“იტყუებოდნენ, შუბლის ძარღვი გაწყვეტილი ჰქონდა ორივე მოწმეს“ - სასამართლომ პედიატრ კოტე ჩახუნაშვილს 2 500-ლარიანი ჯარიმა დააკისრა

ადმინისტრაციული წესით დაკავებული პედიატრი კონსტანტინე ჩახუნაშვილი სასამართლომ ადმინისტრაციულ სამართალდამრღვევად ცნო. თბილისის საქალაქო სასამართლოს მოსამართლე ლელა ცაგარეიშვილის გადაწყვეტილებით, მას ადმინისტრაციული სახდელის სახით 2 500-ლარიანი ჯარიმა დააკისრა.

კონსტანტინე ჩახუნაშვილი სხდომათა დარბაზიდან გათავისუფლდა.

“როგორც ნახეთ, იტყუებოდნენ და ორივე მოწმეს შუბლის ძარღვი ჰქონდა გაწყვეტილი. დაკავების დროს, სადაც ვსაუბრობდი, იქ, თვითონ ჰქონდათ პრეტენზია, რომ ვიღაცები იტყუებიან, სცემენ და ასე გამოდიანო და ახლა, მაგალითად, ერთ-ერთმა ცრუ მოწმემ შუბლის ძარღვი გაიწყვიტა, რომელიც დაკავების დროს იქ, საერთოდ არ ყოფილა.

თვითონ იქ, პრეტენზია ჰქონდათ- “აი, რომ არ გცემთ, იმიტომ არ ვართ რუსული “მილიცია“ და რუსული “მილიცია მარტო“ ეს კი არ არის, რუსული “მილიცია“ არის ის, რასაც ახლა აკეთებენ - ცრუ მოწმეების ბრალდებებით რომ გიჭერენ. თუნდაც ჩვენი ერთ-ერთი კოლეგა, გიორგი ახობაძე ე.წ. ჩადებით არის დაჭერილი. ჩვენ ყველაფერს გავაკეთებთ, ახლა, მე და ჩემი მეგობრები აქციაზე წავალთ, იქ დავდგებით და გამოვხატავთ პროტესტს.

ყველას მოვუწოდებ, არ დაიღალოთ, ბოლომდე უნდა მივაწვეთ და ეს რეჟიმი არის დასასრულებელი“, - განაცხადა კოტე ჩახუნაშვილმა სასამართლოს დასრულების შემდეგ.

მას ადმინისტრაციულ სამართალდარღვევათა კოდექსის 173-ე მუხლით გათვალისწინებული ქმედების ჩადენას ედავებოდნენ, რაც პოლიციელისადმი დაუმორჩილებლობას გულისხმობს.

ჩახუნაშვილი 9 დეკემბერს, ნუცუბიძეზე იმ დროს დააკავეს, როცა აქციაზე მიდიოდა.

იხილეთ ასევე:

• "ბევრი კითხულობს კოტეს ამბავს და..." - რას წერს დაკავებული პედიატრის, კოტე ჩახუნაშვილის ძმა
• ვრცელდება დაკავებული პედიატრის წერილი იზოლატორიდან - რა დეტალები ხდება ცნობილი