქის მოწოდება ურთიერთ პატივისცემასა და ურთიერთ სიყვარულის შესახებ, მეტი სიყვარული და წინდახედულობა გვმართებს. ყველანი უნდა შევებრძოლოთ სიძულვილს და არა ერთმანეთს. მთავარი მტერი კაცობრიობისა არის ურთიერთგაუტანლობა.
სიყვარულის მქადაგებელი ანდრია პირველწოდებული იყოს ჩვენი მფარველი!“ - წერს მამა ანდრია ჯაღმაიძე.
შეგახსენებთ, დღეს ჭავჭავაძის გამზირზე მამა შალვა კეკელიასა და აქციის მონაწილეებს შორის სიტყვიერი დაპირისპირება იყო.
არსებული ინფორმაციით დაპირისპირება დაიწყო მას შემდეგ, რაც ჭავჭავაძის გამზირზე მსვლელობით მიმავალმა დემონსტრანტებმა დაინახეს თუ როგორ უყურებდნენ მათ სასულიერო პირები, რის შემდეგაც აქციის მონაწილეებმა მათ სთხოვეს, რომ აქციას შეერთებოდნენ.
"ჩვენთან ერთად წამოდი.... იესო დაწვეს რუსთაველზე? ჩინეთიდან გამოწერილ კუბოზე იყო იესო გამოსახული? რას ატყუებთ ხალხს, ვის ატყუებთ, იტყუებით, მატყუარები ხართ, თქვენ ხალხის გვერდით უნდა იდგეთ" - ასე მიმართა აქციის მონაწილემ მამა შალვა კეკელიას.
კიდევ ერთმა დემონსტრანტმა კი სასულიერო პირს ასე მიმართა - "უნდა აპროტესტებდეთ, თქვენ კი აქ ზიხართ თბილად".
შალვა კეკელიას პასუხი კი ასეთი იყო:
"აქ ვარ, გამოვედი ხალხში, ხალხში ვდგავარ და მთელი ჩემი ცხოვრება ხალხში ვიდექი... ვაპროტესტებ, საშინელებაა, ეგ არის საშინელება, ადამიანის ცემაზე ცუდი დედამიწაზე არაფერი არ არის, ადამიანზე ხელის აღმართვა, ბავშვის ცემა, არის ღვთის გმობა და ადამიანის გმობა და ეს ქადაგებაშიც ვთქვი".
ჭავჭავაძის გამზირზე მომხდარი სიტყვიერი დაპირისპირების შემდეგ მამა შალვა კეკელიამ ვიდეომიმართვა გაავრცელა. მისი თქმით, რაც მოხდა, ძალადობაა.
იხილეთ ასევე:
- "ჩინეთიდან გამოწერილ კუბოზე იყო იესო გამოსახული? რას ატყუებთ ხალხს, თქვენ ხალხის გვერდით უნდა იდგეთ" - დაპირისპირება მამა შალვა კეკელიასა და აქციის მონაწილეებს შორის (ვიდეო)
- "ვინც რუსეთის პოლიტიკას ემხრობა, ყველა წყეული იყოს" - მამა შალვა კეკელია (ვიდეო)
