პროტესტი ფოტოებში: პარლამენტთან ამ დროისთვის ოთხი კარავია გაშლილი, შენობის ყველა შესასვლელთან პოლიციაა მობილიზებული

საკანონმდებლო ორგანოსთან, პარლამენტთან, სადაც საპროტესტო აქცია მიმდინარეობს, ამ დროისთვის, ოთხი კარავია გაშლილი.

აქციის მონაწილეებს კარვებთან ერთად ადგილზე მიტანილი აქვთ წყალი, საკვები, “პარალონები“, პლედები და ღამისთევისთვის საჭირო სხვა ნივთები. ორგანიზატორები მონაწილეებს პლედებს ურიგებენ. მსურველებისთვის ადგილზე არის საკვებიც, ცხელი სასმელები და საძილე ტომრები.

პროტესტის მონაწილეებს შეუძლიათ ევროკავშირის წარმომადგენლებს წერილები მისწერონ.

აქციის მონაწილეებს, სცენიდან ორგანიზატორები მიმართავენ, ისინი პერიოდულად გააჟღერებენ სამოქმედო გეგმას.

პარალელურად, პარლამენტის ყველა შესასვლელთან პოლიციაა მობილიზებული. საკანონმდებლო ორგანოს მიმდებარე პერიმეტრზე დიდი რაოდენობით სამართალდამცავი დგას.

შეგახსენებთ, აქციის მონაწილეები 26 ოქტომბრის არჩევნების შედეგებს აპროტესტებენ და მიიჩნევენ, რომ ხელისუფლებამ მათი ხმები გააყალბა. აქციაზე იმყოფებიან ოპოზიციონერი პოლიტიკოსებიც.

აქციის მონაწილეები მეთერთმეტე მოწვევის პარლამენტის პირველ სხდომას აპროტესტებენ, რომელიც ხვალ არის ჩანიშნული. მომიტინგეები დღევანდელი ღამის პარლამენტთან გათენებას აპირებენ.

აღსანიშნავია, რომ რესპუბლიკის მოედნიდან საკანონმდებლო ორგანოს მიმართულებით საპროტესტო მსვლელობის დროს, ვითარება რამდენჯერმე დაიძაბა. კერძოდ, რესპუბლიკის მოედანზე შეკრებილ მოქალაქეებს, რომლებიც ავტოკოლონებით ცდილობენ პარლამენტთან მისვლას, პოლიცია ამის საშუალებას არ აძლევდა. აღნიშნულის გამო, აქციის მონაწილეებსა და სამართალდამცველებს შორის სიტყვიერი შელაპარაკების რამდენიმე ფაქტი იყო.

• განახლება 01:58

პარლამენტთან, სადაც საპროტესტო აქცია მიმდინარეობს, ამ დროისთვის, 10-ზე მეტი კარავია გაშლილი.

ამ დროისთვის, პარლამენტის ყველა შესასვლელთან პოლიციაა მობილიზებული. საკანონმდებლო ორგანოს მიმდებარე პერიმეტრზე დიდი რაოდენობით სამართალდამცავი დგას.

იხილეთ ასევე:

• წითელი კარვები რუსთაველზე, ღამის გასათევად მოწყობილი ინფრასტრუქტურა და სიტყვით გამოსვლის მოლოდინი - რა ხდება პარლამენტთან, სადაც პოლიციის წინააღმდეგობის მიუხედავად, მანქანებმა შესვლა მაინც შეძლეს (ფოტო/ვიდეო)
• “100 000 ადამიანი უნდა მოვიდეს აქ და აი ამათ უნდა მივაწვეთ - ინსტინქტებიც დაბლაგვებული აქვთ და ზოგადად დაბლაგვებულები არიან“ - ლევან ხაბეიშვილი სამართალდამცველებზე