"დაუჯერებელია. რომ ცოცხალია" - ბრიტანეთში იპოვეს მოლაშქრე, რომელიც 5 კვირა დაკარგული იყო: როგორ მოახერხა მან გადარჩენა?

მოლაშქრე, რომელიც ბრიტანეთში, ტყეში ხუთ კვირაზე მეტი დროის განმავლობაში იყო დაკარგული, ცოცხალი იპოვეს. 20 წლის სემ ბენასტიკი რომელიც სალაშქროდ იმყოფებოდა, 19 ოქტომბერს გაუჩინარდა.

• ხელისუფლებამ სამძებრო სამუშაოები ოქტომბრის ბოლოს შეაჩერა. იმ მხარეში, სადაც ახალგაზრდა მამაკაცი დაიკარგა, ჰაერის ტემპერატურა ზოგიერთ დღეს -20 გრადუსი იყო, ამიტომ ბიჭის გადარჩენის იმედი თითქმის აღარ არსებობდა.

ბენასტიკი გასულ სამშაბათს ორმა მოქალაქემ იპოვა. ეს ადამიანები ტყეში სამუშაოდ იმყოფებოდნენ, რა დროსაც ახალგაზრდა მამაკაცი დაინახეს - მათ იცნეს, რომ ის დაკარგული მოლაშქრე იყო.

• ბენასტიკი თავდაპირველად ავტომობილში რჩებოდა, შემდეგ მდინარის მიმართულებით წავიდა, სადაც დაბანაკდა და იქ დაახლოებით 15 დღე გაატარა, თუმცა შემდეგ გზა დაკარგა. ბიჭს თან ჰქონდა ზურგჩანთა, საძილე ტომარა და სხვა საკემპინგო ნივთები, საკვები, თუმცა შეზღუდული რაოდენობით.

ამინდი გაუარესდა და მცირე თოვლი მოვიდა.

"მას ძალიან რთულ პირობებში მოუწია გაძლება. ასეთ პირობებში - შეზღუდული მარაგით, აღჭურვილობით და საკვებით, წარმოუდგენელია გადარჩენა", - აცხადებენ სამაშველო სამსახურში.

სამაშველო სამსახურის უფროსის, ადამ ჰოკინსის თქმით, მსგავს პირობებში გადარჩენა დიდი გამოცდილების მქონე ადამიანსაც გაუჭირდებოდა.

აღსანიშნავია, რომ დაკარგულ მოლაშქრეს მაშველები ყველა მეთოდით ეძებდნენ, დრონებით, ვერტმფრენით, თუმცა ძიების პროცესი უშედეგო იყო და ბოლოს მათ იმედი გადაეწურათ.

• ბენასტიკის მდგომარეობის შესახებ, ასევე იმის თაობაზე, თუ როგორ მოახერხა გადარჩენა, ცოტა რამ არის ცნობილი. ის ამჟამად საავადმყოფოშია.

ცნობილი ხდება, რომ მან დაჭრა საძილე ტომარა და მისი ნაწილები სხეულზე შემოიხვია, რათა თბილად ყოფილიყო. ასევე ცნობილია, რომ ახალგაზრდა მამაკაცის მდგომარეობა საკმაოდ მძიმე იყო და ფეხზე დგომა უჭირდა, როცა სასწრაფო დახმარების მანქანაში ჩასვეს.