ხანგრძლივი მკურნალობის შემდეგ, უკრაინაში დაჭრილი 25 წლის სპარტაკ ლეკიაშვილი გარდაიცვალა

ხანგრძლივი მკურნალობის შემდეგ, საფრანგეთის ერთ-ერთ კლინიკაში უკრაინაში დაჭრილი 25 წლის სპარტაკ ლეკიაშვილი გარდაიცვალა. ინფორმაციას AMBEBI.GE-ს ლეკიაშვილის ახლობლებმა დაუდასტურეს.

სპარტაკ ლეკიაშვილი გასულ წელს უკრაინის ინტერნაციონალურ ბატალიონში იბრძოდა, 10 მაისს ბახმუტში საარტილერიო ცეცხლის ქვეშ მოყვა და უმძიმესი ჭრილობა მიიღო. მას შემდეგ სიცოცხლისთვის იბრძოდა: დამოუკიდებლად ვერ გადაადგილდებოდა, ვერ ხედავდა, კიდურებიდან მხოლოდ ხელებს ამოძრავებდა, ფეხებს ოდნავ.

მას შეყვარებული ვიქტორია უვლიდა, რომელიც ამბობდა, რომ სპარტაკს არ მიატოვებდა, რადგან მისი და მისი ქვეყნის დასაცავად იბრძოდა.

"მადლობელი ვარ მისი, მე ვერ ჩავედი, ის არის ჩემი შვილის გვერდით. ჩვენს შორის რაღაც უთანხმოება იყო, მაგრამ ახლა ამის დრო არ არის. ოღონდ ჩემი დევივით შვილი გამოჯანმრთელდეს და ვისთანაც უნდა, იმასთან იყოს. ამ რამდენიმე დღის წინაც მითხრა, სასწრაფოდ უნდა შენს შვილს შველაო. ყველას გეხვეწებით, ვისაც როგორ შეგიძლიათ, დამეხმარეთ, გადამირჩინეთ ჩემი მებრძოლი შვილი!" - ჰყვებოდა AMBEBI.GE-სთან ქართველი მებრძოლის დედა.