საპოლიციო ძალებმა რუსთაველის გამზირი მომიტინგეებისგან გაასუფთავეს - იყო დაკავებებიც

საპოლიციო ძალებმა რუსთაველის გამზირი მომიტინგეებისგან გაასუფთავეს. დედაქალაქის ცენტრალური გამზირიდან გადაიყვანეს როგორც ოპერასთან შეკრებილი დემონსტრანტები, ისე მეტრო “რუსთაველის“ მიმდებარედ მყოფი პირები.

გამზირის გასუფთავების შემდეგ აქციის მონაწილეებმა უკვე მიხეილ ზანდუკელის ქუჩაზე გადაინაცვლეს.

საპოლიციო ძალები და საპოლიციო მანქანები ამ დროისთვის დგანან ფილარმონიასთან. ასევე განლაგებულები არიან რესპუბლიკის მოედანზე.

ზანდუკელის ქუჩაზე შეკრებილი აქციის მონაწილეები სკანდირებენ - “გამოდი“.

ცოტა ხნის წინ სპეცრაზმმა რუსთაველის მეტროს მიმდებარედ აქციის მონაწილეები დაშალა. ასევე, დააკავეს რამდენიმე დემონსტრანტი.

მომიტინგეების ნაწილი მეტროსადგურ “რუსთაველის“ შენობაში შევიდა. სპეცრაზმისგან თავს ისინი სწორედ იქ აფარებენ.

ფოტო: გიორგი ჟამერაშვილი/IPN