"მარკს სურს, მხარი დაუჭიროს ამერიკის ეროვნულ განახლებას ტრამპის ხელმძღვანელობით" - რა დეტალები ხდება ცნობილი ცუკერბერგისა და ტრამპის შეხვედრის შესახებ

Meta-ს აღმასრულებელი დირექტორი, მარკ ცუკერბერგი ამერიკის შეერთებული შტატების ახლად არჩეულ პრეზიდენტს, დონალდ ტრამპს შეხვდა. მედიის ცნობით, შეხვედრა ცუკერბერგმა თვითონ მოითხოვა.

• მარკმა და დონალდმა Mar-a-Lago-ში ისადილეს, სადაც ცუკერბერგი ტრამპის გარდა, ახლად არჩეული პრეზიდენტის ადმინისტრაციის წევრებსაც შეხვდა

"ახლა არის მნიშვნელოვანი ეტაპი ამერიკული ინოვაციებისა და მისი მომავლისთვის. მარკი მადლიერი ამ შეხვედრისთვის. მას ჰქონდა შესაძლებლობა შეხვედროდა პრეზიდენტ ტრამპს და მისი მომავალი ადმინისტრაციის წევრებს", - ამბობს Meta-ს სპიკერი.

• პოლიტიკის საკითხებში თეთრი სახლის ადმინისტრაციის უფროსის მოადგილე, სტივენ მილერი ადასტურებს ინფორმაციას შეხვედრის შესახებ.

"მარკ ცუკერბერგმა მკაფიოდ გამოხატა თავისი სურვილი, ყოფილიყო მხარდამჭერი და პარტნიორი იმ ცვლილებების, რომელსაც ვხედავთ მთელ ამერიკაში და ასევე მსოფლიოში დონალდ ტრამპის ხელმძღვანელობით", - აცხადებს მილერი.

"მარკ ცუკერბერგს, ბევრი ბიზნეს ლიდერის მსგავსად ესმის, რომ დონალდ ტრამპი არის ცვლილებების ელჩი, კეთილდღეობის ელჩი", - დასძინა მან.

"მარკს აქვს საკუთარი ინტერესები, მას აქვს საკუთარი კომპანია და აქვს საკუთარი დღის წესრიგი, მაგრამ მკაფიოდ აჩვენა, რომ სურს მხარი დაუჭიროს ამერიკის ეროვნულ განახლებას პრეზიდენტ ტრამპის ხელმძღვანელობით",- დასძინა მილერმა.