საქართველოს პრეზიდენტი, სალომე ზურაბიშვილი შინაგან საქმეთა სამინისტროს განსაკუთრებულ დავალებათა დეპარტამენტის ოპერატიული დაგეგმვის სამმართველოს უფროსის, ირაკლი შაიშმელაშვილის მიერ თანამდებობის დატოვებას ეხმაურება.
- "ღირსებით ევროპისკენ! ღირსეული ქართველი!" - წერს პრეზიდენტი "ფეისბუქზე".
შეგახსენებთ, რომ ირაკლი შაიშმელაშვილმა შს მინისტრის, ვახტანგ გომელაურის სახელზე დაწერილი პატაკი „ფეისბუქის“ საკუთარ გვერდზე თავად გამოაქვეყნა.
"გთხოვთ, ოჯახური პირობების გამო გამათავისუფლოთ დაკავებული თანამდებობიდან და დამითხოვოთ საქართველოს შინაგან საქმეთა სამინისტროს რიგებიდან“, - წერს პატაკში შაიშმელაშვილი.
შაიშმელაშვილი "ფეისბუქ" პოსტს, გადადგომის შესახებ განცხადებასთან ერთად, საქართველოსა და ევროკავშირის დროშების ნიშნებსაც ურთავს.
ასევე ყოფილი დეპუტატი გია ხუროშვილი "ფეისბუქზე" ავრცელებს ინფორმაციას, რომ საქართველო ერთმა სამართალდამცავმა დატოვა.
"ცოტაც გაუძელით ბიჭებო და გოგოებო!საქართველოს დატოვება მოახერხა ერთმა პოლიციელმა და თავი უსაფრთხო ქვეყანას შეაფარა!მისი ინფორმაციით: ყველა პოლიციელებს სცემენ, ვინც არ ემორჩილება რეჟიმს! ნაცემი არიან პოლიციელების ოჯახის წევრები და შვილებიო!
შიგნით დიდი ბუნტია! რეჟიმი ვეღარ უძლებს!მან მთხოვა რომ ეს ინფორმაცია თქვენთვის გადმომეცა, (იდენტიფიცირების გარეშე)სხვა პოლიციელებს გადმოგცათ: - ბიჭებო არ დანებდეთ, ჩვენ ისევ შევხვდებით ერთმანეთს, ევროპულ საქართველოში!" - წერს ხუროშვილი.
- ასევე "ტვ პირველის" ინფორმაციით, საქართველოს სანაპირო დაცვის საზღვაო უსაფრთხოების ბათუმის სამმართველოს უფროსმა საქართველო დატოვა. გოჩა ბერიძე ამბობს, რომ 22 წლის შემდეგ, იძულებული გახდა, მიეტოვებინა კარიერა და საქმე რომელსაც წლები შესწირა.
ბერიძე სოციალურ ქსელში წერს, რომ დარბევის დეპარტამენტის უფროსი და მისი ოთხი მოადგილე გადადგა.
"შსს - ში მიმდინარე ბოლო ცნობები! დარბევის დეპარტამენტის უფროსი და მისი ოთხი მოადგილე გადადგა + 16 ინსტრუქტორი + ფსიქოლოგიური მომზადების სამსახურის უფროსი და 12 თანამშრომელი + წყლის ჭავლის მანქანების ჯგუფი 16 კაცი! მეორე, მესამე და მეოთხე ასეულებში ბუნტია!"- წერს ბერიძე.
წაიკითხეთ ასევე:
