აშშ-ში, ჩრდილოეთ კალიფორნიის სანაპიროსთან ძლიერი მიწისძვრა მოხდა - გამოცხადდა ცუნამის საფრთხე

აშშ-ში, ჩრდილოეთ კალიფორნიის სანაპიროსთან, 7.0 მაგნიტუდის სიმძლავრის მიწისძვრა მოხდა, ცუნამის შესახებ გაფრთხილება გამოცხადდა, - ამის შესახებ ინფორმაციას CNN-ი ავრცელებს. ძლიერ რყევას რამდენიმე შედარებით მხირე ბიძგიც მოჰყვა.

აშშ-ის გეოლოგიური სამსახურის ცნობით, მიწისძვრა ადგილობრივი დროით 10:44 საათზე ფერნდეილიდან, კალიფორნიის შტატი, 60 მილის დაშორებით მოხდა.

ცუნამის საფრთხის შესახებ გაფრთხილება ჩრდილოეთ კალიფორნიისა და ორეგონის შტატის სანაპირო ზოლის ნაწილებისთვის გამოცხადდა. ამ დროისთვის მნიშვნელოვანი ზიანის შესახებ ინფორმაცია არ ვრცელდება.

• განახლება 01:04

კალიფორნიასა და ორეგონში ცუნამის გაფრთხილება გაუქმდა.

"დამანგრეველი ცუნამი მოსალოდნელი არ არის", - განაცხადეს აშშ-ს გეოლოგიურ სამსახურში. მათი ცნობით, ოკეანის სიმაღლეში მცირე ცვლილებები შეიმჩნევა, თუმცა ეს საფრთხეს არ წარმოადგენს.