კადიროვის 20 წლის შვილი სკანდალში ეხვევა: რესტორანი, რომელიც ტაბარიკის მფლობელობაშია პოპულარიზაციას უწევს ბენდ BTS-ის, რომელიც ლგბტ თემის მხარდამჭერია
ჩეჩნეთის ლიდერის ქალიშვილი, ტაბარიკ კადიროვა, გროზნოში კორეული სამზარეულოს რესტორანს Chicko-ს ფლობს.
- ეს რესტორანი საკუთარ იმიჯს კორეული პოპ-კულტურის პოპულარიზაციაზე აგებს, მათ შორის BTS-ის მხარდაჭერაზე, ჯგუფის, რომელიც ღიად აცხადებს, რომ ლგბტ თემის მხარდამჭერია.
The Moscow Times-ის ინფორმაციით, ტაბარიკ კადიროვას კომპანიამ "ბერეკეტმა"კორეული სტრიტ-ფუდის Chicko-ს ფრენჩაიზი შეიძინა. რესტორნის ოფიციალურ სოციალური ქსელებში ხშირად ქვეყნდება რჩევები ანიმეების შესახებ, თავად დაწესებულება მასპინძლობს სამხრეთ კორეული სერიალების ჩვენებებს, ასევე ათამაშებს ალბომებსა და პროდუქტებს K-pop შემსრულებლებისგან, მათ შორის ჯგუფის BTS-ისგან.
BTS, ბოი-ბენდი, რომელსაც 120-ზე მეტი მუსიკალური ჯილდო აქვს, 2013 წელს შეიქმნა. ჯგუფი ერთ-ერთი ყველაზე პოპულარულია k-pop-ის სამყაროში, ხოლო Time-მა მათი წევრები მსოფლიოს გავლენიან ადამიანთა სიაში შეიყვანა. მუსიკოსები ტოლერანტობას და ლგბტ თემის უფლებებს აქტიურად უჭერენ მხარს.
20 წლის ტაბარიკ კადიროვა კადიროვის უფროს შვილებს შორის ერთადერთია, რომელიც სახელმწიფო სამსახურში არ მუშაობს. მიუხედავად ამისა, აპრილში იგი "ჩეჩნეთის რესპუბლიკის წინაშე დამსახურებისთვის" მედლით დააჯილდოვეს, რეგიონში მეწარმეობასა და ინვესტიციების მოზიდვაში შეტანილი წვლილისთვის. მისი მეუღლე, რამზან ვისმურადოვი, ჩეჩნეთის ახალგაზრდობის საქმეთა მინისტრის პოსტს იკავებს.
ტაბარიკი ოფიციალურად ფლობს 12 კომერციულ კომპანიას, მათ შორის "გროზნოს ტაქსის," რომელმაც 2023 წელს 22 მილიონი რუბლის ზარალი მიიღო. იგი სანქცირებულთა სიაშია შეტანილი რამდენიმე ქვეყნის – აშშ-ის, იაპონიასა და უკრაინის – მიერ.
2017 წელს "ნოვაია გაზეტამ" გამოაქვეყნა გამოძიება ჩეჩნეთში გეების მასობრივი არასამართლებრივი სიკვდილით დასჯის შესახებ. რაზეც რამზან კადიროვმა განაცხადა: "ჩვენ არ გვყავს ასეთი ხალხი“. რეგიონში კვლავ ვრცელდება ცნობები ლგბტქ თემის წევრების მკვლელობის შესახებ. Amnesty International, გაეროს ადამიანის უფლებათა კომიტეტი, 29 ქვეყნის წარმომადგენლები მსოფლიოს სხვადასხვა კუთხიდან და რუსი უფლებადამცველები მუდმივად საუბრობენ ჩეჩნეთში გეების დევნაზე.
წაიკითხეთ ასევე: