აქციიდან პირდაპირ სამშობიაროში: ნოდარ ჩაჩანიძე გოგონას მამა გახდა - “დაიბადა არიადნა, ამ საოცრების დედა და მამა გავხდით...“

პარტია "ახალის" წევრს, ნოდარ ჩაჩანიძესა და მის მეუღლეს ნინი სუხიტაშვილის შვილი შეეძინათ. როგორც ნოდარ ჩაჩანიძე წერს, ნინიმ “ჩაჩავას კლინიკაში“ იმშობიარა და წყვილს გოგონა შეეძინა. ახალშობილს არიადნა დაარქვეს.

“ამ საოცრების დედა და მამა გავხდით მე და ნინი რამდენიმე წუთის წინ. დაიბადა არიადნა ჩაჩანიძე“, - წერს ნოდარ ჩაჩანიძე და ფოტოს აქვეყნებს.

მანამდე წყვილი მელიქიშვილის გამზირზე მიმდინარე აქციაზე იმყოფებოდა.

“ჩაჩავას კლინიკიდან ცოტა ხნით მელიქიშვილზე გავიარეთ და ჩემმა გოგოებმა აქციის მონაწილეები გაამხნევეს.

19:00 საათზე ყველა, ვისაც ახლა ქვეყნის დაცვა შეუძლია, მელიქიშვილის გამზირზე უნდა იყოს...

ჩვენი შვილების ბედნიერი მომავლისთვის ჩვენ ახლა სამშობლო უნდა დავიბრუნოთ!“ - წერდა “ახალის“ წევრი გუშინ, სასიხარულო სიახლის გავრცელებამდე რამდენიმე საათით ადრე.

• წყვილს უმნიშვნელოვანესი მოვლენა უკვე მოულოცა პარტია “ახალის“ დამფუძნებელმა ნიკა გვარამიამ.

“პირველი ახალშობილი გვყავს პარტიაში! ვულოცავ ჩემს უმცროს მეგობარს და მის შესანიშნავ ცოლს პატარა არიადნას შეძენას! დიდი გოგო გაიზარდოს! მისი მამა რომ იბრძვის, იმგვარ საქართველოში გაიზარდოს ჯანმრთელი და წარმატებული!“ -წერს გვარამია.

აღსანიშნავია, რომ მიმდინარე წლის მაისში ოპოზიციური პარტია “ახალის“ წევრი თავდასხმის ობიექტი გახდა.

როგორც ის აცხადებდა, უცნობი პირები მას მანქანით სადარბაზოსთან ელოდებოდნენ, რის შემდეგაც ფიზიკურად გაუსწორდნენ და მიიმალნენ.

"ორი ადამიანი მელოდებოდა სადარბაზოსთან, ორი ადამიანი კიდევ მანქანაში იჯდა. წამოვიდნენ ორი მხრიდან. მე და ჩელე ერთად წამოვედით და მასაც დახვდნენ და მეც. მირტყეს წიხლები, წავიქეცი და რამდენიმე წამში წავიდნენ. ძალიან მალე მოხდა ყველაფერი. ხალხი იყო ირგვლივ ბევრი და ვერ შეძლეს ცემის დიდხანს გაგრძელება.“, - განაცხადა ნოდარ ჩაჩანიძემ.

სავარაუდოდ თავდასხმა მის პოლიტიკურ საქმიანობას უკავშირდება.

• აღნიშნულს მაშინ მომღერალი გიორგი სუხიტაშვილიც სოციალურ ქსელში გამოეხმაურა:

"ახლა ტელევიზიით გავიგე, რომ ჩემი ოჯახის წევრს, ჩემს სიძეს დაესხნენ თავს (ვესაუბრე ნორმალურადაა) ამით რისი მიღწევა გინდათ?ვინმე შეშინდება? არა და ვერ შეაშინებთ! უფრო მეტ ადამიანს რომ აბოროტებთ და იმტერებთ ვერ ხვდებით?

მგონია, რომ ადრე თუ გვიან ჩემთანაც მოხვალ სადმე და დამხვდებით მიზეზის მოგონება არ გაგიჭირდებათ. არავის არ ეშინია დახვედრით, გააზრებული და გათავისებული მაქვს ის, რომ ვიღაცას არ მოვეწონები!

ხო არც გაგინებთ არც რამე სხვას. თქვენ კიდევ ხალხო, თუ იდიოტები არა ხართ, უნდა ხვდებოდეთ რა ნეხვშიც ვართ, არ გეტყვით რა უნდა გააკეთოთ, ყველამ კარგად იცით!მე მზად ვარ კაი ცემა ავიტანო, ამიტანია კიდეც, მეტსაც გეტყვით დიდი პატივი იქნება ჩემთვის" - წერდა სუხიტაშვილი.

იხილეთ ასევე:

• "ორი ადამიანი მელოდებოდა სადარბაზოსთან... მირტყეს წიხლები, წავიქეცი" - თავს დაესხნენ "ახალის" წევრს, ნოდარ ჩაჩანიძესაც
• "ტელევიზიით გავიგე, რომ ჩემი ოჯახის წევრს, ჩემს სიძეს დაესხნენ თავს" - რას წერს გიორგი სუხიტაშვილი?