ევროპარლამენტარების ვიზიტი თბილისში: შეხვედრა პრეზიდენტთან და ოპოზიციური პარტიების ლიდერებთან - რა განცხადებები კეთდება

საქართველოს პრეზიდენტი, სალომე ზურაბიშვილი ორბელიანების სასახლეში ევროპარლამენტარებთან შეხვედრას მართავს.

• როგორც ცნობილია, მანამდე, ევროპარლამენტარები სხვადასხვა ოპოზიციური პარტიების ლიდერებსაც შეხვდნენ, კერძოდ, „ერთიანობა - ნაციონალური მოძრაობის“, „კოალიცია ცვლილებისთვის“, „ძლიერი საქართველოსა“ და „გახარია საქართველოსთვის“ წარმომადგენლებს.

ვიზიტის ფარგლებში, შეხვედრა ასევე, დაგეგმილია არასამთავრობო ორგანიზაციებთან და მედიასთან.

• რა განცხადებები გაკეთდა ოპოზიციური პარტიის ლიდერების მხრიდან შეხვედრის შემდეგ?

"კოალიცია ცვლილებისთვის" ერთ-ერთმა ლიდერი, ნიკა მელია:

"ყველასთვის ცხადია, რომ ქართული სახელმწიფო მანამ სანამ არის მიტაცებული, არის საერთაშორისო იზოლაციაში. ეს ყველასთვის ცნობილია, მაგრამ ნებისმიერი საუკეთესო ქომაგი, ვინც დასავლეთიდან ჩამოვა, საერთაშორისო პარტნიორი, მსგავსად დღევანდელი ჩვენი სტუმრებისა, მე ვფიქრობ, უკვე აცნობიერებენ, რომ გაკეთებულ განცხადებებს და შემუშავებულ რეზოლუციებს სჭირდება აღსრულება. რეზოლუციას როდესაც გამოსცემ, უნდა აღსრულდეს, წინააღმდეგ შემთხვევაში ასეთმა რეზოლუციამ შეიძლება ფასიც კი დაკარგოს. გასაგებია, რომ ევროკავშირის ფარგლებში სხვადასხვა ინსტიტუტებია, ამ შემთხვევაში აღმასრულებელ რგოლს უნდა ეთამაშა მნიშვნელოვანი როლი დღემდე. მე ვფიქრობ, ის აუცილებლად ადეკვატური იქნება ქართველი ხალხის ნების აღსრულების პროცესში. უბრალოდ, ევროპარლამენტარებმა უნდა იცოდნენ, რომ მათ მიერ დაფიქსირებული ნებისმიერი პოზიცია და გამოცემული ნებისმიერი რეზოლუცია არის მისასალმებელი, მაგრამ იმ კონტექსტში, როდესაც კვირიდან კვირამდე, თბილისის ქუჩებში, ასობით ადამიანს აწამებენ და რეჟიმი სულ უფრო ბრუტალური ხდება, არც ერთი დღე დასაკარგი არ არის. ამასთან დაკავშირებით მე ვფიქრობ, ისინი ყურად იღებენ ნაწამები ქართველი ხალხის ნებასა და სურვილს,“ - განაცხადა მელიამ.

"ერთიანობა ნაციონალური მოძრაობის“ ერთ-ერთი ლიდერი თინა ბოკუჩავა:

რეპრესიები, რომლებიც 2 კვირის განმავლობაში ვიხილეთ, ადასტურებს, რომ ბიძინა ივანიშვილი საკუთარ ხალხს არ იცნობს და ამ რეპრესიებმა ჩვენ შეგვაკავშირა და დაგვარწმუნა იმაში, რომ დღეს ნამდვილად გადამწყვეტი ბრძოლაა ჩვენი ქვეყნის ევროპული მომავლისთვის. ძალიან მიხარია, რომ ევროპარლამენტის ინტერფრაქციული ჯგუფი ჩამოსულია საქართველოში ქართველი ხალხის მხარდასაჭერად.

განიხილება სანქციები. წინა მინისტერიალზე, რომელსაც მეც ვესწრებოდი ბრიუსელში, მაშინ ჯერ კიდევ საუბარი იყო ვიზალიბერალიზაციის შეჩერებაზე, ახლა ვიცით, რომ ბრიუსელში საუბარია ასოცირების ხელშეკრულების შეჩერებაზეც, ისვე როგორც ინდივიდუალური სანქციებზე ბიძინა ივანიშვილისა და მისი გარემოცვის წინააღმდეგ, თუმცა ამას კონსენსუსი სჭირდება, რომელსაც ივანიშვილს მოკავშირე ვიქტორ ორბანი საბჭოში ბლოკავს, თუმცა განიხილება ყველა ინსტრუმენტი, იმისთვის, რომ ივანიშვილის რეჟიმის შეზღუდვა მოხდეს, საერთაშორისო თანამეგობრობის მხრიდან“,- განაცხადა თინა ბოკუჩავამ.

"ძლიერი საქართველოს" ერთ-ერთი ლიდერი ბადრი ჯაფარიძე:

„პირველ რიგში, უნდა გვესმოდეს, რომ ევროპარლამენტარები, რომლებიც ჩამოსული არიან, ჩვენი ხალხის, ჩვენი სახელმწიფოს ერთგული მეგობრები არიან. ისინი არიან ჩვენი ქვეყნის ევროპული მომავლის დიდი მხარდამჭერები. ეს არის ძალიან მნიშვნელოვანი. ის რომ ისინი კრიტიკულ შეფასებებს აკეთებენ „ქართული ონების“, ეს არის სწორედ იმის მანიშნებელი, რომ ეს ადამიანები რჩებიან ჩვენი ხალხის ერთგული. ეს კრიტიკული შეფასებები არის ობიექტური და ის ემსახურება იმას, რომ ქვეყანამ არ დაკარგოს ევროპული მომავალი. დღეს გვქონდა საუბარი იმ ვითარებაზე, რომელიც ჩვენს ქვეყანაშია შექმნილი. ცხადია, რომ ჩვენი პოზიცია არის უცვლელი, რომ გამოსავალი არის ახალი არჩევნები, ახალი ადმინისტრაციით. ეს შეარიგებს საზოგადოებას, ეს თავიდან აგვარიდებს შემდგომ ესკალაციას. ამ გადაწყვეტილების გაწელვა, „ქართული ოცნების“ მიერ თავის მოკატუნება, ვითომ ქვეყანაში არაფერი ხდება მხოლოდ და მხოლოდ დაამძიმებს ვითარებას. ამიტომ ჩვენ ყველამ უნდა ვიფიქროთ, როგორ განვმუხტოთ ეს სიტუაცია და განმუხტვის ერთადერთი გზა არის შეთანხმება ახალი არჩევნების ჩატარებაზე”, - განაცხადა ჯაფარიძემ.