3 შვილის მამამ საკუთარი სიკვდილი გაითამაშა და ქვეყნიდან გაიქცა, შემდეგ კი პოლიციას ვიდეო გამოუგზავნა - "მას ონლაინ კონტაქტი ჰქონდა უზბეკ ქალთან"
ამერიკელმა მამაკაცმა, რომელმაც საკუთარი სიკვდილი გაითამაშა, ოჯახი დატოვა და ქვეყნიდან გაიქცა, მშობლიური შტატის, ვისკონსინის გამომძიებლებს ვიდეო გაუგზავნა იმის დასამტკიცებლად, რომ ამჟამად უსაფრთხოდაა.
45 წლის რაიან ბორგვარდტი 12 აგვისტოს გაუჩინარდა, როდესაც მარტო იყო წასული სათევზაოდ. ამის შესახებ ოლქი Green Lake-ს შერიფის ოფისმა, პრესკონფერენციაზე განაცხადა.
- პოლიცია ტბას 54 დღის განმავლობაში ათვალიერებდა და თავდაპირველად ვარაუდობდა, რომ ის დაიხრჩო, სანამ არ აღმოაჩინეს ციფრული მტკიცებულება, რამაც აფიქრებინათ, რომ მამაკაცი აღმოსავლეთ ევროპაში გაიქცა.
ხელისუფლების განცხადებით, ბორგვარდტს ძებნის ხარჯების 40,000 დოლარი მართებს და შესაძლოა, ბრალი გაუჩინარების გამოძიებისთვის ხელშეშლის გამოც კი წაუყენონ.
შერიფმა, მარკ პოდოლმა პრესკონფერენციაზე განაცხადა, რომ ხელისუფლება ბორგვარდტთან ამ თვის დასაწყისიდან იყო კომუნიკაციაზე, მას შემდეგ, რაც დაუკავშირდნენ ქალს, რომელიც რუსულად საუბრობს.
სწორედ ამ ქალბატონის დახმარებით მოხდა მამაკაცისა და პოლიციის დაკავშირება. სამართალდამცავებმა არ დააკონკრეტეს, ვინ იყო ეს ქალი ან რა კავშირი ჰქონდა მას ბორგვარდტთან.
"დიდებული ახალი ამბავია ის, რომ ის ჯერ კიდევ ცოცხალია და კარგად არის... ცუდი ამბავი ის არის, რომ ჩვენ ზუსტად არ ვიცით, სად არის რაიანი, და მას სახლში დაბრუნება არ გადაუწყვეტია - თქვა შერიფმა, მარკ პოდოლმა
24-წამიანი ვიდეო, რომელიც ბორგვარდტმა ხელისუფლებას გაუგზავნა, სელფის სტილშია გადაღებული და მას თეთრკედლებიან ბინაში აჩვენებს.
"საღამო მშვიდობისა, მე ვარ რაიან ბორგვარდტი. დღეს 11 ნოემბერია. თქვენთან დაახლოებით დილის 10 საათია. ჩემს ბინაში ვარ. უსაფრთხოდ ვარ, დაცული, პრობლემა არ მაქვს. იმედი მაქვს, ეს გამოგადგებათ" - ამბობს მამაკაცი ვიდეომიმართვაში.
- თითქმის ყოველდღიური მიმოწერის დროს, ბორგვარდტმა სავარაუდოდ, პოლიციას გაუმხილა, როგორ დაგეგმა გაქცევა.
გამოძიების ინფორმაციით, მას შემდეგ, რაც კაიაკი (ტყავგადაკრული მსუბუქი ნავი) და მობილური ტელეფონი ტბაში ჩაძირა, მან პატარა ბავშვის ზომის ნავით მიაღწია ნაპირს, სადაც ელექტრო ველოსიპედი ჰქონდა გადამალული. ვისკონსინში, მედისონამდე ღამით იმგზავრა, შემდეგ ავტობუსით დეტროიტში წავიდა და კანადიდან თვითმფრინავით, უცნობი მიმართულებით გაფრინდა.
"ჩვენ ვაგრძელებთ ამ ინფორმაციის გადამოწმებას, წერტილების დაკავშირებას ვცდილობთ, მაგრამ ვფიქრობთ, რომ ეს იყო რაიანის მეთოდი, მთელი ქვეყნისთვის ეჩვენებინა, როგორ გააკეთა ე" - განაცხადა პოდოლმა.
სავარაუდოდ, ბორგვარდტი მარტო მოქმედებდა. პოდოლმა ისიც დაამატა, რომ მას წასვლის შემდეგ თავის ოჯახთან არანაირი კონტაქტი არ ჰქონია.
- მან სამი შვილი და მეუღლე დატოვა. წასვლამდე რამდენიმე დღით ადრე, ხელისუფლებამ აღმოაჩინა, რომ მას აღებული ჰქონდა 375,000 დოლარის სიცოცხლის დაზღვევის პოლისი, თანხები უცხოურ საბანკო ანგარიშზე გადარიცხა, ახალი პასპორტის ფოტო გადაიღო და ელ-ფოსტის მისამართი შეცვალა. მას ასევე ონლაინ კონტაქტი ჰქონდა ქალბატონთან უზბეკეთში.
კითხვაზე, რა შეიძლებოდა ყოფილიყო მისი საკუთარი სიკვდილის გათამაშების მოტივაცია, პოდოლმა თქვა: "მას უბრალოდ, პირადი საკითხები ჰქონდა და ფიქრობდა, რომ ეს იყო სწორი საქციელი."
მან დაამატა, რომ პოლიცია ბორგვარდტს ელ-ფოსტით უკავშირდება, სახლში დაბრუნებაში დასარწმუნებლად და "მის მიერ შექმნილი არეულობის მოსაგვარებლად" "მის გრძნობებზე ზემოქმედებს".
შერიფი ხუთშაბათის პრესკონფერენციაზე აღელვებული იყო და თქვა, რომ გაქცეულის შვილები სადღესასწაულო სეზონს მამის გარეშე გაატარებენ.
"შობა მოდის," - თქვა მან, - "რა იქნებოდა იმაზე უკეთესი საჩუქარი ბავშვებისთვის, ვიდრე შობას მამასთან ერთად ყოფნა."