ილია თოფურია მიმართვას ავრცელებს და თბილისში მიმდინარე მოვლენებს ეხმაურება - "მრცხვენია იმის ნახვა, თუ როგორ ექცევიან საქართველოს შვილებს"
UFC-ის მსოფლიო ჩემპიონი, ილია თოფურია ეხმაურება თბილისში მიმდინარე მოვლენებს და ამბობს, რომ მხარდაჭერას უცხადებს პროტესტანტებს.
- როგორც თოფურია წერს, ეწინააღმდეგება გადაწყვეტილებას, ევროკავშირში საქართველოს გაწევრიანების მოლაპარაკებების შეწყვეტის თაობაზე.
"ჩემი მკაფიო მხარდაჭერა ყველა იმ პროტესტანტის მიმართ, ვინც ჩვენს უფლებებსა და ამბიციებს იცავს. ვეწინააღმდეგები გადაწყვეტილებას, ევროკავშირში ჩვენი გაწევრიანების მოლაპარაკებების შეწყვეტის თაობაზე. მრცხვენია იმის ნახვა, თუ როგორ ექცევიან საქართველოს შვილებს. ამას თავისუფლება არ ჰქვია.
ჩვენ გვინდა უკეთესი მომავლის უზრუნველყოფა ჩვენი ქვეყნისთვის. აუცილებელია, რომ გავაგრძელოთ ჩვენი გზა ევროპულ ინტეგრაციაში, რადგან ეს ყველა მოქალაქისთვის შესაძლებლობებისა და პროგრესის მომავალია. ერთად უნდა ვიბრძოლოთ დემოკრატიული და თავისუფალი საქართველოსთვის" - წერს ილია თოფურია.
ცნობისთვის, რამდენიმე დღეს საქართველო მსოფლიო მედიისა და საზოგადოების ყურადღების ცენტრშია. ყველაფერი 28 ნოემბერს დაიწყო, როცა პრემიერმა გამოაცხადა, რომ საქართველო 2028 წლის ბოლომდე დღის წესრიგში არ დააყენებს ევროკავშირთან მოლაპარაკების გახსნის საკითხს.
მას შემდეგ, მეოთხე დღეა თბილისში მასშტაბური საპროტესტო აქციები მიმდინარეობს, რომელსაც პერიოდულად სპეცდანიშნულების რაზმი წყლის ჭავლითა და სპეციალური ტექნიკის გამოყენებით შლის.
წაიკითხეთ ასევე: