ერთი შვილი, საინტერესო კარიერა და უძრავი ქონება - ვინ არის ქალი, რომელიც ქვეყნის პირველი დიპლომატი გახდება?
პრემიერ-მინისტრმა ირაკლი კობახიძემ მომავალ მინისტრთა კაბინეტში საგარეო საქმეთა მინისტრის მოადგილედ მაკა ბოჭორიშვილის კანდიდატურა წარადგინა.
მან წარდგენისას პრემიერსა და "ქართული ოცნების“ გუნდს ნდობის გამოცხადებისთვის მადლობა გადაუხადა და აღნიშნა, რომ საგარეო საქმეთა სამინისტროში მისი მისვლა სახლში დაბრუნებასავითაა.
"პირველ რიგში, დიდ მადლობას გადავუხდი პრემიერ-მინისტრს ირაკლი კობახიძეს, "ქართული ოცნების“ გუნდს იმ ნდობისთვის, რომელიც მე გამომიცხადეს. ჩვენი ქვეყნის წინაშე მდგარი გამოწვევებიდან გამომდინარე, დღეს საგარეო პოლიტიკური განხორციელება მოითხოვს განსაკუთრებულ გამბედაობას და იმავდროულად, სიფრთხილეს. ჩემთვის ეს არის ძალიან დიდი პასუხისმგებლობა, ვუხელმძღვანელო საგარეო მიმართულებას, განსაკუთრებით მაშინ, როდესაც ჩვენ ვხედავთ თუ რამხელა გავლენას ახდენს საგარეო ფაქტორები ჩვენი ქვეყნის ყოველდღიურობაზე, ჩვენი ქვეყნის შიდა პოლიტიკაზე და პირიქით, როგორ ხდება ჩვენი ქვეყნის შიდა საქმეების გამოყენება საგარეო არენაზე. ჩემთვის ეს არის ნამდვილად დიდი პატივი, ვიყო ჩვენი ქვეყნის სამსახურში უკვე აღმასრულებელი ხელისუფლების მხრიდან მას შემდეგ, რაც პარლამენტის მიერ გამოცხადებული იქნება ნდობა. ჩვენი ქვეყნის ინტერესების დაცვა არასდროს ყოფილა მარტივი, თუმცა ჩემი მხრიდან ყოველი დღე და ყოველი წუთი მიეძღვნება იმას, რომ მაქსიმალურად იყოს ჩვენი ქვეყნის ეროვნული ინტერესები, ჩვენი ქვეყნის კონსტიტუციური მიზნები დაცული საერთაშორისო არენაზე. ერთგვარად სახლში დაბრუნებასავით არის ჩემთვის საგარეო საქმეთა სამინისტროში მისვლა, ფაქტობრივად, გავიზარდე ამ სამინისტროში, თუმცა არ შეიძლება არ აღვნიშნო ის გამოცდილება, ძალა და ენერგია, რომელიც დღეს მე მომყვება საპარლამენტო გუნდიდან, საპარლამენტო საქმიანობიდან და კიდევ ერთხელ დიდი მადლობა იმ ნდობისთვის, რასაც მე მიცხადებთ და ახლა უკვე აღმასრულებელი ხელისუფლებიდან შევეცდები, რომ მაქსიმალურად დავიცვა ჩვენი ქვეყნის ინტერესები და ჩემთვის დიდი პატივია, ვიყო თქვენი გუნდის წევრი და ერთად გავაგრძელოთ ბრძოლა ჩვენი ქვეყნის ინტერესების დასაცავად“, - განაცხადა მაკა ბოჭორიშვილმა.
რა არის ცნობილი ბოჭორიშვილზე?
მაკა ბოჭორიშვილი 1978 წლის 15 აგვისტოს თბილისში დაიბადა.
განათლება:
- თბილისის სახელმწიფო უნივერსიტეტი, სპეციალობა სამართალმცოდნეობა
- საქართველოს დიპლომატიური აკადემია, სპეციალობა საერთაშორისო ურთიერთობები/დიპლომატია
სამუშაო გამოცდილება:
- საქართველოს საგარეო საქმეთა სამინისტროს სამართლებრივი დეპარტამენტის სტაჟიორი, ატაშე, II მდივანი (1999-2004)
- საქართველოს დიპლომატიური აკადემიის ლექტორი (2002-2005)
- საქართველოს საგარეო საქმეთა სამინისტრო, საქართველოს საელჩო ბელგიის სამეფოში და საქართველოს წარმომადგენლობა ევროკავშირში, II მდივანი (2005-2009)
- საქართველოს საგარეო საქმეთა სამინისტროს საერთაშორისო სამართლებრივი დეპარტამენტის I მდივანი (2009)
- საქართველოს საგარეო საქმეთა სამინისტროს ევროინტეგრაციის დეპარტამენტის ევროკავშირ-საქართველოს შორის ურთიერთობების სამმართველოს უფროსის (2009-2010)
- საქართველოს საგარეო საქმეთა სამინისტრო, საქართველოს საელჩო ბელგიის სამეფოში და საქართველოს წარმომადგენლობა ევროკავშირში, მრჩეველი (2010-2014)
- საქართველოს საგარეო საქმეთა სამინისტრო, ევროინტეგრაციის დეპარტამენტის დირექტორის მოადგილე (2014-2015)
- საქართველოს საგარეო საქმეთა სამინისტრო, საქართველოს საელჩო ავსტრიის რესპუბლიკაში და საქართველოს მუდმივი წარმომადგენლობა ევროპის უსაფრთხოებისა და თანამშრომლობის ორგანიზაციასა და ქ. ვენაში განლაგებულ საერთაშორისო ორგანიზაციებში საგანგებო და სრულუფლებიანი დესპანი (2015-2017)
- საქმეთა დროებითი რწმუნებული (2017-2018)
- საქართველოს საგარეო საქმეთა სამინისტრო, საქართველოს საელჩო ბელგიის სამეფოში და საქართველოს წარმომადგენლობა ევროკავშირში, საგანგებო და სრულუფლებიანი დესპანი (2018-2020)
- მე-10 მოწვევის პარლამენტის წევრი (2020 წლიდან): პარტიული სიით, საარჩევნო ბლოკი: ""ქართული ოცნება - დემოკრატიული საქართველო“; ფრაქცია "ქართული ოცნება“ - ფრაქციის წევრი (11-12-2020);
- ევროპასთან ინტეგრაციის კომიტეტის თავმჯდომარე (11-12-2020), საგარეო ურთიერთობათა კომიტეტის წევრი (17-12-2020)
- 2024 წლის არჩევნებისთვის ბოჭორიშვილი "ქართული ოცნების“ საპარლამენტო სიის მეცხრე ნომრად წარადგინეს
სახელმწიფო ჯილდოები:
- ღირსების ორდენი (15-11-2013)
ოჯახი
ქონებრივი დეკლარაციის თანახმად ოჯახის გრაფაში მაკა ბოჭორიშვილს არავინ ჰყავს მითითებული, შესაბამისად, ის ამ ეტაპზე დაოჯახებული არ არის, თუმცა 2017 წელს შევსებულ დეკლარაციაში, მას მითითებული ჰყავდა მეუღლე ჯემალ რამიშვილი. დიპლომატსა და პოლიტიკოს ჰყავს 23 წლის ქალიშვილი ნინა რამიშვილი, რომელიც ბავშვობაში ბალერინობაზე ოცნებობდა და საბალეტო სკოლაში სწავლობდა, თუმცა შემდგომ მისი ინტერესის სფერო მნიშვნელოვნად შეიცვალა და მან განათლების მიღება ბრიუსელში, ეკონომიკისა და მენეჯმენტის მიმართულებით გადაწყვიტა.
დედა შვილს 20 წლის იუბილეს 2021 წელს, სოციალური ქსელით ასე ულოცავდა:
"ესეც 20, თბილი და ტკბილი სიკეთე და სიყვარული რომ შეუძლია მხოლოდ. დიდი ხანია შვილობას მეგობრობა შეუთავსა, მრჩევლობასაც არ აკლებს, მინდა, რომ “შენ” იყო ყოველთვის ისეთი, როგორიც ხარ"
რა ქონებას ფლობს მაკა ბოჭორიშვილი? - იხილეთ აქ
იხილეთ ასევე: