სპეცრაზმმა აქციის მონაწილეების დაშლა დაიწყო -ისმის გაფრთხილება - "დაიშალეთ!": უახლესი ცნობები რუსთაველის გამზირიდან

სპეციალური დანიშნულების რაზმმა ოპერის მიმდებარე ტერიტორიაზე გამაგრებული აქციის მონაწილეების დაშლა დაიწყო. აქციის დაშლის ღონისძიების დაწყებამდე გაისმა გამაფრთხილებელი ხმა, რომელიც მომიტინგეებს დაშლისკენ მოუწოდებდა.

საპოლიციო ძალებმა რუსთაველის გამზირზე აღმართული ხელოვნური ბარიკადები გაარღვიეს. ისინი იყენებენ წყლის ჭავლს, ასევე, ისვრიან ე.წ. გაზის კაფსულებსაც.

სპეცრაზმი გამოჩნდა ალ. ჭავჭავაძის ქუჩაზეც, სადაც მომიტინგეებს ასევე ხელოვნური ბარიკადები აქვთ აღმართული.

სპეციალური დანიშნულების რაზმი პარლამენტის ტერიტორიიდან ოპერის მიმართულებით დაიძრა, სადაც აქციის მონაწილეები არიან გამაგრებული. საპოლიციო ძალებს უკან სპეცტექნიკაც მიჰყვება. ისინი უკვე აქციის დაშლის ღონისძიებაში ჩაერთნენ. გაისმა გამაფრთხილებელი სიგნალიც.

მანამდე სპეცდანიშნულების რაზმის წარმომადგენლები რუსთაველის გამზირის პარალელურ ქუჩაზე - ლაღიძეზეც გამოჩნდნენ, რომლებმაც აღნიშნულ ტერიტორიაზე კორდონი გააკეთეს.

პარალელურად, თავისუფლების მოედანზე კვლავ რჩებიან განსაკუთრებულ დავალებათა დეპარტამენტის თანამშრომლები და, ასევე, სპეცტექნიკა.

რამდენიმე წუთის წინ საპოლიციო ძალებმა აქციის კიდევ ერთი მონაწილე იმის გამო დააკავეს, რომ ის სპეცრაზმთან ახლოს მივიდა.

• ამასთან, სპეცრაზმი განლაგდა რესპუბლიკის მოედნისა და რუსთაველის მეტროს კვეთაზე

პარალელურად, საპოლიციო ძალები მობილიზებული არიან რესპუბლიკის მოედანზე სპეცტექნიკასთან ერთად.

ფოტოები: ვანო გორგიშვილი