“სადაზღვევო კომპანიას არ უხდიდა  ჯერ ნიკა გვარამია 2020 წლიდან და მერე გიორგი გაბუნია“ - “მთავარი არხის“ ერთ-ერთი დირექტორი განცხადებას ავრცელებს

“მთავარი არხის“ ერთ-ერთი დირექტორი გიორგი ქურდაძე განცხადებას ავრცელებს. განცხადებაში ქურდაძე აღნიშნავს, რომ “ყველა ტყუილს“ უპასუხებს შესაბამისი დოკუმენტებით.

“დღეს და გუშინ "მთავარი არხის" დირექტორი გიორგი გაბუნია და არხის იურისტი დიმიტრი საძაგლიშვილი აცხადებენ, რომ თურმე მე ხელს ვუშლი დაზღვევის თანხის გადახდას ამ კრიტიკულად მნიშვნელოვან დროს. და სწორედ, დღეს მივიღე მეილით პსპ-ს დაზღვევისგან წერილი, რომ "მთავარ არხს" არ გადაუხდია დაზღვევის თანხა 2020 წლიდან და დავალიანება დაგროვილია 818,921.50 ლარი (რვა ასი ათასი ლარი).

საერთოდ, რას ემსახურებოდა ან ვის ინტერესებში იყო გუშინდელი აბსურდული გამოსვლა გიორგი გაბუნიასი და დღეს მოსული წერილი, თქვენ გასაზღვრეთ.

ყველა ტყუილზე ვუპასუხებ შესაბამისი დოკუმენტებით, რასაც ასე ურცხვად ტირაჟირებენ. დაზღვევის თანხას არ უხდიდა სადაზღვევო კომპანიას ჯერ ნიკა გვარამია 2020 წლიდან და მერე გიორგი გაბუნია დღემდე. მე რა შუაში ვარ!", - აღნიშნავს გიორგი ქურდაძე განცხადებაში.

• ცნობისთვის, გუშინ არხის გენდირექტორმა გიორგი გაბუნიამ ბრიფინგზე აღნიშნა, რომ ზაზა ოქუაშვილმა გადაწყვიტა, დახუროს “მთავარი არხი“.

"ამას ოქუაშვილი აკეთებს რამდენიმე თვის წინ, მის მიერ დანიშნული დირექტორის და მისი დავალებების მორჩილი შემსრულებლის, გოგი ქურდაძის ხელით" - აღნიშნა გაბუნიამ. გიორგი გაბუნიას თქმით, ქურდაძე სპეციალურად დაინიშნა კომპანიაში ოქუაშვილის წარდგინებით ერთადერთი ამოცანით - რომ ხსენებულ დამფუძნებელს ჰქონოდა არხზე ქმედითი ბერკეტი პირადი მიზნების მისაღწევად.

იხილეთ ასევე:

• "მიუხედავად ნიკა გვარამიასა და გიორგი გაბუნიას მხრიდან "მთავარი არხის" გაძარცვისა, ტელეკომპანიის დახურვაზე არც მიფიქრია..." - ზაზა ოქუაშვილის განცხადება
• "აიძულეს თვეში 15 000 ლარი ეხადა ოქუაშვილის მეუღლე ნატო ჩხეიძისთვის... არჩევნები რომ მოახლოვდა პარტიის ოფისში გამომეცხადა ჩხეიძე, "სამი კაცი გვეკუთვნის სიაშიო" - გვარამიას განცხადება
• "ჩემს მიერ შეთავაზებული იქნა ნანუკა ჟორჟოლიანის და გია ჭანტურიას კანდიდატურები არხის გენდირექტორის თანამდებობაზე... ეს შეთავაზებები ახლაც ძალაშია" - ზაზა ოქუაშვილის მორიგი განცხადება